I Samuel 20 - Labrador Inuttitut Heritage Bible

Davidiblo Jonathaniblo illanarêngnigingnik.

¹ Davidele ᴋemâvok Najotemit Ramamêtomit, tikkilunelo, oᴋalarmelo Jonathanib sângane: Sunamik pinmarlauᴋîk? Sunamik namangitullilauᴋik? Sunamik idluitullilauᴋik atâtarnut, innôsera pinnasuarmago?

² Tamnale oᴋarpok tapsomunga: Tamanna ungasigle, toᴋᴋotaujuksaungilatit. Ahâk, atâtaga pinniarlungilak sunamik, angijomiglonêt mikkijomiglonêt, ᴋaujitilungitaminik siutimnut; sôg atâtama tamattominga angigutijaksarivânga? Taimaipallungilak.

³ Tagva Davide oᴋamarigannerpok, oᴋarlunelo: Atâtait ᴋaujimatsiarpok saimaneksigama ijikpit sângangne, tamanalo pivlugo issumavallukpok: Jonathan ᴋaujijuksaungilak tamattominga, issumajarutiginajarmago. Ahamarik sorlo mikseᴋârtomik Nalegak innôngmat, sorlolo mikseᴋârtomik tarnit innôngmat, ablorniôtuinarpok attautsemik uvangalo toᴋᴋublo akkonaptingne.

⁴ Jonathan Davidemut oᴋarpok: Pinniarvigijomavagit omattivit tussugijanganik.

⁵ Davide oᴋarpok tapsomunga: Ahâk, ᴋaupat takᴋêlauvok, attannek illagilugo iksivaᴋattaujuksauviga nerrimârvingme; ailanga tagva, natername ijerᴋovlunga uvluk pingajuak unnunga tikkidlugo.

⁶ Atâtavit apperᴋutigigumga, tagva oᴋarit: Davidib ᴋennuvigilaukpânga akpangerᴋojaujomanermik iglugaseksoaᴋotiminut Bethlehemut; illangit illunatik tagvane tunnergutiksamik tunnijingmatta, Jarine tamaine tunnijauvaktomik.

⁷ Oᴋarniarpat: Namakpok, tagva kivgat illingatsiarpok. Ningaumajalerniarpalle, tagva mallugosungniarpotit idluitomik kajusimalaungmat.

⁸ Taimak manna napkigosungnermik kivgait pinniarvigiuk; uvanga, kivgait angerᴋattigilauramga Nalekame. Idluitullineᴋarpalle illumne, tagva igvit toᴋᴋunga; sôgle âtsomavinga atâtarnut?

⁹ Jonathan oᴋarpok: Tamanna ungasigle uvamnit, mallugosuktuksaugama, atâtaga kajusimangmat idluitomik pititsivigijomavlutit oᴋautijaksarinaglo.

¹⁰ Davidele oᴋarpok: Kia oᴋautijartoraksarivinga, atâtavit oᴋumaitomik kioniarpattit?

¹¹ Jonathan Davidemut oᴋarpok: ᴋait, anilunuk naternamut ailauluk. Tammarmiglo naternaliarpuk.

¹² Jonathanelo Davidemut oᴋarpok: Nalegak Israelib Gudinga, atâtaga issumasiorupko ᴋaupat uvluglo pingajuangne, ᴋannoêngitokarpallo Davide pivlugo, tilliklerlungikumalo, tamanna ᴋaujititauᴋovlugo siutingnut;

¹³ Tagva Nalekab Jonathane pinniarvigiliuk imaitomiglonêt, imaitomiglonêt. Atâtamale idluitok namagikpago pivlutit, tagva ᴋaujititauᴋojomagivara siutingnut, ᴋemâlutillo ullapirsauteᴋarlutit aularᴋovlutit. Nalekablo illagilitit sorlo atâtaga illagilaungmago.

¹⁴ Taimailiorlungikuma, tagva Nalekab napkigosungninganik pinniarviginiarnanga innôtillungalonêt toᴋᴋotillungalonêt.

¹⁵ Nalekablo Davidib omigijingit pêjarniarpagit attunit nunamit; tagva igvit napkigosungnît pêrniarnago iglomioᴋattimnit soraijuitomik.

¹⁶ Taimak Jonathanib Davidib iglomioᴋattingit angerᴋattigivait, oᴋarlunelo: Nalegak ᴋaitauᴋojile Davidib omigijingita agganginit.

¹⁷ Jonathanelo piganerpok, oᴋautimariklugolo Davide, taimak angitigijomik nagligidlarpa; nagligigamiuk tarninetut nangmininetut.

¹⁸ Jonathanelo oᴋarpok tapsomunga: Kaupat takᴋêlauvok, tagva apperᴋutigijauniarpotit; kingomajauniaravit iksivavigivaktarne.

¹⁹ Uvlugle pingajuangne ᴋaisalaurit kanunga, ailutillo tagvunga ijervigilauktarnut sannaviub uvlungane, ingilutillo ujaraksub Aselemik attiggub tungânut.

²⁰ Tagva sanniane ᴋarkjutinik pingasunik pittiktaromavunga, sorlo nallonaikutamut pittiktarajaruma.

²¹ Ahâglo nukapiak tillijomavara oᴋarlunga: Ailerit ᴋarkjutit ᴋeneriartorkit. Nukapiamut oᴋarniaruma: Ahâk ᴋarkjutit miksiptingnêput tunnungne, aikit; tagva ᴋailerit ullapirsauteᴋarmat nangiarnartoᴋangilarlo, sorlo mikseᴋârtomik Nalegak inôngmat.

²² Inuosuktomut oᴋarniarumale: Ahâk ᴋarkjutit ikkanêput sivurângne; tagva ailerit, Nalekab aularᴋongmattit.

²³ Sunamigle igvit uvangalo oᴋarᴋattigilauktaptingne, tagva Nalegak, igvit uvangalo akkonaptingnêpok soraijunane.

²⁴ Davide ijerpok natername. Takᴋêlaulermallo attannek ingilerpok sâmut nerrimârvingmut, nerrijomavlune.

²⁵ Attannerlo ingilerêrmat innigivaktaminut illuserivaktamitut iglub sanneranganut; Jonathane nikkovilerpok, Abnerele ingilerpok Saulib sennianut. Davidelo kingomajauvok innigivaktangane.

²⁶ Saulelo uvlorme taipsomane oᴋalungilak sunamik; issumakalaukporle: Tikkitaumavallukpok sunamut, ivsornailungimat.

²⁷ Takᴋêlaub uvlungata tugliane Davide kingomajaungmat iksivavigivaktangane, Saule ernerminut Jonathanemut oᴋarpok: Sôg Isaib erninga tikkilungilâk nerrimarvingmut ikpêksarlonêt, uvlomelonêt?

²⁸ Jonathanib Saule kiova: ᴋennuvigilaukpânga Bethlehemut aijomagame,

²⁹ Oᴋarlunelo: Ailangatôk, illagêngnivut tunnergutiksamik tunnijijariaᴋarmatta iglugasaksoarne; angajungmalo nangminek perᴋolaukpânga; saimaneksiguma manna ijikpit sângangne, tagva aularomavunga ᴋattangutikka takkojartorlugit. Tamanna pivlugo tikkilungilak attaniub nerrimârvinganut.

³⁰ Tagva Saulib illungertorlune Jonathane ningaumajarvigiva, oᴋarlunelo tapsomunga: Tappatovlutit idluitoâlôjotit! nallungigalloarpunga, igvit Isaib erninga annerimagangne, igvit anânavillo piungitub nachogijaujutiksaptingnut.

³¹ Taimagle akkunêrtigijomik Isaib erninga innôngmat nuname, igvit attaniovîllo illagellutit îtsungnarniangilatit. Taimaimat tilliklerit manna, aijauᴋolugolo maunga uvamnut; toᴋᴋojuksaungmat.

³² Jonathanib atâtane Saule kiova oᴋautilugolo: Suna pivlugo toᴋᴋojuksauva? Sumik pinniarlauka?

³³ Tagva Saulib ᴋallugiak naukiutiva tapsomunga kapputijomavlugo. Tagva Jonathan tukkisilerpok atâtanga kajusimamaringmat Davide toᴋᴋotsomavlugo,

³⁴ Illungertorlunelo ningaumajarlune nikkovipok nerrimarvingmit, takᴋêlaublo uvlungata tugliane taipsomane nerrilungilak nerᴋiksamik; Davide paksarigamiuk; atâtangata taimak pitlaraksaunerarmago.

³⁵ Uvlâkut Jonathane annilerpok naternamut, Davidib tillijauvianut tapsomunga, nukapiablo mikkijub aipariva.

³⁶ Oᴋarporlo nukapiamut: Akpangerit, ᴋarkjutillo pittiksautigijakka ᴋenneriartorkit. Nukapiarlo akpangertillugo, ᴋarksok attausek pittikserutigiva ᴋollâgut.

³⁷ Nukapiarlo tikkimat tagvunga Jonathanib ᴋarkjutinik pittikservigijanganut, Jonathanib nipliutiva oᴋarlunelo: ᴋarkjutit ikkanêput sivurangne.

³⁸ Nipliutipsarpâlo: Tuavitit noᴋarniarnaglo. Tagva Jonathanib nukapiaᴋotingata ᴋarkjutit abvorpait, âlugillo angajoᴋaminut.

³⁹ Nukapiarlo nallolaukpok tamattoma tukkinganik, Jonathanele Davidelo kissimik ᴋaujimavuk.

⁴⁰ Tagva Jonathanib sakkune tunnivait nukapiaᴋotiminut, oᴋarlunelo tapsomunga: Ailerit akjarlugillo iglugasaksoarnut.

⁴¹ Nukapiak aulartuarmat, Davide nikkovipok innigijaminit seᴋᴋernganêtomit, kênanelo pûvlugo pamakterpok nunamut, pingasuêrtorlunelo opigosukpok, kunniktigêklutiglo, kugviorᴋattigêlarmiglo; Davidele piluarlune.

⁴² Jonathanele Davidemut oᴋarpok: Ullapirsauteᴋarlutit aulaurit. Tamamnuk oᴋautigimarilauktavuk Nalekab attingane, oᴋarlunuglo: Nalegak uvanga igvillo akkonaptingnele, kinguvaᴋotimalo kinguvaᴋotivillo akkorngane; tamanna soᴋᴋosijuile naksaungitomut.

⁴³ Parngnailerporlo aularlunelo, Jonathanelo iglugasaksoarnut tikkipok.