I Samuel 22 - Labrador Inuttitut Heritage Bible

Saulib toᴋᴋotsininganik Doegekut ajochertuijunik 85 ginik.

¹ Davidelo aularpok tagvangat, ᴋemâlunelo Adullamib ᴋairosunganut. Kattangutingita atâtamelo iglomioᴋattingita illunatik tamanna tussaramitsuk, tikkilerput tapsomunga kannunga taikunga.

² Angutillo sunatuinait, kappianartomêlauktut, akkiliksaᴋartullo, omatteᴋartullo kiksartunik, kattimalerput tapsomunga, tamnalo angajoᴋagivât; angutillo 400 diokassait tapsomanelaukput.

³ Davidelo aularpok tagvangat Mizpemut Moabiterit nunanganêtomut, oᴋarlunelo Moabiterit attaninganut: Atâtaga anânagalo itterlit annilillo illipsingne, tukkisilerᴋârtinanga sumik Gudib pinniarvigijomârmangmânga.

⁴ Tagvaneᴋovaillo Moabiterit attaningane, tapsomanêᴋovlugit Davide ᴋairosuksoarmêtillugo.

⁵ Nallautaijorle Gade Davidemut oᴋarpok: Kairosuksoarmêtsainarniarnak, aularille tikkilutillo Judab nunanganut. Tagva Davide aivok, tikkilunelo nappartunut Haretemik attelingnut.

⁶ Saulelo tussarpok Davide angutillo illagijangit sakᴋermatta. Saulelo nunaᴋarame Gibeame nappartolingme Ramametome, ᴋallugiak tigumiarpa aggangminut, kivgangillo illunatik nangerput saniane.

⁷ Tagva Saule oᴋarpok kivgaminut sanniane nangertunut: Illipse Jeminib ᴋittorngangit tussaritse, Isaib erningata illunase tunitsiviginiaralloarpasse perorsêvingnik, ᴋakᴋaniglo Weineliksanik, angajoᴋangortiniarluselo 1,000 dinut, 100 dinullo?

⁸ Angerᴋattigêlaurapse akkerartorlunga, ᴋaujititsijoᴋangilarlo tamattominga siutimnut, ernermatauk Isaib erninga angerᴋattigilaungmago. Akkunapsingnêtoᴋangilâk kinamik kangârtomik pivlunga nallonaijaiᴋovlugo siutimnut? Ernerma kivgara akkerartortimago uvamnik; unangmiklerᴋovlugo uvamnik, sorlo sakᴋersimangmat.

⁹ Tagva Doeg Edomiok, Saulib kivgangita sanniane nangertok kiovok oᴋarlunelo: Isaib erninga takkolaukpara, Nobemut Ahimelechemut, Ahitob erninganut tikkilaungmat.

¹⁰ Taipsoma Nalegak apperilaukpa pivlugo, tunnitsivigilâlo nerᴋiksanik, Goliathiblo Filistereôjub saviksoanganik.

¹¹ Tagva Saule tilliklerpok taikunga, ᴋaiᴋojauᴋolugolo Ahimeleche ajochertuijok Ahitob erninga, atâtangatalo iglomioᴋattingit ajochertuijut Nobeme illunaita. Kaivullo illunatik attannermut.

¹² Saulelo oᴋarpok: Tussarit igvit Ahitob erninga. Tamna oᴋarpok: Mânepunga Nalegâk.

¹³ Saulelo oᴋarpok tapsomunga: Sôg angerᴋattigêlauᴋitik akkerartorlunga, igvit Isaiblo erninga, ᴋakᴋojamiglo saviksoarmiglo tunnitsivigilaurangne, Gudelo apperilaurangne pivlugo, makkitatilugolo, unangmiklerᴋovlugo uvamnik, sorlo sakᴋersimangmat?

¹⁴ Abimelechib attannek kiova, oᴋarlunelo: Kinalo kivgavit illunatik akkorngane Davidetut nertornartôva, ningaungôvlune attannermut, nalatsiatsainarlutillo pijok, opigijaulunelo iglungne?

¹⁵ Uvlomele pigiartainarlauᴋîk Gude apperilugo tamna pivlugo? Tamanna ungasigle uvamnit. Attannek taimaitomik illijiniarane kivgaminut atâtamalonêt iglomioᴋattinginut; kivgait tamakkoninga tamainik, mikkijomiglonêt, angijomiglonêt ᴋaujilaungimat.

¹⁶ Attannerle oᴋarpok: Ahimelech toᴋᴋotaksauvotit, igvit atâtavillo iglomioᴋattingit illunamasiatik.

¹⁷ Attannerlo oᴋarpok sorsuktuksaᴋotiminut sanimine nangertunut: Sanguleritse toᴋᴋotsiluselo Nalekab ajochertuijoᴋotinginik; aggangitatauk Davide illagingmatsuk; ᴋaujimalauramiglo ᴋemâninganik, nallojungnaitilaungilânga tamattominga. Attaniuble kivgangita aggatik illijomalaungilait Nalekab ajochertuijoᴋotinginut tapkoa ullimârlugit.

¹⁸ Tagva attannek Doegemut oᴋarpok: Igvit sangulerit ullimârlugillo ajochertuijut. Doeg Edomitereôjok sangulerpok ullimarpaillo ajochertuijut, taimak uvlorme taipsomane angutit 85 it ikkialijartut sâtunik toᴋᴋungmatta.

¹⁹ Ajochertuijullo iglugasaksoangit Nobemik attiggit ullimârpait saviksub kênanganut, tamarmik angutit arnallo, sorrutsillo, amâmaktullo, tuktuvait siuteᴋoktôjullo, saukallo.

²⁰ Ahimelechible Ahitob erningata, erningita illangat Abjatharemik attelik annigoivok, ᴋemâlunelo Davide malliklugo;

²¹ Nallojungnaitilugolo Saulib Nalekab ajochertuijoᴋotingit toᴋᴋolaungmagit.

²² Davidele Abjatharemut oᴋarpok: ᴋaujimalauralloarpunga uvlorme taipsomane Edomiok Doeg tagvanêlaungmat, Saule tamattominga okautiniarajarmago: Uvanga passijaksauvunga atâtavit iglomioᴋattingita tarninginut tamainut.

²³ Uvamnêtuarit sivuraniarnaglo; pijugaklertuble inosimnik, innôtsittauk pijugakpa, illagellungalo piulijaujuksauvotit.