I Samuel 21 - Labrador Inuttitut Heritage Bible

Davidib kângninganik, nerrininganiglo ᴋakᴋojanik takkojaksanik; tigusininganiglo Goliathib saviksoagilauktanganik, ᴋemâninganiglo Filisterinut.

¹ Davidele Nobemut tikkipok, ajochertuijomut Ahimelechemik attelingmut. Ahimelechelo ᴋakkilarpok Davide pachrearamiuk, oᴋautivâlo: Sôg innutôvlutit illaᴋarnaglo angumik tikkiᴋît?

² Davide ajochertuijomut Ahimelechemut oᴋarpok: Attaniub sunamik perᴋolaukpânga, oᴋautilungalo: Kaujijauniarane kinamut, suna pivlugo tillilaurapkit, perᴋolauktamniglo illingnut. Nukapiaᴋotikka tillimagapkittauk maunga ikkungalonêt.

³ Peᴋarkît manna sunamik attuinaujomik? Tagva tunnitsivigilaunga aggamnut ᴋakᴋojanik tallimanik, ubvalo nachvarniartarnik.

⁴ Ajochertuijub Davide oᴋautiva oᴋarlunelo: ᴋakᴋojatuinarmik attuinaujaᴋangilanga, ᴋakᴋojamigle ivsornaitomik; nukapitset aglertuinarajalaurunik nulliamingnik.

⁵ Davidib ajochertuijok oᴋautiva: Uvlut pingasut nâvlugit arnat avisimalaukput uvaptingnit aularᴋârnanga, nukapitsallo illulerᴋutingit ivsornailaukput; apᴋulle tamanna ivsornailungipat, tagva uvlome ivsornaititauvok illulerᴋumut.

⁶ Tava ajochertuijub tunnitsivigiva ivsornaitunik, assianik ᴋakᴋojaᴋalaungimat ᴋakᴋojanit takkojaksanit ᴋomergutigijaumajunik Nalekab sângane, ᴋakᴋojat assingit nutât illijauᴋovlugit uvlorme taipsomane, taipkoa tigujauvigilauktanganut.

⁷ Uvlormele taipsomane anguteᴋalaukpok ᴋamane palangairutsaumajomik Nalekab sângane, Saulib kivgangita illanganik, Doegemik attelingmik, Edomitereôjomik, angajoᴋaunerôjomik Saulib mianerijoᴋotinginit.

⁸ Davidelo Ahimelechemut oᴋarpok: Mâne aggangne kapputeᴋangilâk saviksoaᴋangilârlonêt? Saviksoara sakkukkalo neksarlungilakka; attaniub perᴋojangit tuavinarlaungmatta.

⁹ Ajochertuijok oᴋarpok: Goliathib Filisterib ullimarlauktavit naksarme nappartolingme Eichenik, saviksoanga ovanêpok, immusimavlune ulliksoarmut, ikkiab ungatâne. Tamna pijomagungne, tagva tiguleruk, assianik pittaᴋangimat mâne tapsomangat. Davide oᴋarpok: Adseᴋangilak, tunnilauruk uvamnut.

¹⁰ Davidelo parngnailerpok ᴋemâlunelo Saulemit, tikkilunelo Achisemut Gathemiut attanninganut.

¹¹ Achisible kivgangit oᴋarput tapsomunga: Davideôvok taimna nunab attaninga, imgerutigilauktangat, oᴋarlutiglo: Saul ullimarnilaukpok 1,000 dinik, Davidele 10,000 dinik.

¹² Davidelo oᴋautsit tamakkoa omamiutarilerpait, sivuragivalo Achise Gathemiut attaningat,

¹³ Tautunelo ablatsautipa tapkoa takkoane, aksakâtilunelo ingminik tapkoa aggangita attâne, aporlunelo upkoamut ittertarviksoarmêtomut, nuvângalo ᴋorliarpok uminginut.

¹⁴ Tagva Achise oᴋarpok kivgaminut: Ahâk takkovose angut tamna ᴋaujimangojarmat; sôg âpissiuk uvamnut?

¹⁵ Kaujimangojartoᴋarᴋîk ikkiluartunik, tamna âlaurapsiuk ovunga, sanimne tattamajarᴋovlugo? Tamna ittertuksauva iglumnut?