I Samuel 3 - Labrador Inuttitut Heritage Bible

Samuelib ᴋaikojauninganik angijorortitauninganiglo.

¹ Nukapiarlo Samuel kivgartortillugo Nalekamik Elib sângane, Gudib oᴋausingit pittaisalaukput nallautainêsalauklunelo.

² Pijoᴋalaukporlo nalliutome taipsomane Eli innangavingminetillugo, ijigiglo takpêlerpuk, takkojungnarungnailaungmat.

³ Samuelelo innarêrpok Nalekab Tempelingane, Gudib iklervingata najortangane, Gudib ᴋollinga ᴋammilerᴋârtinago.

⁴ Nalekablo Samuele ᴋaiᴋova. Tamnalo kiovok: Ahâk mânêpunga;

⁵ Elimullo akpangerpok okarlunelo: Ahâk, mânêpunga, ᴋaiᴋolaukparma. Tamnale oᴋarpok: Kaiᴋolaungilagit; innariartolermît. Ailunelo innalerpok.

⁶ Nalegak ᴋaiᴋojipsarpok: Samuele! Samuelelo makkipok ailunelo Elimut, oᴋarlunelo: Ahâk, mânêpunga, ᴋaiᴋolaukparma. Tamnale oᴋarpok: Kaiᴋolaungilagit ernîk, innariartolermît.

⁷ Samuelible Nalegak illitarilaungila sulle, Nalekablo oᴋausinginik nallojungnaititaulaungilak sulle.

⁸ Nalekablo ama pingajuanik Samuele ᴋaiᴋova. Tamnalo makkipok ailunelo Elimut, oᴋarlunele: Ahâk mânêpunga, ᴋaiᴋolaukparma. Tagva Eli mallugosukpok, Nalekab nukapiak ᴋaiᴋungmago.

⁹ Oᴋautivalo: innariartolermît, ᴋaiᴋojauniaruvillo, tagva oᴋarit: Nalegak oᴋaret, kivget tussarmat. Samuele aivok innarlunelo innarvingminut.

¹⁰ Tagva Nalegak ᴋaivok, tagvungarlunelo, ᴋaiᴋojilunelo sivurnganetut: Samuel! Samuel! Samuelelo oᴋarpok: Oᴋarit: kivget tussarmat.

¹¹ Nalegarlo Samuelemut oᴋarpok: Ahâk sunamik pinniarpunga Israeleme, tamattominga tussartub tapsoma siutigik aviojiniarmannik.

¹² Uvlorme taipsomane tikkiᴋojijomavunga Elimut, oᴋauserilauktamnik tapsoma iglunga pivlugo; pigiaromavunga najijomalungalo.

¹³ Oᴋautilaurapko erᴋartuijôjomagama taipsoma iglunganut soraijuitomik, idluitullinek pivlugo, ᴋaujimalaungmat ᴋannok ernangne piungitoâlungnik illuseᴋalaungmanik, taipsomalo kingorlugutigilaungilâklonêt.

¹⁴ Tamanna pivlugo Elib iglunga oᴋautigimarilaukpara, Elib iglomiungita idluitulliningit tamakkoa ullapᴋosertaujuksaungimatta tunnergutiksanut, tunnergutiksanullonêt nerᴋiksanik soraijunane.

¹⁵ Samuelelo innangavok uvlâk tikkidlugo, upkuarlo Nalekab iglungane upkoêrpa. Samuelele sivuravok takkotitsuk tamanna oᴋautigilugo Elimut.

¹⁶ Tagva Elib ᴋaiᴋova, oᴋarlunelo: Ernîk Samuel! tamna ᴋiovok: Ahâk, mânêpunga.

¹⁷ Tamna oᴋarpok: Oᴋausek oᴋauserijaumajok illingnut sunauva? Illangallonêt angiariniarnago uvamnut. Gudib imâglonêt imaglonêt pinniarvigilitit, oᴋautigijaumajut illanganik angigutjivigigumga.

¹⁸ Tagva Samuelib oᴋautiva tamainik, angigutjivigilungilâlo sunamik. Tamnale oᴋarpok: Nalegauvok, pinniarle namagijaminik.

¹⁹ Samuelele pivallialerpok, Nalekablo aipariva, oᴋausingitalo illangallonêt nunamut kattalungilak.

²⁰ Israelitillo illunamasiatik Danemit Bersaba tikkilugo illitarksilerput Samuele nallautaijôngmat nertornartomik Nalekamut.

²¹ Nalegarlo manamit sakkergannerpok Silome; Nalekab Samuele ingminik nellojungnaitimago Silome, Nalekab oᴋausingittigut.