I Samuel 30 - Labrador Inuttitut Heritage Bible

Davidib salaᴋarninganik Amalekiterinik, aitortuininganiglo aksarnigaujunik.

¹ Tagva manna Davide uvluk pingajuangne anguteᴋotine illagilugit Ziklagemut tikkimat, Amalekiterit ittâlaukput aunga, Ziklagemullo; Ziklagemiullo sâlagilaukpait, iglullo ikkilugit ikkomamut.

² Arnallo mikkijut angijullo aularutilaukpait; toᴋᴋotsilaungilelle kinamik, aularutilaukpaille, aularsimalaukpullo apᴋotimikut.

³ Davidelo anguteᴋotine illagilugit iglugasaksoarnut tikkiname, takkolunelo ikkomamut ikkisimangmatta, nulliaᴋotitiglo erneᴋotitiglo panniᴋotitiglo parngnairsortaumangmatta,

⁴ Davide innugatsuillo illagijangit nipliakivut, ᴋêadlarlutiglo ᴋêajungnarungnaiᴋâratik.

⁵ Davidible nulliagik parngnanêrsortaulaurivuk, Ahinoame Jesereelemiok, Abigailelo Nabalib Karmelemiub nulliagilauktanga.

⁶ Davidelo angijomik kappiasulaukpok, inugatsuit milloromangmatsuk, innugatsuit illunatik tarningit annulaungmatta, nalliat ernine panninelo pivlugit. Davidele pitsartutipok ingminik Nalekame Gudimine;

⁷ Oᴋarlunelo Abjatharemut ajochertuijomut, Ahimelechib erninganut: Kaitsivigilaunga ikkiamik. Abjathariblo ikkiak ᴋailaungmago Davidemut,

⁸ Davidib Nalegak appertsorpa, oᴋarlunelo: Sorsuktuksat udlajaksarivakka, anguniarpakkalo? Oᴋarpok: Udlakit, anguniarpattit, piuliklerniarlutillo.

⁹ Tagva Davide aularpok, angutillo 600 dit illagijangit; tikkinamiglo Besorib kônganut illangit nokᴋarput.

¹⁰ Davidele angutillo 400 dit udlanikput; angutille 200 dit nokᴋartut merngortorluarlaukput Besorib kônga ikârungnarlugo.

¹¹ Angumiglo Egiptenemiomik naipitsivut natername, tamna tassiorpât Davidemut, tunnitsivigivâllo ᴋakᴋojamik, nerriᴋovlugo, imipâllo immermik.

¹² Tunnitsivigivâllo Feigib illanganik, Weiniblo paunganginik kattingajunik pannertunik maggoinik. Nerrijarêramelo annerninga utterivok; uvlut pingasut, unnuallo pingasut nâlugit nerrilaungimat sunamik, immermiglo immerlaungimat.

¹³ Davidelo oᴋarpok tapsomunga: Kia pigivâtit? Nakillo pivît? Oᴋarpok: Nukapiangôvunga Egiptenemiok, kivgaulungalo Amalekiteremut; angajoᴋamalo ᴋemalaukpânga ᴋannimalaurama, uvlut pingasut mattoma sivurngane.

¹⁴ Ittâlaukpogut aunga Kretimut, Judamullo Kaleblo sekkernganut, Ziklagelo ikkilaukpavut ikkomamut.

¹⁵ Davidib oᴋautiva: Attersartitsomavinga ununga sorsuktuksanut taipkonunga? Oᴋarpok: Oᴋautimarilaunga Gudeme, toᴋᴋotsomanginamga, pititsomanginamgalonêt angajoᴋama agganginut; tagva attersartitsomavagit, sorsuktuksanut taipkonunga.

¹⁶ Tassiorpaillo ununga. Ahâglo, siamarsimalaukput nuname illunâne, nerrilutiglo immerlarmiglo, okigêserlutiglo aksarnigaujut unnuktovaksuit aksarnigarilauktatik Filisterit Judablo nunanginit pivlugit.

¹⁷ Davidiblo ullimarpait allajalernermit uvlub aipangata unnunga tikkilugo, ᴋemâjokalaungimat attautsemiglonêt, angutit inuosuktut 400 dit assinginik, Kamelinut ikkisâdlartut ᴋemâlutiglo.

¹⁸ Taimak Davidib Amalekiterit aksarnigarilauktangit tamaita piulivait nulliaᴋotingnelo;

¹⁹ Kingomajaujoᴋalaungilarlo mikkijomiglonêt, angijomiglonêt, ernermiglonêt, pannermiglonêt, perᴋomiglonêt sunamiglonêt ivajârlauktanginik. Davidib tamaita uttertipait.

²⁰ Davidiblo saukat, tuktuvaillo tiguvait, nergjutillo ungorpait, oᴋarpullo: Tamadsa Davidib aksarnigarijangit.

²¹ Davidelo angutinut 200 dinut merngortorluarlauktunut Davide malligungnarlugo, Besoriblo kôngane nokkarlauktunut tikkimat, annilerput Davide innugatsuillo illagijangit pachreartorlugit. Davidiblo innuit kaglilerpait salutilugillo illanaᴋarlune.

²² Tagva innuit kassêtut kuksalaitullo, Davidib illagilauktangita akkornganêtut, kiovut oᴋarlutiglo: Aularᴋattigilaungimattigut, tunitsiviojuksaungilit aksarnigaujunit piulilauktaptingnit. Nalliatale nulliane ᴋittornganelo tassiorligit aularlunelo.

²³ Tagva Davide oᴋarpok: Taimailiortuksaungilase ᴋattangutikka Nalekab tunnilauktangit uvaptingnut pitjutigellugit, sapputsilauktub uvaptingnik, tunnijilauktublo sorsuktuksoarnik taipkoninga tikkilauktunik sorsugvigijomavluta, aggaptingnut.

²⁴ Kia tamattomane nalaksarivâsse? Sorlo tapkoa sorsungnermut attersarlauktut ningersiangititut, taimaituksaugivut tapkoa perᴋutine nokᴋangajut ningersiangit, adsigêktomiglo aviktaujuksauvut.

²⁵ Tamanna nalliutomit taimanganit kingornganelo illusiôlaukpok idluarniôlunelo Israeleme, uvlok tamanna tikkidlugo.

²⁶ Davidelo Ziklagemut tikkiname, aksarnigavinit illangit tillikliutivait angajoᴋajanut Judame illanarijaminut, oᴋarlunelo: Ahâk, tagva pilliusiaᴋarpose Nalekab omigijingita aksarnigavininginit.

²⁷ Tapkoale tilliklervigivait, Bethlehemêtut, Ramotemêtut âne, Jatiremêtut,

²⁸ Aroeremêtut, Sifamotemêtut, Estemoamêtullo,

²⁹ Rachalemêtut, taipkoalo Jerahmeliterit iglugasaksoanginêtut, Keniterillo iglugasaksoanginêtut,

³⁰ Taipkoalo, Harmametut, Bor-Asanemêtut, Atachemêtut,

³¹ Taipkoa Hebronemêtut, illunanêtullo Davidib agvertarvigilauktangine anguteᴋotine illagilugit.