I Samuel 19 - Labrador Inuttitut Heritage Bible

Davidib annigoininganik; Saulib pinnasuarᴋattarninganik toᴋᴋotsomavlugo.

¹ Saulible ernine Jonathan, kivganelo illunaita oᴋarvigilerpait, toᴋᴋotsiᴋovlugit Davidemik. Jonathanible Saulib erningata Davide nagligidlarpa.

² Kaujitipalo tamattominga, oᴋarlunelo: Atâtama Saulib pijugakpâtit. Taimaimat udsertorit illingnik ᴋaupat tikkilugo, ergusimalutillo ijerit illingnik.

³ Annijomavungale atâtagalo nangerᴋattigijomavara natername innigijarne, pivlutillo atâtaga oᴋarᴋattigijomavara, takkoniartamniglo nellojungnaititsomavagit.

⁴ Jonathanelo idluarnerpâmik oᴋarpok atâtaminut Saulemut Davide pivlugo, oᴋautivâlo: Attaniub kivgane Davide idluitullijutiginiarnago; idluitullivigilaungimattit, pinniarningalo piutsiarpok illingnut.

⁵ Innôtsinelo ivlerilaungila, Filisterelo ullimarlaukpa, Nalekablo piulijaunermik angijoksoarmik Israelitit illunaita pinniarvigilaukpait. Tamanna takkolaukpat, kuviasutigidlalaukpallo. Sôgle auk passijaksaungitok idluitullivigijomaviuk, Davide pitjuteᴋarnak toᴋᴋotsomagangne?

⁶ Tagva Saulib Jonathanib nippinga nalekpa, oᴋarmariklunelo: Sorlo mikseᴋârtomik Nalegak inôngmat, toᴋᴋotaujuksaungilak.

⁷ Tagva Jonathanib Davide ᴋaiᴋova, oᴋautsillo tamakkoa tamaita oᴋautigilerpait tapsomunga, âpâlo Saulemut, tapsoma sânganeᴋovlugo sivurnganetut.

⁸ Sorsungneᴋalaurivorle ama; Davidiblo aularlune Filisterit sorsugvigilerpait, unnuktullo ullimarpait, ᴋemâjutigingmatsuk.

⁹ Annerneâluble Nalekamit pijub Saule tikkipa, iksivavorlo iglomine, ᴋallugiarlo tigumiarpa aggangminut; Davidele nokakseralingmik attorpok aggangminut.

¹⁰ Saulelo pinnasuarpok Davide ᴋallugiarmut mangiptaromavlugo iglub sanneranganut. Tapsomale tuaviluᴋarlune Saule ᴋemmakpa, ᴋallugiarlo iglub sanneranganut kapputivok. Davidele ᴋemâvok, annigoilunelo unnuarme taipsomane.

¹¹ Saulele kivgartortunik tilliklerpok Davidib iglunganut, udsertorᴋovlugit tapsominga, toᴋᴋotsiᴋovlugillo tapsominga uvlub ᴋaulerningane. Nulliangatalo Michalib Davide nallojungnaitipa tamattominga, oᴋarlunelo: Unuarme tamattomane tarnît piuliniangikungne, tagva ᴋaupat toᴋᴋojuksauniarpotit.

¹² Tagva Migailib igalâkut ningitipa, ailerᴋovlugo, ᴋemmâᴋovlugolo, annigoiᴋovlugolo.

¹³ Michalib innungoak tiguva, illilâlo sinigvingmut, tuktungajublo aminga illiva niaᴋoanut, ullikpâlo annorangnik.

¹⁴ Tagva Saul kivgartortunik tilliklerpok aiklerᴋovlugit Davidemik. Migaille oᴋarpok: ᴋannimavok.

¹⁵ Saulele kivgartortunik tilliklerpok Davide takkojartorlugo, oᴋarlunelo: ᴋailersiuk paunga uvamnut, aumitit illaliudlugit, toᴋᴋotauᴋovlugo.

¹⁶ Tillijaujut manna tikkimatta, ahâk tagva innungoak nellavok sinnigvingme, tuktungajublo aminga niaᴋoane,

¹⁷ Tagvale Saule Michalemut oᴋarpok: Sôg uivêrivinga, aulartilugolo omigijara, anigoiᴋovlugo? Migail Saulemut oᴋarpok: Tapsoma oᴋautilaukpânga: Aularlanga, toᴋᴋoniarpagillonêt.

¹⁸ Davidele ᴋemâvok, annigoilunelo, tikkiporlo Samuelemut Ramamêtomut, oᴋautivâlo tamainik Saulib pinniarlauktanginik tapsomunga. Samuelelo aularᴋattigiva, Najotemêtuarlutiglo.

¹⁹ Saulelo oᴋautsaulerpok: Ahâk Davide Najotemêpok Ramamêtome.

²⁰ Tagva Saule kivgartortunik tilliklerpok tagvunga, aiklerᴋovlugit Davidemik. Tapkoalo takkovait nallautaijut kattimgajut maggoit, nallautaitillugit, Samuelelo aulatsijolaukpok tapkoninga. Tagva Gudib annerningata Saulib tillijangit tikkipait, nallautailerᴋovlugittauk.

²¹ Saule tamattominga oᴋautsaulermat, tilliklerpok kivgartortunik taipkoa assinginik, tapkoalo nallautaigivut.

²² Tagva nangminek aivok Ramamut, tikkinamelo immektarviksoarmut Sekumetomut, appertsorpok oᴋarlunelo: Samuelelo Davidelo nanêᴋâk? Tagva oᴋautsauvok: Ahâk, Najotemêpuk, Ramamêtome.

²³ Aivorlo tagvunga Najotemut Ramamêtomut. Gudiblo Anerningata tikkipatauk, agvertarporlo nallautailunelo tikkiᴋârane Najotemut Ramamêtomut.

²⁴ Annorânelo pêrpaittauk, nallautailunelotauk Samuelib sângane, ussingavlunelo pamakterᴋattarpok uvlok nâlugo, unuarlo nâlugo. Tamanna pivlugo oᴋartoᴋarpakpok: Sauletauk nallautaijunut illingava?