I Samuel 15 - Labrador Inuttitut Heritage Bible

Saulib salaᴋarninganik Amalekiterinik; nalangininganiglo Gudemik, ajiktortauninganiglo.

¹ Samuele Saulemut oᴋarpok: Nalekab tillilaukpânga mingoaraksarigapkit attanermut innuᴋotinginut Israelitinut; tagva tussarit manna Nalekab oᴋausingita nippinganik.

² Imâk Nalegak Zebaoth oᴋarpok: Erᴋaimavunga, sumik Amalek pinniarlaungmat Israelitinut, ᴋannok terliarvigilaungmagit apᴋome, Egiptenemit aulartillugit.

³ Tagva manna ailerit, ullimarlugillo Amalekiterit, nungulugillo pigijangit tamaita illaliudlugit. Nikkaginiarnagit; toᴋᴋotsilerille tamangnik angutinik arnaniglo, sorrutseniglo amâmaktuniglo, tuktuvângnik saukaniglo, Kamêlinik, siuteᴋoᴋtojuniglo.

⁴ Sauliblo innugatsuit kattitipait, kittilaitalo Telaimeme, angutit pissuktut 200,000 dit, angutillo 10,000 dit Judamit.

⁵ Saulelo Amalekiterit iglugasaksoanginut tikkiname terliarsiviksalliorpok kôb kiglingane.

⁶ Keniterillo oᴋautjauᴋovait: Aileritse nûluselo attersaritse Amalekiterinit, tapkonunga illaliudluse, illipsingnik nungutsiᴋonanga; illipse Israelitit illunaita takkopsoagilaurapsigik Egiptenemit aularlauktillugit. Taimak Keniterit nûlerput Amalekiterinit.

⁷ Tagva Saulib Amalekiterit ullimarpait Hevilamit Sur, Egiptenib sivuranêtok tikkilugo.

⁸ Agaglo Amalekiterit attanningat tiguva ômatillugo, innuᴋattigêksuillo illunamasiatik nungupait saviksub kênanganut.

⁹ Saulible innuksuillo Agag nikkagivât, saugatsiallo, tuktuvaillo ᴋuinijut, saugârkallo, illunaitalo ânanaujut, nungutsomalaungilaillo; ᴋannoêtulle piungitullo, tamakkoa nungupait.

¹⁰ Tagva Nalekab oᴋausingata Samuele tikkipa, oᴋarlunelo:

¹¹ Kaᴋᴋialerpunga Saule attaningortilaurapko; tunnusimangmanga, oᴋautsikkalo nallautsitilaungimagit. Tamanna Samuelib issumajarutigilerpa, niplialunelo Nalekamut unnuak nâlugo.

¹² Samuele uvlarârsukut parngnailerpok Saule uvlarme pâromavlugo. Oᴋautsauvorlo Saule Karmelemut tikkisimangmat, nappartitsimangmallo tagvane ingminut sâlaᴋarnerub nallonaikutanganik, ingerarlaungmallo sunatuinarmut, tikkisimangmallo unnunga Gilgalemut.

¹³ Samuele manna Saulemut tikkimat, Saule oᴋarpok tapsomunga: Nalekab saimartilitit! Nalekab oᴋausingit nallautsitilaukpakka.

¹⁴ Samuelible Saule kiova: Sunauvâle saukat nipliadlarningit siutimne, tuktuvaillo ᴋallingoadlarningit tussartakka?

¹⁵ Saule oᴋarpok: Amalekiterinit naksarlaukpait; innugatsuit illunatik saukat tuktuvaillo ânanaunerpât nikkagilaungmagit, tunnergutiksat Nalekamut Gudingnut pivlugit; assingit nungulaukpavut.

¹⁶ Samuelible Saule kiova: Oᴋautsaulerit, sunamik Nalekab oᴋauserilauktanganik uvamnut unnuarme tamattomane. Tamna oᴋarpok: oᴋarit!

¹⁷ Samuel oᴋarpok: Imaingilâk, mikkijolauktillutit ijikpit sângangne, angajoᴋangortitaulaukpotit Israelib kinguvarêngita akkorngane, Nalekablo mingoarlaukpâtit attaningortilutit Israelitinut?

¹⁸ Nalekablo tillilaukpâtit apᴋosinermut, oᴋarlunelo: Ailerit idluitullijullo Amalekiterit nungukit, sorsugvigilugillo nungutsiᴋârtinak taipkoninga.

¹⁹ Sôg Nalekab nippinga nalalaungiᴋiuk, sangulutillo aksarnigaujanut, idluitullilutillo Nalekab ijikita sângangne?

²⁰ Saulib Samuele kiova: Nalekab nippinga nalalauralloarpara, ailungalo apᴋomut Nalekab tilliklerutigilauktanganut uvamnik. Agaglo Amalekiterit attaningat âlaukpara tamaunga, Amalekiterillo nungulaukpakka;

²¹ Inuksuille aksarnigaujut saukat tuktuvaillo, ânanaunerpât nungutaksat akkorngane, tigulaukpait tunnergutigijomavlugit Nalekamut Gudingnut Gilgaleme.

²² Samuelele oᴋarpok: Issumavit Nalekab tunnergutiksat, tunergutiksallo ôtaksat ᴋuviaginersaringmagit nalangnermit Nalekab nippinganik? Ahâk nalengnek namanersauvok tunnergutiksamit, kammatsiarnerlo namanersauvok saukat angutingita orsuanit.

²³ Nalanginek angakokterniôngmat, akkerartornerlo kivgartorniôvok Gudeungitunik, Gudingoaniglo. Mannalo Nalekab oᴋausingit singalukogilaurangne, tapsoma singalukogilaurivâtit attannioᴋonak Israelitinut.

²⁴ Tagva Saul Samuelemut okarpok: Idluitullilaukpunga, Nalekab perᴋojanga oᴋautsitillo tappagilaurapkit; innugatsuit illimagilaurapkit, nippingillo nalalaukpakka.

²⁵ Mannalo idluitullinermik tamattominga issumagijungnaivigilaunga, utterᴋattigilungalo, Nalekamut tuksiarᴋovlunga.

²⁶ Samuele Saulemut oᴋarpok: Utterᴋattigijomangilagit; Nalekab oᴋausingit singalukogilaurangne, Nalekablo igvit singalukogingmattit attaniôᴋonak Israelitinut.

²⁷ Samuelelo tunnulermat aularomavlune, tapsoma tiguva ullingata terreᴋungagut, tamnalo allikpok.

²⁸ Tagva Samuele oᴋarpok tapsomunga: Nalekab uvlome Israelib attaniovinga aksarnigarilaukpa illingnit, tunnimalugolo innuᴋattingnut idluanisanut.

²⁹ Sâlaᴋarte Israeleme saglolunginivok, ᴋaᴋᴋialingilarlo; innuôlunginame suna ᴋaᴋᴋialerutigilugo pijuksaungmat.

³⁰ Tamnale oᴋarpok: Idluitullilaukpunga; opigilaungale mana innuᴋotima angajoᴋangita Israelitillo sângine; utterᴋattigilungalo, Nalegak Gudit tuksiarvigilugo piᴋovlunga.

³¹ Taimak Samuele utterpok, malliklunelo Saulemik, Saule tuksiarᴋovlugo Nalekamut.

³² Samuel oᴋarpok: Agag Amalekiterit attaningat ᴋaitaule uvamnut. Agagiblo sivuranane aivigiva, oᴋarlunelo: Taimak tokkub ᴋassilinarninga pêrtaujariaᴋarpok.

³³ Samuel oᴋarpok: Sorlo saviksoarpit arnat aksarlaungmagit ᴋittornganginik, taimak anânat aksartaujuksaugivok ᴋittorngaminik arnat akkorngane. Taimak Samuelib Agag ullimarpa avgorlugo Nalekab sângane Gilgaleme.

³⁴ Samuelelo aivok Ramatemut; Saulele majorarpok iglominut Gibeamêtomut.

³⁵ Samueliblo Saule manamit takkojungnaipa toᴋᴋome uvlunga tikkilugo. Samuelible Saule oggurilauralloarpa, Nalegak ᴋaᴋᴋialilaungmat Saule attaningortilaungmago Israelitinut.