I Samuel 12 - Labrador Inuttitut Heritage Bible

Samuelib idluarsainerminik ipperaininganik, kaiblaininganiglo innuksoarnik.

¹ Tagva Samuele Israelitinut illunamasianginut oᴋarpok: Ahâk, nippise nalalaukpakka illunaine, oᴋauserilauktapsingne uvamnut, attannermiglo pititsilaukpunga illipsingnut.

² Mannalo ahâk, tagva attanipse sivorlervigivâse. Uvangale îtomavunga ᴋêrtolarmalo, ernîkalo akkonapsingnêpuk, uvangalo sivurlervigilaukpapse innuosungnimnit uvlok tamanna tikkilugo.

³ Ahâk, manêpunga akkerartorlunga kiogisinga, Nalekab tapsomalo saimartitangata sângane, kia tuktuvaᴋotinga, siuteᴋoktojoᴋotingalonêt tigulaungmangapkik? kina aksorornermut aksarlaungmangapko, idluitullivigilaungmangapkolonêt? Kialonêt agganginit pilliusiamik tigusilaungmangarma, ijikalo takpêtitauᴋolaungmangapkik? Tagva uttertitsomavara.

⁴ Tapkoa oᴋarput: Aksororvigilaungilaptigut, idluitulliviginatalonêt, tigusilaungilatillo sunamik kia agganginit.

⁵ Tamna oᴋarpok tapkonunga: Nalegak kigligiudsijôle, saimartitangalo, uvlome uvlorme tamattomane sunasilaunginapse aggamne. Tapkoa oᴋarput: Ahaila, kigligiudsijôjuksauvuk.

⁶ Samuelelo innuksoarnut oᴋarpok: Illa Nalegak tamna, pingortitsilauktok Mosesemik, Aronemiglo, atâtagijapsingniglo aularutjilauktok Egiptenemit.

⁷ Taimak ovungaleritse manna erᴋartuivigiluse piᴋovlunga Nalekab sângane, Nalekab ajungitullininginik pinniarlauktanginik illipsingnut, atâtagilauktapsingnullo.

⁸ Jako Egiptenemut tikkisimalaungmat, atâtagilauktase nipliadlarput Nalekamut, tapsomalo Mosese Aronelo tillivâk tassiorniᴋovlugik atâtagijapsingnik Egiptenemit, nunaᴋarᴋojiᴋovlugiglo tapkoninga tamâne.

⁹ Tapkoale Nalegak Guditik puigormatsuk, niorvgotigilaukpait Sisserab, sorsuktuksat Hazoreme angajoᴋangita pitsartuninganut, Filisterillo pitsartuninganut, Moabiterillo attaningata pitsartuninganut, tapkoa unatadlarvigilaukpait.

¹⁰ Amalo niplialerput Nalekamut, oᴋarlutiglo: Idluitullilaukpogut Nalegak ᴋemmalauraptigo, Bâlillo Astarotelo kivgartorlauraptigik; mannale piulitigut omigijipta agganginit, tagva kivgartoromavaptigit.

¹¹ Tagva Nalekab Jerubâle Bedanelo, Jeftalo, Samuelelo tillivait, piuliluselo omigijipse avatipsingnetut agganginit, nunaᴋarᴋoluselo ussornarluse.

¹² Takkolaurapsele Nahasib Amonib ᴋittorngangita attaningata ᴋaitsovigingmasse, oᴋalaukpose uvamnut: Igviungitok, attaniuble attanniotivigijaksarivâtigut; Nalegak Gudise attannerilauralloarapsiuk.

¹³ Manna tagva attanneᴋarpose annerilauktapsingnik, tuksiararilauktapsingniglo; ahâgle, Nalekab attannermik pititsivigimavâse.

¹⁴ Nalegak manna sivuraginiarupsiuk, kivgartorlugolo, nippingalo nalengniarlugo, Nalekablo ᴋanninga tappaginiangikupsiuk, tagva tamarmik illipse attanipselo, attannerijapse Nalegak Gudise mallingniarpasse.

¹⁵ Nalekable nippinga nalangniangikupsiuk ᴋanningale tappagigupsiuk, tagva Nalekab aggangita illipse atâtagijasselo akkerartorniarpâse.

¹⁶ Mannalotauk tamaungaleritse, takkoluselo pijoᴋartomik angijoksoarmik Nalekab pinniarlârtanganik ijipse sângine.

¹⁷ Perorsijat Weizenit kattersivingat nalliusimangilak? Uvangale Nalegak nipliarvigijomavara kalluᴋojiᴋovlugo, sillaluᴋojiᴋovlugolo, tukkisilerluselo takkoᴋovluse idluitoksoarmik Nalekab ijikita sângangne pinniarlauktapsingnik, attannermik tuksiarlaurapse.

¹⁸ Samueliblo Nalegak nipliarvigingmago, Nalegak kallerᴋojivok, sillaluᴋojilunelo uvlorme tapsomane. Tagva innugatsuit illunamasiatik Nalegak Samuelelo sivoragivakit,

¹⁹ Oᴋarlutiglo Samuelemut: Nalegak Gudit tuksiarvigiuk kivgatit pivlugit, toᴋᴋolerᴋonata; ajornivulle illunaita tappilugit, idluitomik tamattominga pilaurivogut, attannermik tuksiarlaurapta uvaptingnut.

²⁰ Samuele innuksoarnut oᴋarpok: Sivuraniarase, idluitunik tamakkoninga tamainik pinnialauralloarpose, kissiane nûniarase Nalegak tunnulugo, kivgartorsiugle omamut tamânut;

²¹ Sangunaselo suksaungitok malliklugo, piutsangimat, piuliklerungnangilarlo, sunaungitôngmat.

²² Nalekable innuᴋotine ᴋemmalungilait, attine angijoksoak pivlugo; Nalegak pigiarlaungmat illipse innuᴋotingortiluse ingminut.

²³ Ungasigletauk uvamnit, taimak idluitullilunga Nalekamut nokᴋartuksaugama tuksiarutigiluse, ajochertorluselo apᴋomik idluartomik tamarnangitomiglo.

²⁴ Nalegak sivuragituinarsiuk kivgartorlugolo nertornarluse omamut tamânut; takkolaurapse ᴋannok angijoksoarmik pinniarvigingmasse.

²⁵ Idluitomigle pinniarniarupse, tagva tamarmik illipse attanniselo assioniarpose.