I Samuel 13 - Labrador Inuttitut Heritage Bible

Jonathanib annaulerningninganik Filisterinik, tapkoalo ᴋaitsoninginik Israelemut. Saulib tunnijininganik tunnergutiksamik perᴋojaungitomik.

¹ Saule Jare attausek nâlugo attaniolaukpok; Jariglo magguk nâlugik Israelitit attaniotivigilauᴋârdlugit,

² Israelitinit angutit 3,000 dit annerivait. Angutit 2,000 dit Saule illagilugo Michmasemêlaukput, Betheliblo ᴋakᴋangane, 1,000 dillo Jonathane illagivât Gibeame Benjaminib nunanganêtome; innuksuille assingit aularᴋovait, illunatik attunit iglomingnut.

³ Jonathanible Filisterit ullimârpait tapkoa tangmarvingine Gibeamelauktome; tamattominga Filisterit ᴋaujititauvut. Saulelo tiptulausijarᴋojivok nuname illunâne, oᴋarᴋojilunelo: Tamattominga Ebreerit tussarlit.

⁴ Israelitillo illunamasiatik tussarput oᴋartoᴋarmat: Saulib Filisterit tangmarvingat ullimarlaukpait, Israelitit tippilungmatta Filisterit sângane. Innugatsuillo illunamasiatik ᴋaiᴋojauvut Saule malliklugo Gilgalemut.

⁵ Tagva Filisterit kattimalerput Israelitit sorsugvigijomavlugit, aksalloaggit 30,000 dit, ablangajut horsine 6,000 dit, innuksuillo assingit, siorkatitut immarbiksub siksanganêtutitut unnuktigijut; majorarpullo tangmarterlutiglo Michmaseme, Bethavenib kittâne.

⁶ Israelib angutingita tamanna takkolauramitsuk, kappianartovingmênamik, (innugatsuit kappiasudlaramik) ijerput ᴋairosungne, kôrᴋunelo, ᴋairtunelo, ittersanelo, îttersâlungnelo.

⁷ Ebreerille aivut Jordane ikârlugo Gadekut nunanganut, Gileademullo. Saulele Gilgalemetuarpok sulle, innuksuillo illunatik tamna malliklugo maksuajungnailerput.

⁸ Tagva uttaᴋivok uvlut 7 it nâlugit, nalliutok Samuelib oᴋautigilauktanga tikkilugo. Samuele tikkingimat Gilgalemut innugatsuit siamarterput tapsomangat.

⁹ Tagva Saul oᴋarpok: Kaitsileritse uvamnut tunnergutiksanik ôtaksanik, tunnergutiksaniglo kujalijutiksanik. Tunnijivorlo tunnergutinik ôtaksanik.

¹⁰ Tunnijijarêrmallo tunnergutinik ôtaksanik, ahâk, tagva Samuele ᴋaivok. Tagva Saulib annilune pachrearpa salutitsomavlugo.

¹¹ Samuele oᴋarpok: Sunamik pinniarlauᴋît? Saul kiovok: Takkolaukpunga, innugatsuit siamartermatta uvamnit, igvillo ᴋailaunginavit nalliutome oᴋautaumajome, Filisterillo kattimangmatta Michmaseme.

¹² Tagva oᴋarpunga: Manna Filisterit attersarviginiarpânga Gilgalemut, uvangalo Nalekab kênanga tuksiarvigilaungilara; tagva oktorlaukpunga tunnijilauklungalo tunnergutiksanik ôtaksanik.

¹³ Samuele Saulemut oᴋarpok: Sillainartomik pinniarlaukpotit, Nalekablo Gudivit perᴋojanga, perᴋolauktanga illingnut, nalalaungilat; manna Nalekab attaniovit Israelemut naᴋᴋiterajarmago soraijuitilugo,

¹⁴ Mannale attanniovit soᴋᴋosijuiniangilak. Nalekab angut ᴋennerêrpa ingminut, omattime namagijanganut, tamna Nalekab perᴋova attannioᴋovlugo innuᴋotiminut; igvit Nalekab perᴋojanga nalalaunginangne.

¹⁵ Samulelo aularpok Gilgalemit, ailunelo Gibeamut Benjaminib nunanganêtomut. Saulible innugatsuit illagijane kittipait, angutit 600 diokasait.

¹⁶ Saulele erningalo Jonathan innuksuillo illagijane nokᴋangavut Benjaminib ᴋakᴋarulângane. Filisterille tangmarsimavut Michmaseme.

¹⁷ Filisterillo tangmarvinganit kattimgajut pingasut aularput nuna asseroromavlugo. Attautsit torarput apᴋosinermut Oframut sangmijomut, Sualib nunanganut;

¹⁸ Aipangit torarput Bethoronib apᴋosininganut. Pingajuillo torarput apᴋosinermut, sangmijomut Zeboimib naksanganut, sunaᴋajuitub sannianêtomut.

¹⁹ Sabviortemigle naipitsijoᴋalaungilak Israelib nunangane illunâne. Filisterit issumaᴋalaungmatta, Ebreerit saviksoarnik ᴋallugiarniglo sannanajarmatta.

²⁰ Israelitillo illunamasiatik attersariaᴋalaukput Filisterinut, kina poagrejaruteᴋalaurangat, aggajaumiglonêt, ullimaumiglonêt, iviksukattautemiglonêt kênaksartaujariaᴋartomik.

²¹ Tapkoa aggiaᴋatuinarlaukput kênaksainermut iviksukatautinik, aggajautiniglo, kappuᴋautiniglo, ullimautiniglo.

²² Sorsugviub uvlunga nalliutingmat manna, saviksoarlonêt, kallugiarlonêt, naipitaulaungilak innugiartoksuit Saulib Jonathaniblo illagijangita aggangine; Saule erningalo kissimik sakkoᴋalaukpuk.

²³ Filisterillo tangmarsimajut annilerput Michmasib ungatânut.