I Pêtrusib 3 - Labrador Inuttitut Heritage Bible

Uilillo nulialillo ilingajariaᴋarninginik. Kenuersârᴋojaunermik ânianartoᴋartilugo Kristuse maliklugo.

¹ Taimaktauk arnat uitik nâlegaᴋsarivait; taipkoatauᴋ (Gûdib) oᴋausinginik okpingitut arnat ilusinginut oᴋausiungitunut kajungertitauᴋovlugit,

² Tâpkoa arvertarningit nâlengnerme ikliguktailinermelo takogunigit.

³ Ananauningit ᴋallininginêtuksaungimatta nujamingnik pergainermullônêt, goldemik atimanermullônêt, annorâtsianullônêt;

⁴ Inugle ômamêtoᴋ takuksaungitoᴋ, soᴋosijuidlune piojoringitomik uimajângitomiglo anerneliojoᴋ, tamanna pivianarmat Gûdeme.

⁵ Taimaktauᴋ itsaᴋ arnat ipkoa ivsornaitut ingmingnik ânanautitsilauᴋput, Gûdemik tatteᴋarlutik uitiglo nâletsainarlugit.

⁶ Sorlo Sarab Abraha nâlengmago, nâlekaminiglo taivlugo; tâpsoma panigiliusimavâse ajungituligupse, sivôranaselo kiksarnartomik.

⁷ Taimaktauᴋ nulialit ilipse, silatoluse najortigisigik, arnallo sangênersaungmatta opigisigik, tâpkoatauᴋ saimanermut kingormgujeᴋattauniarmatta inôtsemik; tuksiarnise agviartauᴋonagit.

⁸ Tagvale ilûnase issumaᴋaᴋatigêngniaritse, naiperᴋotigosukluse ᴋatangutitut naglikluse, nâpkigosukluse inôtsiarluse.

⁹ Ajorneᴋ ajortomut akkiniartaililugo, suagosungnerillônêt suangnermut; ajungitulititsele, ᴋaujimagapse, ᴋairᴋojaumagapse, saimanartolingmik kingormgutijaksaᴋarᴋovluse.

¹⁰ Inôtsiarnermik tussujoᴋ, uvluniglo ajungitunik takojomajoᴋ, oᴋaminik nippangertitsile oᴋauseᴋartaililune ajortomik, ᴋangasinângminullo uivêriklertaililune.

¹¹ Ajorneᴋ tunuliuk ajungitulivlune; ullapirsautisiorle, katsungaitomiglo pinasuarutigilugo.

¹² Nâlekab ijîkita idluartut takonârmagit, siutîkitalo tuksiarningit (tussarpait); Nâlekable kênangata (torârpait) idluitulijut.

¹³ Kialo idluitulivigijungnarpâsê, ajungitoᴋ malikupsiûk?

¹⁴ Kappiasuktitaugalloarupselônêt idluarneᴋ pivlugo, pilorikpose. Sivôranaritsininginigle sivôraniarase, kakkilârtailititselo.

¹⁵ Nâlegarle nertorsiuk ômatipsingne. Opalungairsimatsainaritsele akiorlugit ilûnaita ᴋaujititaujomajut nerriungnerijapse ilupsingnêtub tungaveᴋarninganik;

¹⁶ Kenûêdluse udjertorluselo, passijaksaungitomik ilumiuteᴋarluse; ilipsingnik terliarᴋataijut idluitulijionerartise kangusoᴋovlugit, Kristuseme ajungitulinipsingnik mitauteᴋaramik.

¹⁷ Gûdele taimaiᴋojikpat, idluarnersauvoᴋ, kappiasuktitaugupse ajungitulineᴋ pivlugo, idluitulineᴋ pivlugo pijaunermit.

¹⁸ Kristusetauᴋ atausiardlune âniatitaungmat ajornivut pivlugit, idluartoᴋ idluitut pivlugit, pititsomavluta Gûdemut, uviningmigullo toᴋotauvlune, anernermigulle ômartitauvoᴋ.

¹⁹ Tâpsomûnatauᴋ oᴋâlajartulauᴋpoᴋ anernernut parngnanairsimavingmêtunut;

²⁰ Ipkoa okperomalaungitut Gûdib ᴋenuersârtub utaᴋingmagit, taipsomane Noa inôtilugo umiaᴋsoaᴋ senajaungmat; tâpsoma iluane ikitut, imaipoᴋ sittamaujortut inuit piulijaulauᴋput imânit.

²¹ Tamattomunga adsiutitauvoᴋ mattomane piulijigijavut baptijut; ubvautaungitoᴋ timib ipanganut, angeᴋatigêngniojorle issumame passijaksaungitome Gûdemelo, Jêsusib Kristusib makininganut;

²² Tâmna ᴋilaliarame, Gûdib talerpiata tungânêpoᴋ, Engelillo, atanersuillo, pitsartudlartullo naipertorpât.