I Samuel 11 - Labrador Inuttitut Heritage Bible

Saulib sâlaᴋarninganik sivorlerpâmik Amoniterinik.

¹ Nahase Amonitereôjok majorarpok, Jabeselo Gileademe illumavait. Angutillo Jabesemiut illunatik Nahasemut oᴋarput: Angerᴋattigittigut, tagva kivgartoromavaptigit.

² Nahasible Amonitereôjub kiovait: Tamattominga angerᴋattigijomavapse, illunase attunit ijipse tallerpia kappijomagapko, sujuktiluselo Israelitit illunatik akkorngane.

³ Tagva angajoᴋaunerôjut Jabeseme oᴋautivât: Tunnitsivigittigut uvlunik 7 nik, kivgartortunik tilliklerᴋovluta Israelib kiglilervinginut illunainut, tagvalo kinaᴋangipat piuliklerniartomik uvaptingnik, annivigijomavaptigit.

⁴ Tagva kivgartortut tapkoa tikkiput Gibeamut Saulemut, oᴋarlutiglo tamattominga innugatsuit siutingita sângine. Tagva innuit illunatik niplialerput ᴋêadlarlutiglo.

⁵ Ahâglo, tagva Saul perorsêvingmit pivok tuktuvait kingornganêdlune, oᴋarlunelo: Inuksuit sujut, ᴋêadlarmatta taimak? Tagva Jabesemiut angutingita, illinganinginik unipkautivât.

⁶ Tagva Gudib annerningata tikkipa, oᴋautsit taimaitut tussaramigit, ningaumajarningalo illungertudlalerpok.

⁷ Tuktuvâglo magguk tiguvâk avgorlugiglo, tilliklerlunelo Israelib kiglilervinginut illunainut kivgartortutigut, oᴋautauᴋojilunelo: Nalliat aularlungitok Saul Samuelelo malliklugik, tapsoma tuktuvakotingit taimailiortitaujuksauvut. Tagva Nalekab sivuranarningata innugatsuit tupvigilerpait, aularmatta angutetut attautsetut.

⁸ Basekemelo opallungaijartauvut; Israeliblo ᴋittorngangit 300,000 diolaukput, Judablo ᴋittorngangit 30,000 diolaukput.

⁹ Tillijaujullo tikkisimalauktut oᴋautivait: Imâk angutit Jabesemiut Gileademe oᴋautissigik: Kaupat seᴋᴋinek kiaᴋalerpat ikajortauniarpose. Tillijaujut uttermatta, oᴋautigilugolo tamanna angutinut Jabesemiunut, tagva ᴋuviasulerput.

¹⁰ Jabesemiullo angutingit okarput (Amoniterinut): Kaupat annijomavogut illipsingnut, issumapsingnik tamainik pinniarvigiluta piᴋovluse.

¹¹ Uvlublo aipangata uvlangôningane Saulib innugatsuit avitipait pingasolilugit, tikkilutiglo tangmarvingmut, udsertortib uvlarme nalliuningane, annaulerpaillo Amoniterit, uvlub kiaᴋarninga tikkidlugo; amiakojulle taimak siamartitauvut, magguglonêt aiparêgungnaimanik.

¹² Tagva innugatsuit Samuelemut oᴋarput: Kikkôvât oᴋalauktut: Saule attaniojuksauva uvaptingnut? Angutit taipkoa ᴋailersigik, toᴋᴋotsiᴋovluta taipkoninga.

¹³ Saulelo oᴋarpok: Uvlorme tamattomane toᴋᴋotaujoᴋartuksaungilak kinamiglonêt; Nalegak uvlome piulijaunermik tunnijilaungmat Israeleme.

¹⁴ Samuele innuksoarnut oᴋarpok: Kaititse, Gilgalemut ailerta, attanniôviglo nutângortilerlavut.

¹⁵ Tagva innugatsuit illunamasiatik Gilgalemut aivut, Saulelo attaningortipât tagvane Gilgaleme Nalekab sângane, tunnijilutiglo tunnergutiksanik ᴋujalijutiksanik Nalekab sângane. Saulelo, Israelib angutingit illunaita illagilugit, ᴋuviasudlalaukpok tagvane.