I Samuel 25 - Labrador Inuttitut Heritage Bible

Samuelib toᴋᴋunganik. Davidib kiksartitauninganik Nabalemut, ullapirsartauninganigle Abigailemut. Davidiblo nulliangningninganik.

¹ Samuelelo toᴋᴋovok, Israelitillo illunamasiatik kattimalerput oggorilugolo, illijartorlâllo iglungane Ramamêtome. Davidele parngnailerpok, attersarlunelo Paranib sunaᴋajuitunganut.

² Anguteᴋalaukporlo Maoneme, pinniarviᴋartomik Karmeleme; angullo tamna perᴋutevaksoaᴋalaukpok, saugaᴋuteᴋarpok 3,000 dinik, tuktungajoᴋuteᴋalarmelo 1,000 dinik. Pijoᴋalaukporlo manna saugaᴋotine sallingmagit Karmeleme.

³ Atteᴋalaukporlo Nabalemik, nulliangalo atteᴋarpok Abigailemik, arnaulaukporlo sillatôjok kênatsiariktorlo; angulle taimna mangaitolaukpok kassêtolunelo pinniarnermine, Kaleblo kinguvanginit pilaukpok.

⁴ Davidelo sunaᴋajuitome tussarame Nabalib saugaᴋotine sallingmagit;

⁵ Tilliklerpok innuosuktunik tallimaujortunik, oᴋarlunelo tapkonunga: Majoraritse takpaunga Karmelemut; Nabalemullo tikkigupse tagva pivlunga illanaᴋarluse salutisiuk,

⁶ Oᴋarluselo: Pilloringnartoᴋarle, ullapirsautib illagilitit, iglomioᴋattitillo illunaita, pigijattillo tamaita!

⁷ Tussarlaukpunga sallijeᴋaravit saukanik. Mianerijoᴋotitit pigijatit, illagilaukpâtigut, mittautigilaungilavut, kingumaklilaungilallo sunamik unnurninginit, nunaᴋarlutik Karmeleme.

⁸ Innuosuᴋotitit apperikit tamanna pivlugo, tapkoa oᴋautiniarpâtit; innuosuktullo ukkoa saimaneksilit ijikpit sângangne, tikkisimagapta uvlorme idluartome. Kivgatit ernîllo Davide tunnitsivigikit aggakpit nachvarungnartanginik.

⁹ Davidiblo innuosuktoᴋotingit tikkinamik tagvunga, oᴋautsillo tamakkoa tamaita oᴋauserijarêramigit Davide pivlugo Nabalemut, nippangerput.

¹⁰ Nabalible Davidib kivgangit kiovait oᴋarlunelo: Davide taimna kinauva? Isaiblo erninga taimna kinauva? Kivget tapkoa unnuksivalliavut manna angajoᴋamingnit ᴋemâjut.

¹¹ Kakᴋojakotikka, immerlo nerᴋillo sallijoᴋotimnut toᴋᴋolauktakka, tigujaksarinajarpakka, tunnilugillo innungnut tapkonunga illitaringitamnut, nakit pingmangatta?

¹² Tagva Davidib innuosuktoᴋotingit sangulerivut apᴋotigijamingnut, tikkinamitsuglo, tamakkoninga tamainik oᴋautivât.

¹³ Tagva Davide anguteᴋotiminut oᴋarpok: Illunase attunit saviksoase tapseruserutigisigik makkitipsingnut. Illunatiglo saviksoatik tapseruserpait. Davidelo tapseruserpok saviksoaminik makkitiminut, angutillo 400 dit aularlutik mallikpât takpaunga; 200 dille paivut perᴋutine.

¹⁴ Inuosuktulle illangata Abigaile Nabalib nullianga oᴋautiva oᴋarlune: Ahâk Davide kivgartortunik tilliklilaukpok sunaᴋajuitomit, angajoᴋavut salutilugo; tapsomale kinangagilaukpait.

¹⁵ Taipkoalo piutsialauralloarput uvaptingnut, mittautigilaungilâtigut, kingomaklilaungilagut sunamik kattimgojoᴋotipta unurninginit taipkonane agvertarluta naternamêdluta.

¹⁶ Avaluksoatitut illingalaukput uvaptingnut uvlotillugo unuarmelo, saukanik mianersitilluta taipkonane.

¹⁷ Kammatsiarit manna, takkolutillo pinniaraksarnik, nallonangilak kannoêtoᴋarniarmat angajoᴋaptingnut, iglunganullo illunânut; angutauvorlo kuksalaitok, oᴋautjanêtok.

¹⁸ Tagva Abigaile tuavilerpok tigulugillo ᴋakᴋojat 200 dit, illulerᴋutiglo magguk Weinetalik, saukallo igamajut tallimat, oktutillo tallimat sannaugaktagit, Weiniblo paungangit kattingajut pannertut 100 dit, Feigillo 200 dit, ikkitipaillo siuteᴋoktôjunut.

¹⁹ Inuosuktoᴋotiminullo angutinut oᴋarpok: Sivorlilersinga, ahâk, kingorngane kainiarivunga. Uinelo Nabal oᴋautilaungila tamattominga.

²⁰ Siuteᴋoktôjomelo ablangatillugo, attersartillugolo ᴋakᴋab tachaliningane; ahâk, tagva Davidib anguteᴋotingitalo pârpât, tikkivigivaillo.

²¹ Davidele oᴋalaukpok: Atte, sullinanga sapputilaukpakka tamaita taipsoma pingit sunaᴋajuitome tamattomane, kingomaklilaungimat sunamik perᴋutiminit; taipsomale ajungitullinera akkiniarutigiva uvamnut idluitomut.

²² Gudib tamattominga, anginersamiglo Davidib omigijingit pinniarvigiligit, taimna ᴋaulerᴋârtinago amiakoᴋarᴋogupko attautsemik innungmik omajomiglonêt, perᴋutinginit pigijanginit tamainit.

²³ Abigailiblo manna Davide takkogamiuk akᴋasârpok siuteᴋoktôjomit, pamakterlunelo Davidib sângane, kênane pûvlugo, opigosuklunelo nuname.

²⁴ Pamakterlunelo ittigganginut, oᴋarlunelo: Adjai, nalegâk, idluitullinek tamanna uvanga pigilago, kivgaillo oᴋalerle siutikpît sângangne, kivgavillo oᴋausingit tussarkit.

²⁵ Nalekama omattine torartiniarnago Nabalemut omunga, angumut kuksalaitomut, sillaitôngmat sorlo attinga tukkeᴋarmat, sillainerlo taipsomanepok. Uvangale kivgait nalekama innuosuktoᴋotingit takkolaungilakka tillilauktatit.

²⁶ Mannale nalegâk, sorlo mikseᴋârtomik Nalegak inôngmat, sorlolo miksekârtomik tarnît inôngmat, Nalekab agviarlaukpâtit, tikkiᴋonak aungmut tamattomunga, aggaktillo piulilaukpait. Mannalo Nabaletut îlertuksauvut omigijitit, idluitullijomajullo nalekamnut.

²⁷ Mânepok saimanartok kivgavit ᴋaitanga nalekamnut, tamanna innuosuktunut tunnileruk nalekama agvertarᴋattigijanginut.

²⁸ Kivgait issumagijungnaivigiuk idluitullinermik tamattominga. Nalekab nalegara sannaviginiarmago iglomik soᴋᴋosijuitomik, Nalekab unatadlarninginik aulatsigavit; idluitomiglo nachvartoᴋarniarane illingne, innôtsit nâlugo.

²⁹ Inungmiglo makkitajoᴋarniarpat unangmijomavlutit, tarnîllo pinnasuarlugo; tagva nalekama tarninga ᴋellaksorᴋassiutijaumaniarpok innôjut kippitanganut Nalekame Gudingne; omigijivillo tarninga ajuktartaujomârpok ajuktaumut.

³⁰ Nalekab nalegara ajungitunik tamainik oᴋautigilauktaminik illingnut pinniarviginiarpago, perᴋojiniarpallo attannioᴋovlutit Israelemut,

³¹ Tagva nalekama omattinganut apporviksauniangilak, sinaungajutiksauniangilarlo, aungmik kovisilaunginavit pitjuteᴋarnak, illingniglo nangminernik ikajorlaunginavit. Tagva Nalekab nalegara ajungitulliviginiarpa, kivgallo erkaumajomârpat.

³² Tagva Davide Abigailemut oᴋarpok: Nalegak Israelib Gudinga nertortaule, uvlorme tamattomane tilliklerlauktok illingnik, pachrearᴋovlutit uvamnik.

³³ Oᴋalânitillo saimanartôlît, igvillo saimartitaulerit uvlome agviarlauramga, tikkiᴋonnanga aungmut, piuliklerᴋonnanga uvamnik, aggamnut nangminimnut.

³⁴ Ahamarik, sorlo mikseᴋârtomik Nalegak inôngmat agviartiga, idluitulliᴋonnanga illingnut, tuavilutit pachrearajarlaungikumga, tagva Nabalemut amiakoᴋarajangilak uvlârme tamattomane attautsemik innungmik omajomiglonêt.

³⁵ Taimak Davidib tiguvait tapsoma agganginit ᴋailauktangit tapsomunga, oᴋautilugolo: Ullapirsauteᴋarlutit majorarit iglungnut; ahâk, nippît nalalaukpara, kinaunîllo kamagivara.

³⁶ Abigaile Nabalemut tikkimat, ahâk, tagva nerrimartitsijarêrpok iglomine, attanniub nerrimaraksangatun îtomik, omattingalo serridlalaukpok illumine, talladlarporlo. Tapsomale oᴋautilungila sunamik, mikkijomiglonêt angijomiglonêt, ᴋaulerᴋârtinago.

³⁷ Kaulermalle Weinelo Nabalemit annisimangmat tagva nulliangata oᴋautiva taimaitomik. Tagva omattinga timingane toᴋᴋolerpok, ujarkatun îlerdlune.

³⁸ Uvlullo tallimaujortolermatta Nalekab annauva toᴋᴋoᴋovlugo.

³⁹ Davidele tamattominga tussarame Nabale toᴋᴋolerêrmat oᴋarpok: Nalegak nertortaule mittautigijaunimnik akkiniaruteᴋalauktok Nabalemik, kivganelo sapputilaungmago idluitullinermit; Nalekab Nabalib idluitullininga tamana akkiniarutigilaungmago niaᴋoanut. Davidelo tilliklerpok Abigailelo oᴋautsauᴋova nullianigomagamiuk.

⁴⁰ Davidible kivgangit Abigailemut tikkinamik Karmelemut, oᴋarᴋattigivât, oᴋarlutiglo: Davidib tillilaukpâtigut, nullianigomangmattit.

⁴¹ Tamna nikkovilerpok, kênanelo pûvlugo nunamut, opigosukpok oᴋarlunelo: Ahâk kivget mânepok, kivgartorᴋovlugo nalekama kivganginik, ittigganginiglo ubvarᴋovlugo.

⁴² Abigailelo tuavilaukpok parngnailerlunelo siuteᴋoktôjorlo ablangavigiva, uigasuillo tallimat kivgarijane illagilugit, malliklugillo Davidib tillilauktangit, nulliangolerlunelo tapsomunga.

⁴³ Davidiblo Ahinoametauk Jesreelmiok nullianikpa, tamarmiglo nulliarilaukpâk.

⁴⁴ Saulible pannine Michale, Davidib nullianga, tunniva Faltimut, Laisib Galimiub erninganut.