I Pêtrusib 5 - Labrador Inuttitut Heritage Bible

Ajoᴋertuijut illagêktullo kaiblartauninginik.

¹ Angajoᴋaunerôjut ilipsingnêtut kaiblarpakka, uvanga angajoᴋaunerôᴋataujunga, kigligiutsijôlarmalo Kristusib ânianganik, illangiuteᴋatauvlungalo ânanaunermik saᴋᴋeromârtomik:

² Kristusib inuᴋotingit perᴋojaumajut ilipsingnut pairiniarsigik udsertorlugillo; ᴋununermut pinase ᴋunutuidlusele; kangunartomik perᴋutiniaromanermut pinase, ômamulle ilungertortomut,

³ Gûdib inuᴋotinginut ataniotijomajutitut pinase, igjaraksaunialeritsele katimgajunut.

⁴ Tagva pairsijoᴋsoaᴋ saᴋᴋeromârpat, niaᴋôtemik ᴋunorlijuitomik opinartomik pititaujomârpose.

⁵ Taimaktauᴋ ilipse inôsuktôjose inutoᴋaujut nâleksigik. Ilûnase nâlektigêgitse, piojorijuinermik ataruilititse. Pimariutertut Gûdib akkerartormagit, piojorijuitulle nâpkigivait.

⁶ Tamanna pivlugo ilipsingnik nikanarsâritse Gûdib agganginut pitsartujoᴋsoarnut, neliunermine ilipsingnik nertornartitserᴋovlugo.

⁷ Siardlernise tamaita tâpsomunga pitisigik, tâpsoma issumagitsainarmase.

⁸ Silatuniaritse erᴋomavluselo; akkerartortise Sâtanase arvertarmat loevetut nipliajoᴋsoatut, êjaksarsiorlune nelianik.

⁹ Tâmna okpernermut akkerartorsiuk sôngovluse, ᴋaujimavluselo ᴋatungutise nunamêtut tamakkonungatauᴋ kappianartunut pijaulermingmatta.

¹⁰ Gûdible saimanartunik tamainik perᴋutitaliksûb, uvaptingnik ᴋairᴋojijub ânanaunersoarminut issoᴋangitomut Kristuse Jêsusikut, tâpsoma nangmineᴋ âᴋiksorniarpâse nâmaktomik, nakoᴋsitiluselo, pitsartutiluselo tunganilitiluselo, ilipse anikitomik kappiasuktitaujose.

¹¹ Tâmna nertortaule pitsartunerôlunelo issoᴋangitomit issoᴋangitomut. Amen.

¹² Silvânuse ᴋatangutise nertornartoᴋ (taimainasugijara) ukkuninga neksarniarmat, aglagvigiarsulauᴋpapse kaiblarluse, kigligiutigilugolo, Gûdib saimarsautâ tattigijase okpernartôngmat.

¹³ Okpertut anerimaᴋatigijapse Babilônemêtut salutipâse ernermalo Marᴋusib.

¹⁴ Saluteᴋatigêgitse kunikluse naglingnerme. Ullapirsaumik illaᴋarlîttôᴋ ilûnatik Kristuse Jêsusemêtut. Amen.