I Samuel 18 - Labrador Inuttitut Heritage Bible

Jonathanib Davidiblo illanarêngnigingnik; Sauliblo annerudsininganik Davidemik, toᴋᴋotsinasuarninganiglo tapsominga.

¹ Oᴋarêrmallo Saulemut Jonathanib omattingata Davidib omattinga angerᴋattigiva, Jonathaniblo nagligilerpa omattinetut nangmininetut.

² Sauliblo tiguva uvlorme taipsomane, utterᴋojungnailugolo atâtangata iglunganut.

³ Jonathanelo Davidelo angerᴋattigêkpuk; nagligingmago omattinetut nangmininetut.

⁴ Jonathaniblo ulline attortane pêrpa, tunnivâlo Davidemut, taimaktauk ulliksoaᴋotine, saviksoaᴋotinelo, pittiksiᴋotinelo, tapseruteᴋotinelo.

⁵ Davidelo aularᴋattarpok namut tillijauvingminut Saulemut, sillatojomiglo illuseᴋarlune. Sauliblo angajoᴋangortipa sorsuktuksaksoaᴋattigênut; namagijauvorlo innuksoarnut illunainut, Sauliblo kivganginuttauk.

⁶ Pijoᴋalaukporle, uttermat unatadlarnermit Filisterinik, arnat Israelitit iglugaseksoanginit illunainit annisimalaungmatta attanek Saule pachreartorlugo, imgerlutik okigêserlutiglo, ᴋuviasuklutiglo, nipliajorlutiglo.

⁷ Arnallo maggoilimajut nallekarlutik imgerᴋattigêkput, nipliajorlutiglo, oᴋarlutiglo: Saulib 1,000 dit ullimarlaukpait, Davidible 10,000 dit.

⁸ Tagva Saule ningaumajadlalerpok, oᴋauserlo tamanna idluigiva, oᴋarlunelo: Davidemut tunnijilaukput 10,000 dinik, uvamnullo 1,000 dinik; attaniovik pigijomâriva.

⁹ Sauliblo Davide annujutigiva uvlormit taimangamit kingornganelo.

¹⁰ Uvlublo aipangane annernerub idluitub Gudemit pijub Saule tikkipa, nallautaivorlo iglomine. Davidele nokakseralingmik attorpok aggangminut, sorlo uvlut tamaita pivalaurame. Sauliblo ᴋallugiak tigumiarpa aggangminut,

¹¹ Naukiarpalo, issumaᴋarlunelo: Davide mangiptaromavara iglub sanneranganut. Davidible maggoêrtorlune ullorearpa.

¹² Sauliblo Davide sivurajutigiva; Nalekab illagingmago, Saulemille nusimalaukpok.

¹³ Tagva Saulib nuktipa ingminit, angajoᴋangortilalo angutinut 1,000 dinut; tamnalo aularᴋattarpok ᴋailunelo innugatsuit sivurlerlugit.

¹⁴ Davidelo sillatôjomik illuseᴋarpok pinniarnermine illunaine, Nalekablo illagiva.

¹⁵ Saule manna takkogame, taimak sillatôjunik illuseᴋarninganik, illeragiva.

¹⁶ Israelitille illuêngardlutik Judakullo Davide nagligivât, aularlutiglo utterlutiglo sivurlervigingmagit.

¹⁷ Saulelo Davidemut oᴋarpok: Ahâk, panniga angajudlek Merobe tunnijomavara illingnut, nulliangôᴋovlugo illingnut; sivurajuituinarit, aulatsilerlutillo Nalekab unatadlarninginik. Saule issumaᴋalaurame: Aggama âktoraksaringilât, Filisterille aggangita.

¹⁸ Davidible Saule kiova: Kinauvîk uvanga? Innoseralo atâtamalo ᴋittorngarêngningit sunauvât Israeleme, uvanga ningaungolertuksaugama attannermut?

¹⁹ Nalliunerle nalliusimalermat Merobib Saulib panningata tunnijaksauvia Davidemut, tunijauvok Adrielemut Meholatemiomut, tapsomunga nulliangoᴋovlugo.

²⁰ Michalible Saulib paningata Davide nagligiva. Saule oᴋautsaulaurame tamattominga oᴋarpok: Tamanna namakpok;

²¹ Tunnijomavara tapsomunga, kattaktitaujutiksanganut illingakovlugo, Filisterit agganginut tikkitauᴋovlugo. Oᴋarlunelo Davidemut: Uvlome taipsoma tuglianut ningaungolertuksauvotit uvamnut.

²² Sauliblo kivgane perᴋovait: Angigutsivluse Davide oᴋarvigisiuk, oᴋarluselo: Ahâk, attaniub ᴋuviagivâtit, kivgangitalo illunatik nagligivâtit, taimaimat manna ningaungôlerit attanermut.

²³ Sauliblo kivgangita oᴋautsit taimaitut oᴋauserivait Davidib siutikita sângangne. Davidele oᴋarpok: Tamanna mikkijonasugivissiuk ningaungôlerlune attanermut? Uvangale anguteôvunga aklujok pijariakitorlo.

²⁴ Sauliblo kivgangita tamanna unipkautilaurivât, oᴋarlutiglo: Oᴋautsit taimaitut Davidib oᴋauserilaukpait.

²⁵ Saule oᴋarpok: Imâk Davidemut oᴋaritse: Attanek tunnergusiamik pilliusiamik tussulungilak, kissiane Filisterit 100 dit amingita nuvunginik, attaniub omigijingit akkiniartauᴋovlugit. Saulib Davide kattaktinasuarmago Filisterit aggangitigut.

²⁶ Tagva kivgangita Davide oᴋautivât oᴋautsinik taimaitunik, Davidiblo tamanna idluarasugiva ningaungôlerᴋovlugo attanermut. Nalliutorlo nalaungilak sulle.

²⁷ Tagva Davide parngnailerpok, anguteᴋotinelo illagilugit aularpok, ullimarnilunelo Filisterit akkorngane angutinik 200 dinik. Davidiblo amingita nuvungit ᴋaipait, unnurningillo namaksitipait attanermut, ningaungolerᴋovlugo attanermut. Tagva Saulib pannerminik tunnitsivigiva nulliangoᴋovlugo tapsomunga.

²⁸ Saulelo takkovok mallugosularmelo Nalekab Davide illagingmago. Michaliblo Saulib panningata nagligiva.

²⁹ Tagva Saulib Davide sivuragiluarpa sulle, omigilâlo innôtsine nâlugo.

³⁰ Filisterillo angajoᴋangit aularmatta, Davide sillatunersauvlune pinniarlaukpok Saulib kivganginit tamainit, aularangatta; taimak attinga nertortaudlalaungmat.