I Samuel 7 - Labrador Inuttitut Heritage Bible

Israelitit sagiarninganik salaᴋarninganiglo Filisterinik, Samuelib tuksiarningata kingorngane.

¹ Taimak innuit Kiriatjearimemiut ᴋaivut, ailugolo Nalekab iklervinga takpaunga, âlâllo Abinadab Gibeamêtub iglunganut; erningalo Eleaser ivsornaitipât udsertorᴋovlugo Nalekab iklervinganik.

² Uvlormillo taipsomanemit Nalekab iklervingata nokᴋarvinganit Kiriatjearimeme akkunêrpok, Jarillo 20 git annigorlaukput. Israelitillo illunamasiatik kugviolerput Nalekab sângane.

³ Samuele Israelib iglomiokotinginut illunamasianginut oᴋarpok: Omamut illunânut sâlerupse Nalekamut, tagva Gudingoat takkorngartat Astarotelo pêjarsigik illipsingnit, omattiselo torartisigik Nalekamut, kivgartortuarisiuglo; tagva piuliniarpâse Filisterit agganginit.

⁴ Tagva Israelib ᴋittorngangita pêjarpakit ingmingnit Baalit Astarotelo, Nalegarlo kissiat kivgartorpât.

⁵ Samuelele oᴋarpok: Israelitit illunamasiatik kattimatisigik Mizpame, tuksiarutjikovlunga illipsingnik Nalekamut.

⁶ Tikkilutiglo kattimalerput Mizpame, immermiglo ᴋallusivut, kovilâllo Nalekab sânganut, nerritaililutiglo uvlorme taipsomane, oᴋarlutiglo: Nalegak idluitullivigilaukpavut. Taimak Samuelib Israelib ᴋittorngangit idluarsarpait Mizpame.

⁷ Filisterille tussaramik Israelitit kattimaninganik Mizpame, tagva angajoᴋangit majorarput Israelitit sorsugvigijartorlugit. Israelib ᴋittorngangit tamattominga tussaramik, Filisterit sivurajutigivait,

⁸ Oᴋarpullo Samuelemut: Sorairniarnak tuksiarutigiluta Nalekamut Gudiptingnut, piuliklerᴋovlugo uvaptingnik Filisterit agganginit.

⁹ Samuele sangârsungmik amâmaktomik tigusivok, Nalekamut tunnergutiksamik ôtaksamik illuitomik tunnijilune, nipliarlunelo Nalekamut Israelitit pivlugit; Nalekablo tussarpâ.

¹⁰ Samuelelo tunnergutiksamik ôtaksamik tunnijitillugo, Filisterit tikkilerput Israelitit sorsugvigijomavlugit. Nalegarle kalluᴋarᴋojivok kalluksoarmik Filisterit ᴋollâne uvlorme taipsomane, ᴋoaksartipaillo, sâlagijauᴋovlugit Israelitinut.

¹¹ Tagva angutit Israelitit aularput Mizpamit, ᴋemâtipaillo Filisterit, ullimarlugillo Bethkarib attâ tikkilugo.

¹² Tagva Samuelib ujarak tiguva, nappartilugolo Mizpab Seniblo akkorngangne, atserarpâlo Ebenezeremik, oᴋarlunelo: Maunga tikkilugo Nalekab ikkajorlaukpâtigut.

¹³ Taimak Filisterit songojungnaititauvut, tikkitsungnailutiglo Israelib nunangata kiglilervianut; Nalekablo aggangita Filisterit akkerartorpait Samuelib innosingane illunane.

¹⁴ Taimak Israelitit iglugaseksuit Filisterit aksarnigarilauktangit tapkonangat pilaurivait, Ekronemit Gathe tikkilugo, nunangita kiglilervingit illaliudlugit; Israelitit tapkoa piulivait Filisterit agganginit, Israelitit ullapirsauteᴋalaungmatta Amoriterinut.

¹⁵ Samuelible Israelitit idluarsarpait inosermine tamât,

¹⁶ Jarinelo tamaine ingerarpok sunatuinarnut, Bethelemut, Gilgalemullo, Mizpamullo. Israelitillo iglugasaksoarne tamakkonane idluarsarlaurunigit,

¹⁷ Uttilerivok Ramatemut, iglunga tagvanelaungmat, tagvanelo idluarsarpait Israelitit, sannalunelo tagvane Altaremik Nalekamut.