I Samuel 31 - Labrador Inuttitut Heritage Bible

Saulib kappininganik ingminik sorsungnerme; erningitalo pingasut toᴋᴋotauninganik.

¹ Filisterille Israelitit sorsugvigivait; Israeliblo angutingita Filisterit ᴋemâjutigivait, ocholutiglo ullimartauvlutik Gilboab ᴋakᴋangane.

² Filisterillo Saule erningillo unangmivait, ullimarpaillo Jonathan, Abinadabelo, Malchisualo, Saulib erningit.

³ Sorsungnerle songudlalaukpok Saulemut, pittiksertullo pittikpât uvigarlugolo, ikkilertaumalaukporlo angijomik pittiksertunut.

⁴ Tagva Saule akjarsijoᴋotiminut sakkunginik oᴋarpok: Saviksuit amuleruk, kappilungalo tapsomunga, kippisimangitut taipkoa ᴋaiᴋonnagit kappilungalo, mittautigilungalo. Aksarsijoᴋotingale sakkunik, pijomalungilak, angijomik sivuragame. Tagva Saulib saviksoak tiguva, ochovigivâlo.

⁵ Aksarsijoᴋotingalo sakkunik takkogame Saule toᴋᴋungmat, ochotipoktauk saviksoarminut, toᴋᴋoᴋattigilugolo.

⁶ Taimak Saule erningillo pingasut akjarsijoᴋotingalo sakkunginik, anguteᴋotingillo toᴋᴋovut attautsekut, uvlorme taipsomane.

⁷ Israelible angutingit naksab ungatâne, Jordaniblo akkianêlauktut takkogamik Israelib angutingit ᴋemângmatta, Saulelo erningillo toᴋᴋungangmatta, iglugasaksuit ᴋemmakpait, ᴋemâlutiglotauk; taimaglo Filisterit ᴋaivut iglogilaitalo.

⁸ Uvlub aipangane Filisterit ᴋaivut, ullimarsimajut mattâromavlugit, naipipaillo Saule erningillo pingasut nallavlutik Gilboab ᴋakᴋangane;

⁹ Niaᴋungalo nakkarpât, sakkungillo pêrpait tapsomangat, tillikliutivaillo Filisterit nunanganut sunatuinarnut, oᴋautigijauᴋovlugo Gudingoaᴋotimik iglungane, innugatsuillo akkorngane.

¹⁰ Sagvingmiutangalo illivât Astarotib iglunganut, timingale toᴋᴋungajok nivingatipât Bethsanib avaluksoanginut.

¹¹ Jabesemiut Gileademe tussaramik Filisterit pinniarlauktanginik Saulemut;

¹² Parngnailerput angutit sorsugungnartut, ingergarlutiglo unnuak nâvlugo, tigulugillo Saulib erningitalo timingit toᴋᴋungajut Bethsanib avalunginit, âlugillo Jabesemut, ikkipaillo tagvane.

¹³ Sauningillo tiguvait, illijartorlugillo nappartub Jabesemêtub attâne, nerritaililutiglo uvlut 7 it nâlugit.