I Samuel 14 - Labrador Inuttitut Heritage Bible

Jonathanib piniarnersoanganik nangiartuisartomik. Sauliblo pititsikassangninganik tapsominga toᴋᴋomut, illungertornerminut sillainartomut.

¹ Pijoᴋalaukporlo uvlut illangane, Jonathan Saulib erninga, nukapiaminut, sakkunginik akjarsijomut oᴋarmat: Kait, ailauluk Filisterit tangmarvinganut, akkiptingnêtomut. Oᴋalungilarlo tamattominga atâtaminut.

² Saulele Gibeametuarlaukpok, Granatit nappartungata iglugasaksuit issunginêlauktub attâne; innuksuillo tapsomanêlauktut, anguteôlaukput 600 dikassait.

³ Ahialo, Ahitob erninga Ikabodib angajuata, Pinehasib erningata, Elib erningata, ajochertuijôlaukpok Nalekamut Silome, ikkialijarlarmelo. Innuksuit ᴋaujimalaunginivut Jonathan aularsimangmat.

⁴ Apᴋotible Jonathanib ainasuarvigijangata Filisterit tangmarvinganut senniane ᴋairtoᴋalaukpok maggungnik nuvulingnik, aipa miksiptingne, aipanga ungatâne; aipa Bozesemik atteᴋalaukpok aipangalo Sennemik.

⁵ Aipa sangmilaukpok avangat Michmasemut, aipanga angat Gabamut.

⁶ Jonathanelo akjarsijoᴋotiminut sakkunginik oᴋarpok: Kait, ailauluk akkiptingnut, kippisimangitut tapkoa tangmarvinganut; imaᴋᴋâ Nalegak uvaptiguk sulliniarpallukpok; Nalekamut oᴋumailungimat unnuktutigut ikkitutigullonêt ikajorlune.

⁷ Tagva akjarsijoᴋotingata sakkunginik kiovâ: Pinniarit tamainik omattingnêtunik; ailerit, ahâk, aiparivagit, sorlo omattit pijomangmat.

⁸ Jonathan oᴋarpok: Atte, akkianut pigumnuk innungnut, sanganullo pigumnuk;

⁹ Oᴋarniarpatta tagva: Nokᴋaritik tikkiᴋârtinata illiptingnut; tagva inniptingne nokᴋaromavoguk, majorarvigijomangilavuglo.

¹⁰ Oᴋarniarpattale: Kaileritik paunga uvaptingnut; tagva majoraromavoguk tapkonunga; tagva Nalekab tunnimavait aggaptingnut. Tamannalo nallonaikutarijomavavuk.

¹¹ Mannalo Filisterit tangmarvingata sanganut tikkimannik, Filisterit oᴋarput: Ahâk, Ebreerit ittersamingnit ijersimavigilauktamingnit annisimavut.

¹² Angutille tangmarvingmêtut Jonathane akjarsijoᴋotingalo sakkunginik, kiovakit, oᴋarlutiglo: Kaileritik paunga uvaptingnut, tagva ajochertoromagalloarpaptik. Tagva Jonathan sakkome akjarsijinganut oᴋarpok: Malliklunga majorarit, Nalekab tunnimavait Israelitit agganginut.

¹³ Jonathanelo aggangmigut ittikamigullo majoakpok, sakkungatalo akjarsijingata mallikpa. Tagva ochovut Jonathanib sânganut, sakkungitalo akjarsijingat toᴋᴋotsiᴋattarpok tapsoma kingorngane;

¹⁴ Taimak, Jonathanib sakkungitalo akjarsijingata sorsugvikita sivorlerpângane angutit 20 git toᴋᴋotaulaungmatta, perorsêvingme tuktuvâk magguk poagrejarpaktangangne uvlorme attautseme.

¹⁵ Tangmarvingmêtullo natername, tangmarviublo innuksoangit illunamasiatik erksinermut tikkitauvut, kattimgajoksuillo aularlauktut sunatuinarmut ᴋoaksarputtauk, taimak nuna sajukpilangmat; ᴋoaksarniôlaungmat Gudemit pijomik.

¹⁶ Sauliblo udsertortingit Gibeame Benjaminib nunanganêtome, takkovut kattimgajut siamalermatta, sunatuinarmullo akpangermatta, nungutaulermattalo.

¹⁷ Saule innuksoarnut illagijaminut oᴋarpok: Kittitsileritse nautsertorluselo kina uvaptingnit aularsimagalloarmangat. Kittitsingmattalo, ahâk, tagva Jonathan sakkungitalo akjarsijingat tagvanêlaungilâk.

¹⁸ Tagva Saule Ahiamut oᴋarpok: Gudib iklervinga ᴋaile tamaunga. (Gudib iklervinga nalliutome taipsomane Israelib ᴋsittornganginêmat.)

¹⁹ Saulelo oᴋartillugo sulle ajochertuijomut, aulajadlarnek, akpangernerlo Filisterit tangmarvingane angivalliavok. Saulelo ajochertuijomut okarpok: Tallit erᴋititsuk.

²⁰ Saulelo innuksuillo illagijangit illunamasiatik kattimalerput, tikkilutiglo sorsugvingmut: ahâglo, Filisterit illunatik attunit saviksoangit torarput illamingnut, pikabladlarneᴋarporlo.

²¹ Ebrerittauk sivurngane Filisterinêlauktut tapkoalo illagilugit majorarlauktut tangmarvingmut, nunamit avatânêtomit, illaᴋutivut Israelitinut, Saulib Jonathaniblo illagijanginut.

²² Israeliblo angutingita illunatik ijerlauktut ingminik Efraimib ᴋakᴋangane, tussaramik Filisterit ᴋemângmatta, mallikpait sorsuglugit.

²³ Taimak Nalekab nalliutome taipsomane Israelitit ikajorpait. Sorsungnerlo pilerpok Bethaven tikkilugo.

²⁴ Israeliblo angutingit nukkingêrotilermatta uvlorme taipsomane, Saulib oᴋautigimarikpait, oᴋarlunelo: Ominarsile, nalliat nerrijok sunamik unnulerᴋârtinago, omigijikka uvamnut akkiniartauᴋârtinagit. Tagva innugatsuit illunamasiatik nerrilungilat sunamik.

²⁵ Nunaᴋattigêllo illunatik nappartut illuanut pilaukput. Pittaᴋalaukporle igupsaujartut orksuanik nunatuinarme.

²⁶ Innuksuille nappartunut tikkilermatta, ahâk, tagva igupsaujartut orksua korlorpok tagvane; kinalonêlle pititsilungilak illanganik aggangmigut ᴋannerminut, innugatsuit oᴋarmaringnek sivoragingmatsuk.

²⁷ Jonathanele tussarlaungilak atâtame inuksuit oᴋautimarilaungmagit, ajaupianelo aggangminut tigumiartane issautiva, nuvualo missukpa igupsaujartut orksuanut, pitilugolo aggangmigut ᴋannerminut, tagva ijigik uitatsialerpuk.

²⁸ Innuksuit illangat kiovok oᴋarlunelo: Atâtavit innugatsuit oᴋautimarilaukpait, oᴋalauklunelo: Ominarsile nalliat uvlome nerrijok sunamik. Innuksuille nukingêrotilaukput.

²⁹ Tagva Jonathan oᴋarpok: Atâtama nunaᴋattigêt tammartilaukpait; takkoleritse, ᴋannok ijika uitatsiarmanik, kêtakullungmik igupsaujartut orksuanik ominga oksilaurama.

³⁰ Innuksuille uvlome nerrijuksaulaungimatta omigijimik perᴋutigilauktanginit nachvarlauktamingnit, tamanna pivlugo sorsungnek Filisterinik anginersaujungnarlaunginivok.

³¹ Uvlormele taipsomane Filisterit ullimarpait Michmasemit Ajalon tikkilugo. Innugatsuillo nukkingêrotidlalaukput.

³² Innugatsuillo aksarnigaujut âᴋiksorpait, tigulugillo saukat, tuktuvaillo, nochaillo, toᴋᴋopaillo nunatuinarme, nerrilugillo auᴋartillugit.

³³ Tagva Saule oᴋauttauvok: Ahâk innugatsuit idluitullivut, aungmik nerringmatta. Tamna oᴋarpok: Idluitomik pinniarlaukpose, ujaraksoak aksakâtisiuk manna tamaunga uvamnut.

³⁴ Saulelo oᴋapsarpok: Innuksuit akkornganut siamartitse, oᴋautisigiglo, illunatik attunit tuktuvaᴋotimingnik, saugaᴋotimingniglo ᴋaitsiᴋovlugit uvamnut; toᴋᴋotsileritselo mâne, nerriluselo, idluitulliᴋonase Nalekamut nerrinermut aungmik. Tagva innugatsuit illunatik attunit tuktuvaᴋotitik aggamingnut ᴋaipait tagvunga unnuarme, toᴋᴋopaillo tagvane.

³⁵ Saulelo Altaremik sannavok Nalekamut. Tagva Altare sivurlerpâk tapsoma sannalauktanga Nalekamut.

³⁶ Saulelo oᴋarpok: Attersarta Filisterit malliklugit unnuarme, aksarlugillo ᴋaulerᴋârtinago, amiakoᴋarᴋojiᴋonata kinamiglonêt tapkonangat. Tapkoa kiovut: Pinniarit namagijarnik tamainik. Ajochertuijorle oᴋarpok: Tamaunga Gudemut ᴋaglilerta.

³⁷ Saulible Gude apperiva: Attersartuksauvîk Filisterit malliklugit? Israeliblo agganginut tunnijomavigit? Tapsomale kiolaungila nalliutome taipsomane.

³⁸ Tagva Saule oᴋarpok: Inuksuit kattimgajungit illunatik tamaunga ᴋailit, tukkisilerluselo, takkolapselo kinamut idluitullinek illingamangat nalliutome tamattomane.

³⁹ Taimagle mikseᴋârtigijomik sorlo Nalegak Israelib piulijinga inôngmat, tamna toᴋᴋojuksauvok, ernimnullonêt Jonathanemut illingagalloarpallonêt. Inuksoarnillo kialonêt kiolungila.

⁴⁰ Oᴋarporlo Israelitinut illunamasianut: Illipse mattoma ungatanêleritse; uvanga erneralo Jonathan ovanêtsomavoguk. Innugatsuillo Saulemut oᴋarput: Pinniarit namagijarnik.

⁴¹ Saulelo oᴋarpok Nalekamut Israelib Gudinganut: Idluarnermik sakᴋertitsilerit. Tagva Jonathan Saulelo nellautauvuk; innuksuille annigoivut.

⁴² Saule oᴋarpok: Immeraut attorsiuk pivlunga erneralo Jonathane pivlugo. Tagva Jonathan nallautauvok.

⁴³ Saulelo oᴋarpok Jonathanemut: Oᴋautinga, sunamik pinnialauᴋît? Jonathanib oᴋautigiva tapsomunga, oᴋarlunelo: Igupsaujartut orksuanik ketârsungmik ôksilaukpunga ajaupiamut aggamnut tigumiarlauktamnut; ahâglo tamanna pivlugo toᴋᴋotaksauvunga.

⁴⁴ Tagva Saule oᴋarpok: Gudib imâk, imâglo pinniarvigilinga; Jonathan toᴋᴋojuksauvotit.

⁴⁵ Innuksuille Saulemut oᴋarput: Jonathane piulijaunartomik, taimak angitigijomik pinniarlauktok Israeleme, toᴋᴋojuksauva? Tamanna ungasigle. Sorlo mikseᴋârtomik Nalegak innôngmat, kattaktoᴋartuksaungilak nujarmik attautsemiglonêt niaᴋunganit nunamut; Gude uvlome tapsomûna pinniarlaungmat. Taimak innugatsuit Jonathane piulivât, toᴋᴋotaujuksauᴋonnago.

⁴⁶ Tagva Saule majorarivok Filisterinit, Filisterillo aivut nunagijamingnut.

⁴⁷ Saulible Israelib nalegauvinga tigujarêramiuk, omigijine illumajine illunaita sorsugvigilerpait, Moabiterit, Amonib kittorngangit, Edomiterit, Zobamiut attaningat, Filisterillo; sanguvingminelo illunaine sugiarnermik pititsivok.

⁴⁸ Sorsuktuksoarniglo kattimgajunik âᴋiksoivok, ullimarlugillo Amalekiterit, Israelitillo piulivait illunatik kappiasuktitsijut tapkoninga agganginit.

⁴⁹ Saulele erneᴋalaukpok, Jonathanemik, Iswimiglo Malchisuamiglo. Pannigiglo imaitungnik atteᴋalaukpuk: angajudlek, Merobemik, nukardlerlo Michalemik.

⁵⁰ Sauliblo nullianga, Ahimâzib panninga, atteᴋalaukpok Ahinoamemik. Sorsuktuksaksoaᴋotingitalo angajoᴋangat, Nerib erninga, Saulib ᴋattangutiârsua atteᴋalaukpok Abneremik.

⁵¹ Saulible Kise atâtagiva; Nerele Abnerib atâtanga Abielsib ernerilaukpa.

⁵² Songojomigle sorsungneᴋatsainarlaukpok Filisterinut Saulib innosingane tamât. Nanelo Saule angumik nukkelingmik songojomiglo takkolaurangame, tamna pitipa ingminut.