I Samuel 5 - Labrador Inuttitut Heritage Bible

Filisterit âniatitauninginik angersimanerub iklervingata pijauninga pivlugo.

¹ Filisterit Gudib iklervinga tiguvât âlugolo Ebenezeremit Asdodemut,

² Dagonib iglunganut, illilâllo Dagonib sannianut.

³ Asdodemiullo, uvlub aipangane uvlarâsukut makkinamik, Dagone naipipât pamangatillugo natterme, Nalekab iklervingata sângane. Tapkoale Dagone tiguvât, illigivâllo inninganut.

⁴ Uvlub aipanganele uvlangotillugo makkinamik, Dagon ama pamangatillugo natterme, Nalekab iklervingata sângane, naipipât; niaᴋungale aggangillo igluktut nakkarsimalaukput upkutsab manoangane; timinga kissime illimalaukpok ᴋângane.

⁵ Tamanna pivlugo Dagonib ajochertuijoᴋotingita, illunatiglo Dagonib iglunganut ittertut, tutilungilât Dagonib iglungata manoanga Asdodeme, uvlok tamanna tikkilugo.

⁶ Nalekable aggangit oᴋumaidlalaukput Asdodemiunut, asserorpaillo, Asdodemiullo erkânetullo illunaita âniaᴋartipait, timingata takkojaksaunginingine.

⁷ Inuille Asdodemiut takkogamik taimailiornermik, oᴋarput: Israelib Gudingata iklervinga uvaptingnêtsungnaile, aggangit oᴋᴋumailuarmatta uvaptingnut, Gudeᴋotiptingnullo Dagonemut.

⁸ Tilliklerpullo kattiᴋolugillo Filisterit angajoᴋangit illunaita ingmingnut, oᴋarlutiglo: Kannok Israelib Gudingata iklervinga piniarvigijaksarivittigo? Tapkoalo kiovut tagva: Gathemiut Israelib Gudingata iklervinga akkigarlitsuk sunatuinarmut.

⁹ Tapkoalo Israelib Gudingata iklervinga akkigarpât sunatuinarmut. Tamnale sunatuinarmut akkigarmatsuk, Nalekab aggangittigut iglugasaksoarne kappianartoᴋalerpok angijoksoarmik, annauvaillo iglugasaksoarmiut tamarmik, mikkijut angijullo, ânianartuniglo pilerput timingita takkojaksaunginingine.

¹⁰ Tagva Nalekab iklervinga tillikliutivât Ekronemut. Gudible iklervinga Ekronemut pingmat, Ekronemiut nipliadlarput: Gudib iklervinga akkigarpât sunatuinarmut uvagut tikkiluta, toᴋᴋotsiᴋovlugo uvaptingnik, innuᴋotiptingniglo.

¹¹ Tagva tilliklerput kattimaᴋolugillo Filisterit angajoᴋangit illunaita, oᴋarlutiglo: Israelib Gudingata iklervinga tillikliutilersiuk innigilauktanganut, toᴋᴋotsiᴋonnago uvaptingnik innuᴋotiptingniglo. Gudib aggangit kappianartoksoaᴋartitsingmatta iglugasaksoarne illunâne toᴋᴋotsinermut.

¹² Inuillo toᴋᴋolaungitut annaujauvut timingita takkojaksaunginingine, taimak iglugasaksoarmiut âlaningit kongmuarmatta ᴋillangmut.