I Pêtrusib 4 - Labrador Inuttitut Heritage Bible

Aniakut adsiutitaujungnarniptingnik Kristusemut. Pigârtuksaunermik ilusitsiariktuksaunermiglo. Oᴋumaitoᴋartilugo ᴋenuersârᴋojaunermik.

¹ Kristuse ânialaungmat timimigut pivluta, ilipsetauᴋ taimaitomik issumamik tigusilermititse; uvinikut âniajoᴋ idluitulijungnairmat;

² Kingorngane inôniarnermine sulle uviningme, inuit ikliguninginu-ungitoᴋ, Gûdible pijomajanganut inôniarlune.

³ Tâvârutigigaptigo, inônipta anigorningane nelojut pijomajangit atutsainalauraptigik, arvertalaurapta illoᴋeudlarnerme, ikligunermelo, tallanermelo, nerriluadlarnermelo, imiluadlarnermelo, mamaitoâlungnelo, Gûdiungituniglo kivgartornerme.

⁴ Tataminiarput illaginginapsigik, taipkutitunarlo iluseᴋanginapse ᴋuksalaitunik idluituniglo mitautiksaniglo oᴋauseᴋarlutik.

⁵ Taipkoa kigligiksartuksaujomârput tâpsomunga, opalungairsimajomut erᴋartuivlune inôjunik toᴋungajuniglo.

⁶ Tamanna pivlugo toᴋungajuttauᴋ oᴋautsinik tussarnertunik oᴋâlaviogivut, erᴋartortauᴋovlugit inôjutitut uvinikut, tarningille ômarᴋovlugit Gûdeme.

⁷ Tamaitaᴋsuille naggatiksangat ᴋaglilerpoᴋ.

⁸ Tamanna pivlugo silatuleritse erᴋomavluselo tuksiaritse. Tamainille anginerpângojomik, nagliktigêgitse ilungertordluse; naglingnerub ajornerit unuktoᴋsôningit mattungmagit.

⁹ Siniktarvioᴋatigêgitse avamugase.

¹⁰ Kivgartortigêgitselo saimarsaumut ilûnase atunit tunergusiapsingnut, pimaklertutitut ajungitutitut Gûdib saimarsautinginik sunatuinarnik.

¹¹ Oᴋâlajoᴋarpat, Gûdib oᴋausingititut oᴋâlatigivlugit pile. Kivgartortoᴋarpat, Gûdib tunijanga ajungijutigilugo piniarle. Gûde piniarnernut ilûnainut nertortauᴋovlugo Jêsuse Kristusikut; tâmna nertortaule pitsartunerôlunelo issoᴋangitomit issoᴋangitomut. Amen.

¹² Naglingnartose ilipse, tataminiarutiginiarasigik kappianartut ônarsitigijase, (tamakkoninga pititaujose ôktortauᴋovluse) takorngartamut sorle pijaulerasuginase.

¹³ Kuviasugitsele, Kristuse kappiasuktitauᴋatigigapsiuk, ânanauningata saᴋᴋeromârviane ᴋuviasûteᴋarᴋovlusetauᴋ serriniardluse.

¹⁴ Piloridlarpose, mitautaugupse Kristusib attinga pivlugo; Gûdib Anerningata ânanauniliksûb inigingmase. Tamna mitautigijaujoᴋ taipkonane, ilipsingnele nertortauvoᴋ.

¹⁵ Inuartotulle-idlune âniatitaujomik, ilipsingnêtoᴋartailile, tigliksimajotullônêt, idluitulijotullônêt, ᴋerdlerutijotullônêt assime senajaksanginut.

¹⁶ Kristusible inuᴋotingatut âniatitaugune, kangusugane pile, Gûdele nertorliuk tamanna pivlugo.

¹⁷ Neliutingmat erᴋartuinerub pigiarvinga Gûdib iglungane. Uvaptingnele pigiarᴋârpat, okperomangitut Gûdib oᴋausinginik tussarnertunik ᴋanoêtomik naggateᴋaromârᴋât?

¹⁸ Idluartorlo serlak piulijaujungnarmat, nane saᴋᴋeromârkâ Gudemik nâlengitoᴋ idluitulijorlô?

¹⁹ Taimaimat Gûdib pijomajanga maliklugo âniatitaujut, tarnitik perᴋojaksarivait tâpsomunga, nertornarlune pingortitsijomut, ajungitulilutik.