I Samuel 28 - Labrador Inuttitut Heritage Bible

Saulib unatadlarnerme Filisterinut ikajortiksasiorninganik angakome arname, ᴋoaksartitauvlunelo nallojungnaititauninganik ᴋanoêniarnerminik.

¹ Pijoᴋalaukporlo nalliutome taipsomane Filisterit sorsuktuksaksoaᴋotitik kattitimagit, Israelitit sorsugvigijartoromavlugit. Achiselo Davidemut oᴋarpok: Kaujijuksauvotit igvit anguteᴋotitillo aularᴋattaujuksaugapse illagilunga sorsuktuksaᴋattigêksoarnut.

² Davide Achisemut oᴋarpok: Atte, tukkisijuksauvotit kivgavit pinniarungnarninginik. Achis Davidemut oᴋarpok: Tamanna pivlugo udsertortingortitsomavagit niaᴋumnik, innôsera nâlugo.

³ Samuelele toᴋᴋolaukpok, Israelitillo illuêngardlutik oggurilaukpât, illijartorlaukpâllo iglugasaksoaᴋotingane Ramame. Sauliblo nallautainerluktut angakullo pêjarlaukpait nunamit.

⁴ Manna Filisterit kattimalermatta, tikkilutiglo tangmarterlutiglo Sunememe; Saulibtauk Israelitit illuêngardlutik kattitipait, tangmarterlutiglo Gilboame.

⁵ Saulible Filisterit kattimgajoksoaᴋotingit takkogamigit erksilerpok, omattingalo mungudlalerpok.

⁶ Tapsomalo Nalegak apperiva; Nalekable kiolungila, sinniktomanekullonêt, kaumaniutiksakullonêt nallautaijokullonêt.

⁷ Tagva Saule kivgaminut oᴋarpok: Kenneritse arnamik annernelingmik nallautaijungnartomik, aiᴋovlunga taipsomunga, apperilugolo. Kivgangillo oᴋarput tapsomunga, âhak Endoreme arnaᴋarpok annernelingmik nallautaijungnartomik.

⁸ Sauliblo annorâne pêrpait, assingillo attivait, ailunelo taikunga, assikitalo magguk illagivak, tikkilutiglo unnuarme arnamut, oᴋarlunelo: Nagliktara, nallautaivigilaunga annernermut nallautaijungnartomut, sakᴋêvigilungalo taipsominga oᴋautigijamnik illingnut.

⁹ Arnak oᴋarpok tapsomunga: Ahâk, ᴋaujimagalloarpotit Saulib pinniarnerilauktanginik, ᴋannok nallautainerluktut angakullo pêjarlaungmagit nunamit; sôgle tagva tarniga pititsomaviuk nullutsanut toᴋᴋotauᴋovlunga?

¹⁰ Saulible oᴋautimarilerpa Nalekame, oᴋarlunelo: Sorlo mikseᴋârtomik Nalegak inôngmat, tamana idluitulliningortitaujuksaungilak illingnut.

¹¹ Tagva arnak oᴋarpok: Kinamik sakᴋêvigijaksarivigit? Tamna oᴋarpok: Samuele sakᴋertiuk.

¹² Arnablo manna Samuel takkogamiuk nipliakivok, oᴋarlunelo Saulemut: Sôg uivêrivînga? Sauleôvotit.

¹³ Attanerlo oᴋautiva: Sivuranak, sunamik takkovît? Arnak Saulemut oᴋarpok: Gudinik takkovunga nuijunik nunamit.

¹⁴ Tamna oᴋarpok: ᴋannok tautuᴋarᴋa? Arnak oᴋarpok: Itok nuivok, annorarsimajok ullingmik Seideôjomik. Tagva Saule tukkisivok Samueleôngmat, kênanelo pûpa nunamut, opigosuklunelo.

¹⁵ Samuelele Saulemut oᴋarpok: Sôg ullapilaukpinga majoaᴋogamga paunga? Saule oᴋarpok: Kappiasudlarpunga, Filisterit sorsugvigivânga, Gudelo nûsimavok uvamnit, kiungilângalo, nallautaijokullonêt, sinniktomanikullonêt; tamanna pivlugo ᴋaiᴋojauᴋolaukpagit, ᴋaujititsiᴋovlutit uvamnut pinniaraksamnik.

¹⁶ Samuel oᴋarpok: Sôg uvanga appertsoromavinga, Nalegak nûsimangmat illingnit, omisuktungormallo illingnik?

¹⁷ Nalekab pinniarviginiarpâtit, sorlo uvapkut oᴋalaungmat, attanioviglo aksarnigariniarpa aggangnit, tunniniarlugolo Davidemut innuᴋattingnut;

¹⁸ Nalekab nippinga nalilaunginangne, ningaumajarningatalo illungertorninga namaksitilaunginangne Amalekiterinut; tamanna pivlugo Nalekab taimailiorvigilaukpâtit manna.

¹⁹ Tamanalo pivlugo Nalekab Israelitittauk illaliudlutit tunniniarpait Filisterit agganginut. Kaupat igvit ernivillo illaginiarpapsinga. Taimaktauk Nalekab Israelib sorsuktoᴋattigêksoangit tunniniarpait Filisterit agganginut.

²⁰ Tagva Saul tagvainak ochovok nettermut takkininga illunât malliklugo, ᴋoaksarutigidlalaitalo Samuelib oᴋausingit, nukkingêrotilerporlo illumine; uvlok nâlugo unnuarlo nâlugo nerrilaunginame sunamik.

²¹ Arnarlo itterpok Saulemut, takkolunelo angijomik ᴋoaksangangmat, oᴋarporlo tapsomunga: Ahâk kivgavit nippit nalelaukpa, tarnigalo pitilaukpara aggamnut, oᴋautsitit oᴋauserilauktatit uvamnut nalilaurapkit;

²² Taimak igvittauk mana kivgavit nippinga naleguk. Tamuamik ᴋakᴋojamik sâmiutsivigijomavagit, nerriᴋovlutit, nukkiksarᴋovlutillo aijungnarᴋovlutillo apᴋotigijarnut.

²³ Tamnale ᴋunnulaukpok, oᴋarlunelo: Nerrijomangilanga. Tagva kivgangita arnablo innapât, nippinginik nalikovlugo. Makkiporlo nattermit ingilunelo sinnigvingmut.

²⁴ Arnarlo nochaᴋalaukpok ᴋuinititaumajomik iglomine, tagva tuavidlune toᴋᴋopa, tigusilunelo sannaukamik, senalugolo, sêrnaᴋaranelo igava,

²⁵ Kaipalo Saulib kivgakitalo sânginut. Nerrijarêramiglo nikkoviput, aularlutiglo unnuarme.