I Samuel 16 - Labrador Inuttitut Heritage Bible

Davidib mingoartauninganik Samuelemut attanermut. Sauliblo annûdlartub ᴋuviasuktitauninganik Davidib Harfesijarninganut.

¹ Nalegarlo Samuelemut oᴋarpok: Kanok akkunêrtigijomik ogguarᴋît Saul singalukogimajara pivlugo, attaniojuksaungimat Israelitinut. Naksuᴋotit orksuᴋaut illulertoruk orksumik, ailutillo, tillijomavagit Bethlehemiomut Isaimut; tapsoma erningita illangat takkungiarapko, attannioᴋovlugo.

² Samuele oᴋarpok: Kannok taikungartuksauvîk? Saulib tussarniarpa toᴋᴋoniarlungalo. Nalegak oᴋarpok: Tuktuvângnit nocharmik tigusilerit illingnut, oᴋarillo: Tikkipunga tunnergutiksamik tunnijijomavlunga Nalekamut.

³ Isailo ᴋaiᴋojaksarivat tunnijivingmut tunergutiksamik, tagvane ᴋaujititsomavagit pinniaraksarnik, mingoarsiᴋovlutit oᴋautiginiartamnik illingnut.

⁴ Samuel pinniarpok sorlo Nalekab oᴋautilaungmago, tikkiporlo Bethlehemut. Tagva iglugasaksuit angajoᴋangit ᴋakᴋilarput, pachrearpâllo, oᴋarlutiglo: Ullapirsauteᴋarᴋa tikkinavit?

⁵ Tamna oᴋarpok: Ahaila, tikkipunga Nalegak tunnergutiksamik tunnitsivigijomavlugo; ivsornaititse illipsingnik, ᴋailuselo illagilunga tunnijivingmut tunnergutiksamik. Isailo erningillo ivsornaitipait ᴋaiᴋolugillo tunnijivingmut tunnergutiksamik.

⁶ Tagvalo manna ittermatta Eliabe takkonârpa issumaᴋarlunelo, tamnaumangat Nalekab saimartitanga.

⁷ Nalegarle Samuelemut oᴋarpok; Takkonârniarnak tautuanik angininganiglonêt; uvanga nachogigapko. Innub takkoningatut pilungimat. Innuk tautukpok ijit sanginêtunik, Nalekable omat nautsertorpa.

⁸ Tagva Isaib Abinadabe ᴋaiᴋova, sângagorᴋolugolo Samuelib. Oᴋarporlo: Nalekab tamna annerilunginiva.

⁹ Tagva Isaib Sama sângagorᴋova. Samuele oᴋarpok: Nalekab tamna annerilunginiva.

¹⁰ Tagva Isaib ernine 7 it sângagorᴋovait. Samuelele oᴋarpok Isaimut: Nalekab tapkoa nalliallonêt annerilaungila.

¹¹ Samuelelo Isaimut oᴋarpok: Nukapitset tapkoatuangôvât? Tamna oᴋarpok: Nukkârdlerpâk amiakovok sulle; ahâglo saukat mianerivait. Tagva Samuel Isaimut oᴋarpok: Tilliklerit tagvunga, aijauᴋolugolo; inginianginapta tikkiᴋârtinnago ovunga.

¹² Tagva tilliklerpok tagvunga aijauᴋolugolo. Aupalangalaukporlo, ijitsiariklunelo, taututsiariklarmelo. Nalegarlo oᴋarpok: Atte! mingoarleruk, tamnauvok.

¹³ Tagva Samuelib naksuᴋotine orksuktalik tiguva, mingoarpâlo ᴋattangutingita akkorngane. Nalekablo Anerningata Davide tikkivigiva uvlormit taipsomangamit kingornganelo. Samuelele parngnailerpok, ailunelo Ramamut.

¹⁴ Nalekable Anerninga nûlerpok Saulemit, annernerublo idluitub Nalekamit pijub uimajartipa.

¹⁵ Tagva Saulib kivgangit oᴋarput tapsomunga: Ahâk, annernerub idluitub Gudemit pijub uimajartidlarpâtit.

¹⁶ Nalegapta kivgane, sângane nangertut oᴋautiligit, ᴋennerᴋovlugit angumik Harfesijatsiarungnartomik; Harfesijarᴋovlugo aggangminut tikkitauleraikuvit annernermut idluitomut Gudemit pijomut, nakkornersaulerᴋovlutit.

¹⁷ Tagva Saule kivgaminut oᴋarpok: Kênajaleritse angumik, nokakseralingmik sungiusimatsiartomik, ᴋaitsiuglo uvamnut.

¹⁸ Tagva nukapitset tapkoa illangat kiovok, oᴋarlunelo: Ahâk, takkolaukpara Isaib Bethlehemiub erningita illangat, tamna nokakseralingmik attutsiarungnarpok, anguteôjok erᴋinaitok, sorsugungnartok, sillatôjorlo sunatuinarne, pinnarnartorlo, Nalekablo illagiva.

¹⁹ Tagva Saulib kivgartortut tillivait Isaimut, oᴋautjauᴋovalo: Ernît Davide saukanêtok tillilauruk uvamnut.

²⁰ Tagva Isaib siuteᴋoᴋtôjok tiguva, ᴋakᴋojarlo illulerᴋutelo Weinetalik, angusalluârsuglo tuktungajok illaliudlugit, tillikliutilaitalo Saulemut ernermigut Davidekut.

²¹ Taimak Davide Saulemut tikkipok, kivgartorlunelo sângane, tapsomalo nagligidlalerpa, akjarsijungorporlo sakkunginik.

²² Saulelo tilliklerpok Isaimut, oᴋautjauᴋolugolo: Davide sâmnêtsainarᴋolauruk, saimaneksingmat ijingma sângangne.

²³ Manna Gudib annerningata Saule tikkigaikpago, tagva Davidib Harfe tiguva, attorlugolo aggangminut; tagva Saule nakkoksilerpok, namanersaulerlunelo, annernerlo idluitok nûpok tapsomangat.