I Samuel 27 - Labrador Inuttitut Heritage Bible

Davidib nunaᴋarninganik Ziklageme, Filisterit nunanganêtome.

¹ Davidele omattimine issumalerpok; Uvlut illangane pinniarpunga Saulib agganginut; namanersaᴋalungilak uvamnut, ᴋemâniarnimnit Filisterit nunanganut, Saule nippotjiᴋovlugo uvamnik, ᴋennerungnainiarlungalo Israelib kiglilervingine tamaine; tagva annigoiniarpunga agganginit.

² Parngnailerporlo, ailunelo angutit 600 dit, tapsomanêlauktut illagilugit Achisemut Maochib erninganut, Gathemiut attaninganut.

³ Taimak Davide anguteᴋotine illagilugit Achisemetuarpok Gathemetome, illunatik illatik illagilugit; Davidelotauk nulliaᴋotingne Ahinoame Jesreelemiok, Abigailo Nabalib nulliagilauktanga Karmelemiok illagilugik.

⁴ Saulelo oᴋautsaulerame Davidib ᴋemâninganik Gathemut, ᴋennerungnaipa.

⁵ Davidelo oᴋarpok Achisemut: Saimaneksiguma ijikpît sângangne, tagva tunnitsivioᴋolaunga inniksamik iglugasaksuit illangane nuname, tagvane nunaᴋarᴋovlunga; suna pivlugo kivgait illagilutit attanersub iglugasaksoaᴋotingane igloᴋartuksauva?

⁶ Tagva Achisib uvlorme taipsomane tunnitsivigiva Ziklagemik. Tamanna pivlugo Ziklage Judab attaninganut illingavok, uvlok tamanna tikkilugo.

⁷ Nalliunerle Davidib nunaᴋarninga Filisterit nunangane, Jareôvok attausek, takᴋillo sittamat.

⁸ Davidele anguteᴋotine illagilugit majorarpok ittârlunelo Gesuriterit, Girsiterillo, Amalekiterillo nunanginut, tapkoa itsangmit nuna tamana nunaᴋotigilaungmatsuk, Suremit Egiptene tikkilugo.

⁹ Davidible nuna sâlagingmago, angutillonêt arnallonêt innôᴋolaungilait, saukallo tuktuvaillo, siuteᴋoktôjullo, Kamêlillo, anorâllo tiguvait uttermilunelo, tikkilunelo Achisemut.

¹⁰ Achiselo oᴋalaurangat: Uvlome ittarlaungilasse? Tagva Davide oᴋarpok: Aunga Judab sikkernganut, Jerahmeeliterillo sikkernganut, Keniterillo sikkernganut.

¹¹ Davidible angutillonêt arnallonêt innôvlutik tikkiᴋolaungilait Gathemut, issumaᴋarporlo, taipkoa oᴋausiksaᴋarungnarajarput, oᴋallajungnarajarlutiglo pivluta. Taimailiorpok Davide, tamannalo illuseritsainarlaukpa nunaᴋardlune Filisterit nunangane.

¹² Tamanna pivlugo Achisib Davide okperiva, issumaᴋalunelo: Ingminik tippiluktilaukpok inuᴋotiminut Israelitinut, tamanna pivlugo kivgautsainartuksauvok uvamnut.