I Samuel 17 - Labrador Inuttitut Heritage Bible

Filisterit unatadlarninganik Israelitinut, Davidib illorearninganik Goliathemik.

¹ Filisterit sorsuktuksaksoaᴋotitik kattitipait sorsungnermut, kattimalerpullo Suchome Judametome, tangmarterlutiglo Suchob Asekablo akkorngangne, Daminib nâningane.

² Saulele Israeliblo angutingit kattimalerput, tangmarterlutiglo naksarme nappartolingme Eichenik, oppalungaijarlutiglo Filisterit sorsugvigijomavlugit.

³ Filisterillo nangerput ᴋakᴋame ungatâne, Israelitillo ᴋakᴋame miksâne, naksaᴋalaungmat akkorngane.

⁴ Tagva annijoᴋarpok Filisterit tangmarvinganit innukpamik, Goliathemik attelingmik, Gathemit pijomik, tallitut 6 tut, aggaktullo attautsit sannimututiginingititut, poktutigijomik;

⁵ Nassalugaᴋalaukporlo ᴋannujarmik niaᴋomine, sagvingmiutaᴋalarmelo kavisiliktun îtomik; sagvingmiutangatalo ᴋanujaub oᴋumaininga Sekeletut 5,000 ditut okumaitigijôlaukpok.

⁶ Kannujarmiglo ᴋarleᴋalaukpok niungmine, sappulutaᴋalarmelo ᴋannujarmik tuingmingne.

⁷ Kallugiaᴋotingatalo ippua umiab napparutangatut îlaukpok; ᴋallugiaᴋotingatalo kikkiektanga Sekeletut 600 ditut oᴋumaitigijôlaukpok, aksarsijoᴋotingatalo sappulutanganik sivorlerpa.

⁸ Nangerporlo nipliarlunelo Israelib sorsuktoᴋattigêᴋotinginut, oᴋarvigilugillo: Sôg aularlauᴋise oppalungaijarluse sorsugomamut? Uvanga Filistereôlungilanga, illipselo kivgaungilase Saulemut? Annerosugitse illapse illanganik attersarniartomik uvamnut.

⁹ Sappingikune sorsugvigilunga, ullimarumgalo, tagva kivgaujomavogut illipsingnut, uvangale sappingikupko, ullimarlugolo, taga illipse kivgaujuksauvose uvaptingnut, kivgartorᴋovluse uvaptingnik.

¹⁰ Filistereôjorlo oᴋarpok: Uvlome, uvlorme tamattomane Israelib sorsuktoᴋattigêngningit mittautigilaukpakka; tunnitsivigisinga attautsemik, sorsugutiᴋovlunuk.

¹¹ Saulelo Israelitillo illunamatsiatik Filistereôjub oma oᴋauserijanginik tussaramik, kakkiladlarput sivoradlalutiglo.

¹² Davidele angutib Efratemiub Bethlehemêtub, Judab nunangane, Isaimik attiggub erneriva; tamna erneᴋalaukpok 8 inik, îtolunelo Saulib nelliuningane, inutoᴋaulunelo angutit akkorngane.

¹³ Isaible erningit angajudlit pingasut Saule illagellugo aularlaukput sorsungnermut, atteᴋarlutiglo, erniangoᴋârtok Eliabemik, tuglia Abinadabemik, pingajuak Sammamik.

¹⁴ Davidele nukârdlerpaulaukpok. Angajudlîlle pingasut Saule illagellugo aularmatta unatadlarnermut,

¹⁵ Davide aularivok Saulemit, atâtame saugaᴋotinginik mianersiᴋovlugo Bethleheme.

¹⁶ Filisterele sakᴋerpok uvlakut, unnulerninganelo, sakᴋertilunelo uvlut 40 git nâlugit.

¹⁷ Isaile ernerminut Davidemut oᴋarpok: Tigukit angajungnut oktût una Efa tattalugo ᴋakᴋojaksat jarrasimajut, ᴋakᴋojallo tellimaujortut ukkua, akpangerlutillo tangmarvingmut angajungnut,

¹⁸ Punneôjartullo tallimaujortut nutât ukkoa, âlugillo angajoᴋanganut, angajutille nallipsarkit ᴋannoêngitsiarmangatta, tigusilutillo sunamik perᴋojikpatta.

¹⁹ Saulele, tapkoalo, Israelitillo angutingit illunatik naksarmelaukput nappartolingme Eichenik, sorsugvigilaitalo Filisterit.

²⁰ Tagva Davide uvlarârsukut parngnailerpok, saukaniglo ᴋemailerpok udsertortemut, akjarsilunelo taikunga, sorlo Isaib perᴋolaungmago, tikkilunelo tallunut ᴋamutingnut sanamajunut. Sorsuktoᴋattigêllo aularsimalaukput oppallungaijarsimalutiglo, nipliadlarlutiglo sorsungnerme.

²¹ Israelitit parngnailaungmatta, Filisterit parngnailaurivuttauk tapkonunga.

²² Tagva Davidib illulerᴋut aksartanga ᴋemmakpa illulerᴋutit udsertortinganut, akpangerlunelo sorsuktunut, ailunelo salutilaitalo angajune.

²³ Oᴋartillugolo sulle tapkonunga, ahâk, tagva sakᴋerpok Filisterit sorsuktoᴋattigêngninginit innukpak, Goliathemik attelik, Filistereôjok Gathemiok, oᴋarlunelo sorlo sivurngane pilaurame; Davidele tussarpok tamattominga.

²⁴ Angutille Israelitit nalliata angut tamna takkoguniuk ᴋemâjutigiva, sivoradlarlunelo.

²⁵ Israelitillo illunatik attunît oᴋarput: Angut taimna sakᴋertok takkolaukpissiuk? sakᴋersimangmat Israelitit mittautigijomavlugit. Attaniublo tamna ullimarniktok tapsominga akluititsomava tunnitsivigijomalâlo panniminik; atâtangatalo iglomioᴋattingit kivgaujungnaititsomavait Israeleme.

²⁶ Tagva Davide angutinut nangerᴋattigijaminut oᴋarpok: Sunamik tamna pinniarvioniarᴋa Filisteremik ominga ullimarniktok, kangusuktitaunermiglo tamattominga pejaijok Israelemit? Kinauvâle Filistere kippisimangitok una, Gudib omatsainartub sorsuktuksaksoaᴋotingit mittautigingmagit?

²⁷ Tagva innugatsuit oᴋautivât sivornganetut: Taimailiorvioniarpok tamna ullimarniktok tapsominga.

²⁸ Eliablo ᴋattangutingita angajudlerpângata tussarpa angutit oᴋarᴋattigingmagit, illungertolerlunelo Davide ningaumajarvigiva, oᴋarlunelo: Sôg attersarsimavît? Sôglo saukat ikkitut taikane innuᴋajuitome ᴋemalaukpigit? Angutaunasuginît omattivillo kassêninga illitarigalloarpâka. Attersarsimavotille sorsungnek takkojomagangne.

²⁹ Davidele kiovok: Sunamigle piniarlauᴋik? Perᴋojaumalungilanga tamattominga?

³⁰ Allarpâlo, sâlunelo assianut, oᴋarlunelo sivornganetut. Tagva innugatsuit kiovât sivornganetut.

³¹ Oᴋautsillo, Davidib oᴋauserijangit tussaramigit, oᴋautigivait Saulemut; tapsomalo aijauᴋova.

³² Davidelo Saulemut oᴋarpok: Innub kialonêt omattinga mungoniarane taimna pivlugo, kivgait aijuksauvok Filistere tamna sorsugvigilugo.

³³ Saulele Davidemut oᴋarpok: Igvit aijungnangilatit Filisteremut omunga, sorsugvigilugo, igvit nukapiangôgavit, tamnale sorsuktuksangôvok inuosungnerminit.

³⁴ Davidele Saulemut oᴋarpok: Kivgavit atâtame saugaᴋotingit mianerilaukpait, tikkitoᴋalaukporlo Loewemik aklamiglo, aksarnigaᴋarporlo kingmiarlune saugarmik kattimgajunit.

³⁵ Udlatorparalo annaulerlugolo, piulilaukparalo siggunganit; opaktormangalo tigulaukpara umingitigut, annaulugolo toᴋᴋopara.

³⁶ Taimak kivgavit tamarmik Loewelo aklarlo annaulaukpak. Taimaglo manna Filistere tamna kippisimangitok îtuksauvok taipkoa illangatut; Gudib omatsainartub sorsuktuksaksoaᴋotingit mamailisarlaungmagit.

³⁷ Davidelo oᴋarpok: Nalekab piulilauktima Loewemit aklamillo, tapsoma piuliniarivângatauk Filisteremit omangat.

³⁸ Saulelo Davidemut oᴋarpok: Ailerit, Nalekab illagilitit. Sauliblo Davide attitipa annorâminik, nassarpâlo nassâlukamik kannujarmik niaᴋoanut, sagvingmiutamiglo attitipa.

³⁹ Davidiblo tapseruserutigiva saviksoanga annorâme sillatâgut, pissugiarlunelo, ôktorlautsanginame sulle taimaitomik. Tagva Davide Saulemut oᴋarpok: Taimaidlunga pissugungnangilanga, sungiusimalunginama; pêrpaillo ingminit.

⁴⁰ Tiguvâlo ajaupiane aggangminut, annerivaillo ujarᴋat tallimat manniktut kôngmit, pitilugillo ikpiarsuᴋotiminut attortaminut, mianersijut attorpaktanganut, pôngmullo, illoereullo tiguva aggangminut ailunelo Filisteremut.

⁴¹ Filisterelo ᴋailaurivok, ᴋaglilerlunelo Davidemut, akjarsijoᴋotingatalo sappulutanganik sivurlerpa.

⁴² Filistere manna takkosarame, Davidelo takkonârlugo pigame, nachogiva, nukapiangôngmat, aupalangajôvlune pinnarnarlunelo.

⁴³ Filisterelo Davidemut oᴋarpok: Kingmiôvîk ajaupialijarlutit ᴋaivigigamga? Oᴋarnerlutigivâlo Davide, Gudigijane tailugo.

⁴⁴ Oᴋarporlo Davidemut: Kait uvamnut, uvinît tunnijomavara tingmitsanut ᴋillaub attânetunut, omajunullo naternamêtunut.

⁴⁵ Davidele Filisteremut oᴋarpok: Igvit ᴋaivigivarma saviksoalijarlutit, ᴋallugialijarlutillo, sappulutalijarlutillo; uvangale ᴋaivigivagit Nalekab Zebaothib, Israelib sorsuktuksaksoaᴋotingita Gudingata mittautigilauktavit attingane.

⁴⁶ Uvlorme tamattomane Nalekab unertotiginiarpâtit aggamnut, annauniᴋovlunga illingnik, pêrsiᴋovlungalo niakungnik illingnit; tunnijiᴋovlungalo Filisterit kattimgajoᴋotingita timinginik anernengêrtunik tingmitsanut ᴋillaub attânêtunut, omajunullo nujuartunut nunamêtunut, nunamiut illunatik tukkisilerᴋovlugit Israele Gudeᴋarmat,

⁴⁷ Illagêktullo ukkoa tukkisilerᴋovlugit, Nalegak ikajorlungimat saviksoakullonêt, ᴋallugiaksoakullonêt; Nalekab sorsungnek nangmineringmago, tunniniarpâselo aggaptingnut.

⁴⁸ Tagva manna Filistere parngnailermat ᴋailunelo, Davidelo ᴋaglilermago, Davide tuaviatorpok akpangerlunelo kattimgajoksoaᴋattigênit Filisteremut.

⁴⁹ Davidiblo aggane pitipait ikpiârsungmut, ujarᴋallo illangat tiguva, illoerearlunelo uvigarpâlo Filistere ᴋaungagut, ujarak ittermat ᴋaunganut, tamnalo ocholermat nunamut kênaminut.

⁵⁰ Taimak Davidib Filistere sâlagiva illoereumut, ujarᴋamullo, ullimarlugolo toᴋᴋopâlo. Davidelo saviksoaᴋalunginame aggangmine,

⁵¹ Akpangerpok Filisterelo tikkipa, saviksoangalo amuva kenailitanganit, toᴋᴋopâlo, niaᴋungalo nakkarpa tapsomunga. Filisterille takkogamik, songonerpâᴋotigijatik toᴋᴋungmat, ᴋemâvut.

⁵² Israeliblo Judablo angutingit parngnailerput, nipliarlutiglo, Filisterillo udlapait naksamut Ekroniblo ittertarvinginut tikkilutik, Filisterillo ullimartauvlutik ochovut apᴋome ittertarvingnut sangmijome, Gathelo Ekronelo tikkilugit.

⁵³ Israeliblo ᴋittorngangit utterput udlaningnermit Filisterinik, tangmarvingatalo perᴋutingit aksarnigarivait.

⁵⁴ Davidible Filisterib niaᴋoa tiguva, âpâlo Jerusalemut, sakkungille iglominut illivait.

⁵⁵ Saulib Davide Filisteremut aijok takkogamiuk, oᴋarpok sorsuktuksaksoaᴋotime angajoᴋanganut Abnermut: Kia ernerivaûk nukapiak tamna? Abnerele oᴋarpok: Sorlo mikseᴋârtomik tarnît inôngmat attanersoak, nallovunga.

⁵⁶ Attanek oᴋarpok: Tagva apperᴋutigiuk, kia erneringmangago innuosuktok tamna.

⁵⁷ Davidele uttermat unatadlarnermit Filisterinik, Abnerib tiguva âpâlo Saulib sânganut; Filisteriblo niaᴋoa tigumiarpa aggangminut.

⁵⁸ Sauliblo oᴋautiva: Nukapiak, kia ernerivâtit? Davide oᴋarpok: Kivgavit Isaib Bethlehemiub ernerivânga.