I Samuel 23 - Labrador Inuttitut Heritage Bible

Davidib piuliklerninganik iglugasaksoarnik Kegilamik attelingnik Filisterinit, kiggotigijauninganiglo, piulijauninganiglo.

¹ Davidelo oᴋautsaulerpok: Ahâk Filisterit Kegilamiut sorsugvigilerpait, aksarnigarilugillo ᴋakᴋojaksalliorvingit.

² Tagva Davidib Nalegak apperiva oᴋarlunelo: Aijuksauvîk tagvunga, Filisterillo taipkoa ullimârlugit? Nalegarlo Davidemut oᴋarpok: Ailerit tagvunga, Filisterillo ullimârniarpattit, Kegilamiullo piuliniarpattit.

³ Angutille Davidemêlauktut oᴋautivât: Ahâk, sivuravogut tamâne Judame, aijomalutalo Kegilamut Filisterit kattimgajoksoanginut.

⁴ Tagva Davidib Nalegak ama apperiva; Nalekablo kiova oᴋarlunelo: Atte, attersarit Kegilamut, Filisterit tunnijomagapkit aggangnut.

⁵ Taimak Davide anguteᴋotine illagilugit aularpok Kegilamut, Filisterillo sursugvigivait, nergjuteᴋotingillo aularutivait, ullimarpaillo angijomik. Taimak Davidib Kegilamiut piulivait.

⁶ Abjatharele, Ahimelechib erninga ᴋemâgame Kegilamut Davidemut, ikkiak neksarpa unnunga.

⁷ Tagva Saule oᴋautsaulerpok, Davide Kegilamut tikkisimangmat, oᴋarlunelo: Gudib tunnimava aggamnut, pallangairudsaumangmat, iglugasaksoarnut tikkisimangmat, upkoaksoalingnut pallangairuservingnut sanneroangnullo pallangairtaumajunut.

⁸ Sauliblo innugatsuit illunaita ᴋaiᴋojauᴋovait sorsungnermut unnunga Kegilamut, illujikovlugit Davidemik anguteᴋotinginiglo.

⁹ Davidele mallugosulerame Saulib idluitomik issumagingmago, oᴋarpok ajochertuijomut Abjatharemut: Ikkiak ᴋaitsuk.

¹⁰ Davidelo oᴋarpok: Nalegak Israelib Gudinga, kivgait tussarlaukpok, Saule pinnasuarmat tikkitsomavlune Kegilamut, iglugasaksuillo asseroromavlugit pivlunga.

¹¹ Kegilamiut pititsomarpânga taipsoma agganginut? Saulelo attersarniarᴋâ sorlo kivgait tussarlaungmat? Tamattominga Nalegak Israelib Gudinga kivgait nallojungnairtilauruk. Nalegarlo oᴋarpok: Attersarniarpok.

¹² Davide oᴋarpok: ᴋegilamiulle uvanga anguteᴋotikkalo pitiniarpattigut Saulib agganginut? Nalegak oᴋarpok: Ahaila.

¹³ Tagva Davide parngnailerpok, anguteᴋotine illagellugit 600 diolauktut, aulârlutiglo Kegilamit, agvertarlutiglo namut sappingitamingnut. Saule manna oᴋautsaulerame Davide Kegilamit annigoilermat, aularane nokᴋangalerpok.

¹⁴ Davidele sunaᴋajuitomêtuarpok ᴋairosungme, ᴋakᴋametuarlunelo Sifib sunaᴋajuitungane. Saulible ᴋennitsainarpa innôtsine nâlugo, Gudible tunnilaungila tapsoma agganginut.

¹⁵ Davidelo takkovok, Saule aularsimangmat inôsinga nungutsomavlugo. Davidele Sifib sunaᴋajuitunganêlaukpok nappartune.

¹⁶ Tagva Jonathan Saulib erninga parngnailerpok, ailunelo Davidemut nappartunut, aggangillo pitsartutipait Gudeme;

¹⁷ Oᴋarlunelo tapsomunga: Sivuraniarnak, atâtama Saulib aggangita nachvarniangilâtit, attaningoromârpotillo Israelitinut, tagva uvanga tugliojomavunga illingnut; tamattominga atâtaga ᴋaujimatsiarivok.

¹⁸ Angerᴋattigêkpuglo Nalekab sângane; Davidelo nappartunetuarpok, Jonathanele angerarivok.

¹⁹ Sifemiulle majorarput Saulemut Gibeamut, oᴋarlutiglo: Davide ijersimangilâk uvaptingne kairosuksoarme nappartunetome, Hachilab ᴋakᴋarolângane, tallerpianetome sunaᴋangitome?

²⁰ Taimak attanek manna ᴋailune attersarle omattime pijomajanganut; tagva uvagut unertutigijomavavut attaniub agganginut.

²¹ Tagva Saule oᴋarpok: Saimartitauleritse Nalekamut, napkigilaurapsinga.

²² Taimak aileritse manna, nellunginersaulerasuaritselo sulle, ᴋaujimaᴋovluse, takkoluselo nane ittiggangita innigilauktanginik, kialo takkolaungmangago; oᴋautsaumagama pingitsertormat.

²³ Ullernairtuileritse, nautsertorluselo inninik illunainik ijervigijanginik, ᴋailermititselo uvamnut ᴋaujimamarikupse; tagva illagijomavapse. Nunamepat tagva kênajaromavara 1,000 diokattartut Judametut akkorngane.

²⁴ Tagva parngnailerput ailutiglo Sifemut Saulib sivurngane. Davidele angutingillo Maonib sunaᴋajuitunganêlaukput, natername sunaᴋajuitub tallerpiane.

²⁵ Saule anguteᴋotingillo manna aularmatta ᴋenneromavlutik, tagva Davide oᴋautsaulerpok tamattominga, attersarporlo ᴋairtomut, nokᴋangalunelo Maonib sunaᴋajuitungane. Saulib tamanna tussaramiuk, Davide udlapa Maonib sunaᴋajuitungane.

²⁶ Saulelo anguteᴋotine illagilugit aivok ᴋakᴋab uvinganingata igluane, Davidelo anguteᴋotinelo illagilugit ᴋakᴋab uvinganingata ittiviane. Davidele tuavilukarmat Saule annigoromavlugo, tagva Saulib anguteᴋotingitalo Davide anguteᴋotingillo illumavait, tigujomavlugit.

²⁷ Tikkitoᴋarporle tillijaujomik Saulemut, oᴋartomik: Tuavitit, ᴋailutillo, Filisterit ittâsimangmatta nunamut.

²⁸ Tagva Saule uttilerpok udlaningnermit Davidemik, ailunelo Filisterit pachrearlugit; tamanna pivlugo nuna tamna taijauvok Sela Mahelkot.