I Samuel 4 - Labrador Inuttitut Heritage Bible

Israelitit salagijauninganik. Angersimanerublo iklervingata aularutijauninganik. Eliblo ernikitalo toᴋᴋunginik.

¹ Samueliblo Israelitit illunaita oᴋâlavigilerpait. Israelitillo aularput Filisterit pachrearlugit unatadlarnermut, tangmarterlutiglo Ebenezereme. Filisterillo tangmarsimalaukput Afekeme;

² Opalungaijarlutiglo Israelitit unatarvigijomavlugit. Sorsungnerlo angijororpok, Israelitillo sâlagijauvut Filisterinut, tapkoalo sorsungnek malliklugo natername angutit 4,000 diokassait ullimârpait saviksoarmut.

³ Innugatsuillo tangmarvingmut tikkimatta, Israelitit angajoᴋangit oᴋarput: Sôg Nalekab uvlome sâlagijauᴋovâtigut Filisterinut? Nalekab angersimaningata iklervinga Silomit najortigilerlavut, tikkikolugolo akkonaptingnut, piuliklerkovlugo uvaptingnik omigijipta agganginit.

⁴ Innugatsuillo tilliklerput Silomut, aijauᴋolugolo tagvangat Nalekab Zebaothib, Kerubimib ᴋollâne iksivajub, iklervinga angersimanetalik. Taikanelaukpuglo Elib ernigik Hofni Pinehaselo, Gudib angersimaningata iklervinga najorlugo.

⁵ Nalekablo angersimaningata iklervinga tangmarvingmut pingmat, Israelitit illunamasiatik igiaᴋomijarput, nipliadlarnermut nuna immiadlarmat.

⁶ Filisterillo igiaᴋomijarnerub taimaitub nippivaksoangit tussaramigit, oᴋarput: Igiaᴋomijarnerub taimaitub nippivaksoanga Ebraerit tangmarvingane sunauva? Tukkisigamiglo Nalekab iklervinga tangmarvingmut tikkisimangmat,

⁷ Erksilerput, oᴋarlutiglo: Gude tangmarvingmut tikkisimavok; oᴋaganerlutiglo: Kappianamêk uvagut! sivorngane taimailaungimat.

⁸ Kappianamêk uvagut! Kia piulijomavâtigut Gudiôjut sangijoksuit taipkoa agganginit? Tamadsa Gudiôjut taipkoa annaudlalauktut Egiptenemiunik kappianartunut sunatuinarnut sunaᴋajuitome.

⁹ Tagva maksoaleritse, angutaulerluselo Filisteriôjose, kivgartoriaᴋarᴋonase Ebraerinik, sorlo kivgartorlaungmasse. Angutauleritse sorsukluselo;

¹⁰ Tagva Filisterit sorsukput, Israelitillo salagijaulerput, illunatiglo attunit ᴋemâvut iglomingnut; unatarnerlo angijôlaukpok, Israelitinit ocholaungmatta angutit pissuktut 30,000 dit.

¹¹ Gudiblo iklervinga aksarnigarijauvok, Eliblo ernigik Hofni Pinehaselo toᴋᴋolerpuk.

¹² Tagva Benjaminekut illangat sorsuktoᴋattigêksoarnit akpangerpok, tikkilunelo Silomut uvlome taipsomane, annorânelo alliktorlaukpait, ivjorlo katterarsimavlugo niaᴋominut.

¹³ Ahâglo, ittermat Eli iksivavok iksivautame, apᴋosinek takkojomavlugo; omattinga kappiasudlarmat Gudib iklervinga pivlugo. Angutiblo tapsoma iglugasaksoarnut ittersimagame, oᴋautigiva tamanna; iglugasaksoarmiullo illuêngardlutik avâlakilerput.

¹⁴ Eliblo nipliadlarnek tussaramiuk, appertsorpok: Aulajadlarnek tamanna sunauva? Tagva angut tamna tuaviluᴋardlune ᴋaivok, oᴋautigivalo Elimut.

¹⁵ (Elile Jareᴋalaukpok 98 ginik, ijigiglo takpêsimavuk takkojungnarane.)

¹⁶ Angullo tamna Elimut oᴋarpok: Tikkipunga ᴋemâlungalo uvlome sorsuktoᴋattigêksoarnit. Tamnale oᴋarpok: Kannok tamanna illingava ernîk?

¹⁷ Tagva unipkautjijok kiovok oᴋarlunelo: Israelitit Filisterit ᴋemâlaukpait, sorsungnekalaukporlo angijoksoarmik inugatsoarne, ernikiglo Hofni Pinehaselo toᴋᴋovuk; tamanna tappilugo Gudib iklervinga aksarnigarijauvok.

¹⁸ Gudible iklervinga (Elib) erkaramiuk, kingorpiosarlune niverpok iksivautamit, ittertarviksub sanniane, kongesêjarlunelo, toᴋᴋolerlunelo; inutoᴋaulaurame anguteôlunelo oᴋᴋumaitok. Israelitiniglo idluarsailaukpok Jarinik 40 ginik.

¹⁹ Tapsomale ukkuanga, Pinehasib nullianga singailaukpok, erniviksangalo nalliusimalaukpok. Tapsoma oᴋautigijaumajok tussaramiuk, Gudib iklervinga aksarnigaungmat, sakkinelo uinelo toᴋᴋomanik, akkovlêlerpok ernilunelo, ânianartomut sillimanermut tikkitaugame.

²⁰ Toᴋᴋolermallo manna, arnat sanniane nangertut oᴋarput: Sivoraniarnak, erneârsuᴋarpotit. Tamnale kiolungilak sunamiglonêt, omamiutarksingilarlo tamattominga.

²¹ Nukapiarlo Ikabodemik atserarpa, oᴋarlunelo: Ananaunek pêrsimavok Israelemit; Gudib iklervinga aksarnigaungmat, sakkingalo uingalo toᴋᴋomanik.

²² Oᴋapsarlunelo: Ananaunek pêrsimavok Israelemit, Gudib iklervinga aksarnigaungmat.