I Samuel 24 - Labrador Inuttitut Heritage Bible

Davidib nikkasungninganik Saulemik ᴋairosungme.

¹ Davidelo aularlune tagvangat majorarpok, Engediblo ᴋairosunganêtuarpok.

² Saulelo uttermat Filisterinit tagva oᴋautsaulerpok: Ahâk, Davide sunaᴋajuitomêpok Engedimik attelingme.

³ Sauliblo angutit innuosuktut 3,000 dit Israelitinit illunainit tiguvait, ailunelo taikunga, Davide anguteᴋotingillo ᴋenneriartorlugit tuktungajut ᴋairtungine.

⁴ Tikkinamelo saukat mianerijauvinganut apᴋosiniub sennianetunut ᴋairosukarpok tagvane, Saulelo itterpok, ittikkane ulligomavlugit; Davidele anguteᴋotingillo ᴋairosub ᴋinguane iksivavut.

⁵ Tagva Davidib anguteᴋotingit oᴋarput tapsomunga: Ahâk, tagva uvlok, Nalekab oᴋautigilauktanga illingnut: Ahâk, omigijit tunnijomavara aggangnut, pinniarvigilugo pikovlutit namagijarnut. Davidelo nikkovipok, terrêsarlunelo Saulib ullingata terreᴋunganik kippisivok.

⁶ Kingornganele omattinga tiglitâlerpok, Saulib ullingata terreᴋunganik kippisimagame.

⁷ Oᴋarlunelo anguteᴋotiminut: Tamanna Nalekab ungasiktiliuk uvamnit, taimailiortuksaugama, aggakka illilugit angajoᴋamnut, Nalekab saimartitanganut; Nalekab saimartitaringmago.

⁸ Davidib anguteᴋotine innerterpait oᴋautsinut, akkerartorᴋolungilaillo Saulemut. Saulele parngnailerpok ᴋairosungmit annilune, pissuglunelo apᴋosinerme;

⁹ Kingorngane Davidetauk parngnailerpok, anilunelo ᴋairosungmit, Saulelo kingornganit nipliarvigiva oᴋarlunelo: Angajoᴋâk attanek! Saule ᴋêviarpok takkolunelo kingunerminut. Davidiblo kênane pûpa nunamut, opigosuklunelo;

¹⁰ Oᴋarlunelo Saulemut: Sôg innuit oᴋausingit nalikpigît oᴋartut: Davidib ᴋannoênît pinasuarpâ?

¹¹ Ahâk, uvlorme tamattomane ijikik takkovuk, Nalekab uvlome tunnilaungmattit aggamnut ᴋairosungme, oᴋartoᴋalaukporlo, toᴋᴋotaksarigapkit. Kissiane nikkagijaulaukpotit oᴋalaurama: Aggakka illijomalungilakka angajoᴋamnut, Nalekab saimartitaringmago.

¹² Atâtak, takkolerittôk ullikpît terreᴋovininganik aggamne, toᴋᴋotsomalaungilagit ullikpît terreᴋunga kippilaurapko. Illitarksilerit takkolutillo, idluitoᴋalungimat, tappanermiglonêt aggamne. Idluitullivigilaungilagittauk; igvillo tarniga udlapat pêjaromavlugo.

¹³ Nalegak idluarsaijôniarpok uvangalo igvillo akkonaptingne, pivlungalo kiglugviginiarpâtit; aggangmale aktoraksaringilâtit.

¹⁴ Sorlo oᴋausiôvaktok nutaungitok malliklugo oᴋartoᴋarmat: Gudeᴋangitunit illutsit piungitut pivut. Aggamale aktoraksaringilâtit.

¹⁵ Kina malligasuarpiûk Israelib attanninga? Kina udlaᴋiuk? Kingmek toᴋᴋungajok, ᴋomaujak attausênak.

¹⁶ Nalegak idluarsaijôle, idluarsailunelo uvangalo igvillo akkonaptingne, takkosarlunelo, illinganeralo âᴋiksorliuk, piulilingalo aggangnit.

¹⁷ Davidiblo oᴋautsit taimaitut oᴋauserijarêrmagit Saulemut, Saule oᴋarpok: Tamanna igvit nippigingiᴋiuk ernîk Davide? Saulelo niplilerpok ᴋêalunelo,

¹⁸ Oᴋarlunelo Davidemut: Igvit idluarnersauvotit uvamnit. Igvit idluartullivigilaukparma, uvangale idluitullivigilaukpagit.

¹⁹ Uvlomelo ᴋaujitilaukparma kannok ajungitullivigilauramga, Nalekab pitilaungmanga aggangnut, igvillo toᴋᴋolaunginamgalonêt.

²⁰ Kannok nalliata omigijine naipiguniuk aularᴋonajaralloarᴋauk apᴋotikut ᴋanoêngitokut? Nalekab ajungitomik akkiniarlitit, uvlome piniarlauktat uvamnut pivlugo.

²¹ Ahâglo manna, nallungilanga attaningoromâravit, Israeliblo attaniovinga aggangnêpok.

²² Tagva manna oᴋautimarilaunga Nalekab sângane, pêjaiᴋonak kinguvamnik kingunapkut, attimniglo nungutsiᴋonak, atâtama iglomioᴋattinginit.

²³ Davidiblo Saule oᴋautimarilerpa. Tagva Saule angerarpok. Davidele anguteᴋotingillo majorarput ᴋairtunit imnaksoarnut.