I Samuel 29 - Labrador Inuttitut Heritage Bible

Davidib uttertitauninga Filisterinut.

¹ Filisterille sorsuktoᴋattigêksoaᴋotitik illunaita kattitipait Afekeme. Israelitillo tangmarterput Aineme Jesreelemêtome.

² Filisterillo angajoᴋaksoangit attunit agvertarput 100 dit 1,000 dillo illagilugit; Davidele anguteᴋotingillo kingurlerput Achiseme.

³ Tagva Filisterit angajoᴋaksoangit oᴋarput: Ebreerit tapkoa suksauvât? Achisib oᴋautivait: Tamna Davideungilâk Saulib, Israelitit attaningata kivganga, uvamnêlauktok manna Jarelo uvlullo nâlugit, sunasilaungilangalo idluitomik tapsomane taimangat ᴋemâninganit mana tikkidlugo?

⁴ Filisterille angajoᴋaksoangita ningaumajarvigivât, oᴋautilugolo: Angut taimna utterᴋoleruk nokᴋangaᴋolugolo nunamine, tillijauvigijamine illingnut, illagiluta attersarᴋonago sorsungnermut, akkerangorᴋonago uvaptingnut sorsungnerme. Sunamulle namagijaunersaujungnarajarᴋa angajoᴋaminut, pititsininganit tapsomunga angutit ukkoa niaᴋunginik?

⁵ Davideungilâk taimna, imgerutigilauktangat okigêserme: Saulib 1,000 dit ullimarlaukpait, Davidible 10,000 dit?

⁶ Tagva Achisib Davide ᴋaiᴋova, oᴋautilugolo: Sorlo mikseᴋârtomik Nalegak inôngmat, uvanga nallagorasugivagit, aularnîllo itternîllo illagilunga sorsuktoᴋattigêksoarne namagivara, idluitomiglo mallugosulaungilanga illingne, nalliutomit taimanganit tikkilauravit uvamnut manna tikkidlugo; angajoᴋaksuille namagilungilâtit.

⁷ Taimaimat utterit manna, ailutillo ullapirsauteᴋarlutit, idluitulliᴋonak Filisterit angajoᴋangita ijingita sângine.

⁸ Davidele oᴋarpok Achisemut: Sunamik pinialaukik, sunamiglo mallugosulauᴋit kivgarne, nalliutomit taimangat sângnelaurama, manna tikkidlugo, ᴋaijuksaunginama, sorsuktuksaunangalo angajoᴋama attanniub omigijinginut?

⁹ Achis kiovok, oᴋarlunelo Davidemut: Kaujimagalloarpunga, ijingmalo namagivâtit Gudib Engelingatut sorlo. Filisterille angajoᴋâksoangit oᴋalaukput: Majorarᴋattauᴋoniarnago illagiluta sorungnermut.

¹⁰ Taimaimat ᴋaupat uvlarârsukut parngnailerit igvit angajoᴋavillo kivgangit, tikkiᴋattigijatit; uvlarârsukullo, parngnailerêrupse, ᴋaulerpallo tagva aularitse.

¹¹ Taimak Davide anguteᴋotingillo uvlarârsukut parngnailerput, aularomavlutik uvlangotilugo, tikkimilutiglo Filisterit nunanganut. Filisterille majorarput Jesereelemut.