I Samuel 1 - Labrador Inuttitut Heritage Bible

Samuelib innulerninganik.

¹ Anguteᴋalaukpok Ramataim Zofimemit Efraimib ᴋakᴋanginêtomit, Elkanamik attelingmik, Jerohamib erninganik, Elihub erningata, Thohub erningata, Zufib erningata Efratemit pijub.

² Nulliaᴋalaukporlo maggungnik, aipanga Hannamik attelik, aipanga Penninamik. Penninale ᴋittorngaᴋalaukpok, Hannalo ᴋittorngaᴋalaungilak.

³ Angullo tamna iglugasaksoarnit iglokarviminit majorarlaukpok nalliunermine, tuksiaromavlune tunnergutiksaniglo tunnijilune Nalekamut Silome. Tagvanelaukpugle Nalekab ajochertuijokotigik Hofni, Pinehaselo, Elib ernigik.

⁴ Uvlullo illangane pijoᴋalaungmat Elkana tunnergutiksaminik tunnijilaurame, nulliaminut Penninamut tapsomalo erninginut paninginullo illunainut, tunnijivok abvakunik.

⁵ Hannamulle kiksarlune tunnijivok abvakomik attautsemik; Hanna nagligigamiuk; Nalekable ᴋittorngisuitilaukpâ.

⁶ Akkerartortingatalo kiksartidlarpa, pingijaivigidlarlâlo, Nalekab ᴋittorngisuitilaungmago.

⁷ Taimailaukpok Jarine tamaine majoralaurangat Nalekab iglunganut, kiksartipalo taimak; tamnalo ᴋugviorpok tagva, nerrinanelo sunamik.

⁸ Elkanable uingata oᴋautiva: Hanna, sôg ᴋêavît, sôglo nerringilatit? Sôglo omattit sannikteriva? Namanersaungilangale illingnut ernernit tallimaujortunit?

⁹ Tagva Hanna nerrilauᴋârdlune, immerlauᴋârdlunelo Silome nikkovipok. (Elile ajochertuijok iksivautame iksivavok Nalekab Tempelingata nappajungata saniane.)

¹⁰ Tamnalo omamut kiksadlalaukpok, tuksiarporlo Nalekamut, ᴋugviorlunelo.

¹¹ Pinniaromajaminiglo angerpok, oᴋarlunelo: Nalegak Zebaot, kivgavit ᴋannoêninga taikkunârniarungne, issumaginiarumga, kivgallo puigorniangikungne, kivgallo ernermik tunnitsiviginiarungne, tagva Nalekamut tunnijomavara innôsinga nâlugo, pijoᴋartuksaungilarlo kipsautingnik niaᴋunganut.

¹² Akkunîllo tuksiarmat Nalekab sângane, Elib tapsoma ᴋanninga kamagiva.

¹³ Hanna omattimigut oᴋarame kangasinâgik kissimik aulavuk, nippingalo tussartaulaungilak. Tagva Elib tallanganasugiva;

¹⁴ Oᴋautivalo: Kannok akkunêrtigijomik tallangajomavît? Weine illungnêtok annikoleruk illungnit.

¹⁵ Hannale kiovok, oᴋarlunelo: Aukak, nalegâk, arnauvunga kiksartok. Weinemik immiksamiglo pitsartujomik immerlaungilanga, omattigale navilaukpara Nalekab sângane.

¹⁶ Kivgait înasuginiarnago arnatut illuserluktotut; issumajadlarnimnut, kiksadlarnimnullo oᴋarᴋattarlaukpunga manna tikkilugo.

¹⁷ Eli kiovok oᴋarlunelo: Ullapirsauteᴋarlutit aularit; Israelib Gudingata tuksiarᴋiniarpâtit tuksiararilauktarnik tapsomangat.

¹⁸ Tamna oᴋarpok: Kivgait saimaneksile ijikpit sângangne. Taimak arnak aularpok apᴋosinermine, nerrilunelo, tautorlugungnailunelo.

¹⁹ Uvlâkullo parngnailerput, tuksiarlauᴋârdlutik Nalekab sângane, utterivut tikkilutiglo iglomingnut Ramatemut. Elkanablo nulliane uvineᴋattigilerpa, Nalekablo issumagiva.

²⁰ Uvlullo illangit ᴋângermatta singailerpok, ernermiglo ernivok, Samuelemiglo atserarpa; oᴋarlunelo: Nalekamit ᴋenuarilaurapko.

²¹ Angullo Elkana majorarmat paunga iglomioᴋattine illagaillugit tunnergutiksamik tunnijauvaktomik, angerutigilauktaminiglo tunnijijomavlune Nalekamut,

²² Hanna majorarᴋattaulaungilak, oᴋarporle uiminut: Majorarᴋattaujomalungilanga nukapiak amâmagungnaiᴋârtinnago, tagva âtsomavara, Nalekab sângane sakᴋijarᴋovlugo, tagvanêtsainarᴋovlugolo sorairane.

²³ Elkanab, uingata oᴋautiva: Taimailiorit sorlo namagijaungmat illingnut, nokᴋangarit amâmaktitsijungnaiᴋârtinnak tâpsominga; Nalekable oᴋauserilauktane nallautsitilerligit. Taimak arnak paivok, erninelo amâmaktipa, amâmaktitsijungnaiᴋârtinago tapsominga.

²⁴ Amâmaktitsungnairamiuk, âlugo majorarᴋattigiva, tuktuvait pingasut, Efalo tattalugo sanaukamik, publaujarlo Weinetalik illaliudlugo; âpâlo Nalekab iglunganut Silomêtomut. Nukapiarle innusulaukpok sulle.

²⁵ Tuktuvaillo illangat toᴋᴋopât, nukapiarlo âpât Elimut.

²⁶ Arnarlo oᴋarpok: Illa nalegâk, sorlo mikseᴋârtomik tarnît inôngmat, nalegâk, uvanga arnauvunga taimna, mâne nangerᴋattigilauktat, tuksiarlauktorlo Nalekamut,

²⁷ Nukapiak una tuksiarutigilaurapko. Manna Nalekab tuksiaramnik tunnitsivigilaukpânga, tuksiaragilauktamnik tapsomangat.

²⁸ Tamanna pivlugo tunnivara Nalekamut innôsinga nâlugo, Nalekamit tuksiarijaulaungmat. Tuksiarpullo tagvane Nalekamut.