I Samuel 26 - Labrador Inuttitut Heritage Bible

Davidib tigusininganik Saulib ᴋallugianganik ermgusiârsunganiglo; nikkasungninganiglo Saulib inôsinganik.

¹ Sifemiulle tikkiput Saulemut Gibeamêtomut oᴋarlutiglo: Davide ijersimangilâk Hachilab ᴋakᴋarulângane sunaᴋajuitub sivurâne?

² Tagva Saule parngnailerpok, attersarlunelo Sifib sunaᴋajuitunganut, angutit innuosuktut 3,000 dit Israelemit illagilugit, Davide ᴋenneromavlugo Sifib sunaᴋajuitungane.

³ Tangmarterporlo Hachilab ᴋakᴋarulângane sunaᴋajuitub sivuranêtome, apᴋosiniub tungâne. Davidele sunaᴋajuitomêtuarpok. Takkogamelo Saulib mallingmago sunaᴋajuitomut;

⁴ Nautsertortuksanik tilliklerpok, tukkisilerlunelo Saule nallâgut tikkisimangmât.

⁵ Davidelo parngnailerpok, tikkilunelo tagvunga Saulib tangmarvigijanganut, takkolunelo Saulib innangavigijanganik, Abner Nerib erninga sorsuktuksaksoaᴋotingita angajoᴋangat illagilugo. Saule tallut illuanêlaukpok ᴋamutinut sannamajut, sorsuktuksoaᴋotingillo avatinganêdlutik.

⁶ Tagva Davide kiovlune, oᴋarpok Ahimelechemut, Hethemiomut, Abisaimullo Zerujab erninganut, Joabib nukanganut: Kia attersarᴋattigijomavânga Saulib tangmarvinganut? Abisai oᴋarpok: Uvanga attersarᴋattigijomavagit.

⁷ Taimak Davide Abisailo tikkipuk unuarme inugatsoarnut. Ahâglo, Saule innangavok sinniklunelo tallut ᴋamutit sanamajut illuane, ᴋallugiangalo kapposimavok niaᴋungata tungâne nunamut; Abnerele inugatsuillo inangavut avatâne.

⁸ Tagva Abisai Davidemut oᴋarpok: Gudib omigijit uvlome pitimava aggangnut; taimak uvanga ᴋallugiarmut attausiarlunga mangiptaromavara nunamut, aipanganik pijariaᴋarᴋonago.

⁹ Davidele Abisaimut oᴋarpok: Asserorniarnago pît; kiale aggane illijomavagit Nalekab saimartitanganut pitlartauniaranelo?

¹⁰ Davide oᴋapsarivok: Sorlo mikseᴋârtomik Nalegak inôngmat, Nalekab annaulungipago, piviksangalonêt tikkilungipat toᴋᴋoᴋovlugo, sorsungnermullonêt ailune toᴋᴋotaulungipat,

¹¹ Nalekab uvamnit ungasiktiliuk, aggakka illijaksarigapkit Nalekab saimartitanganut. Taimak tigukik manna ᴋallugiak niaᴋungata tungânêtok ermgusiârsuglo, aularlauluglo.

¹² Taimak Davidib ᴋallugiak ermgusiârsuglo, Saulib niakungata tungânêtuk, tiguvâk aularlunelo; takkojoᴋalungilarlo, mallugosuktoᴋalungilarlonêt tamattominga, tuppalertoᴋangilarlonêt; siningnermut ittijomut, Nalekamit pijomut tikkitaulaungmatta.

¹³ Davidelo manna akkianut tikkisimagame, nangeriartorpok ᴋakᴋab nuvuanut allivasiktomit, sivitolaungmat akkorngane;

¹⁴ Kuᴋugudlarvigivaillo inugatsuit Abnerelo, oᴋarlunelo: Tussarlungilatît Abner? Abnerelo kiovok oᴋarlunelo: Kinauvît, attanek taimak ᴋudlarvigigangne?

¹⁵ Davidelo Abneremut oᴋarpok: Angutaulungilatît? Kialo nalligivâtit Israeleme? Sôgle sapputilaungikiuk angajoᴋajet attanek? Inugatsuit illangat ittersimangmat, angajoᴋajet attanek asseroromavlugo.

¹⁶ Namalungilarle taimailiorlauravit. Sorlo Nalegak mikseᴋârtomik innôngmat, ᴋittorngauvose toᴋᴋomut, angajoᴋâse Nalekab saimartitanga sapputilaunginapsiuk. Takkolerit manna manêpuk attaniub ᴋallugianga ermgusiârsungalo, niaᴋungata tunganêlauktuk.

¹⁷ Tagva Saulib Davidib nippinga illitarilerpa, oᴋarlunelo: Tamanna igvit nippigingiᴋiuk ernîk Davide? Davide oᴋarpok: Nippiga tagva, nalegâk attanek.

¹⁸ Oᴋapsarlunelo: Sôg nalekama kivgane taimak unangmivaûk? sunaliorlauᴋik? Sunamiglo idluitomik pittaᴋarka aggamne?

¹⁹ Taimak tussarittôk manna, nalegâk attanek, kivgame oᴋausinginik: Nalekab kajungertipattit akkerartorlunga, tagva tunnergutiksamik nerᴋiksamik naimalerle; innuble ᴋittorngangit taimailiorpatta, tagva ominarsijaulit Nalekab sângane, uvlome ajiktoraminga, Nalekab kingormgutijanganêtsungnanginama, oᴋarlutiglo: Ailerit kivgartorlutillo Gudib assinginik.

²⁰ Tagva manna auga kovijauniarane nunamut Nalekab kênangata sângane. Israelib attaninga aularsimagame ᴋomaujak attausênak ᴋenneromavlugo, sorlo niksartok tupjartauvangmat ᴋakᴋane.

²¹ Saulelo oᴋarpok: Idluitullilaukpunga, ᴋailaungmît ernîk Davide; mattoma kingorngane idluitullivigijomairpagit; tarniga uvlorme tamattomane ivlerijaulaungmat, ijikpît sângangne. Ahâk sillaidlunga illisimaidlarlungalo pinniarlaukpunga.

²² Davide kiovok oᴋarlunelo: Ahâk, attaniub ᴋallugiaᴋotinga mânêpok; innuosuktut illangat ovungalerle ailugolo.

²³ Nalekable illunaita attunît akkiniaromârpait, idluarningit okperningillo malliklugit, Nalekab uvlome tunnilaungmattit aggamnut, uvangale aggakka illijomalaungilakka Nalekab saimartitanganut.

²⁴ Sorlolo uvlome tarnît angijônasugijaulaungmat ijimnut, taimak tarniga angijônasugijaule Nalekab ijikita sângangne, piulilingalo kappianartunit tamainit.

²⁵ Saule Davidemut oᴋarpok: Saimartitaulerit ernîk Davide; pinniarniarpat namaksitiniarlugolo. Davidele aularpok apᴋosinermine. Saulelo utterivok nunaminut.