I Pêtrusib 2 - Labrador Inuttitut Heritage Bible

Ivsornaitomik arvertarneᴋarᴋojaunermik. Kaiblaijutiksat angajoᴋaujut pivlugit. Kristuse igjaraksaujoᴋ.

¹ Tagva idluitulinerit tamaita allarsigik, uvêriklernerit tamaita, takkormôrnerillo, anerutjinerillo, terliaᴋatainerillo tamaita;

² Kipiniaritselo imungmik silatunilingmik akkusimangitomik, nutaᴋatitut erniangoᴋamertutitut, aglivalliaᴋovluse tamattomunga;

³ Oksimalauralloarupse Nâlekab illanâᴋarninganik.

⁴ Tikisimagapse tâpsomunga, sorlo ujarᴋamut ômajomut; tâmna inungnut nachogijauvoᴋ, Gûdemele anerimavoᴋ pivianartoᴋsôvlune.

⁵ Ilipsetauᴋ ujarᴋatitut ômajutitut igloliangotitse, igloᴋsoangolerᴋovluse anernelingmik ajoᴋertuijuksaulerluselo ivsornaitunik; tunijijuksauᴋovluse tunergutinik anernilingnik, Gûdib idluarijanginik Jêsuse Kristusikut.

⁶ Taimaimat aglangne aglaksimavoᴋ: Ahâk, ujarᴋamik iglub terreᴋuksanganik ilijivunga Zioneme, anerimajomik pivianartomiglo; neliallo tâpsomunga okpertoᴋ kangusuktitauniangilaᴋ.

⁷ Ilipsingnut tagva okpertose pivianarpoᴋ; okpingitunulle ujarak taimna, igloliortut nachogijangat, terreᴋuksaliangotitaumavoᴋ,

⁸ Ujaraulerdlune aporvingmik, ᴋairtôlarmelo sinaungautaujomik taipkonunga aportunut oᴋautsemik, okperinagit atoraksarijatik.

⁹ Ilipsele inuᴋatigêngovose anerimajut, ajoᴋertuijut ataniviksôlutik inuit ivsornaitut, tâpsoma inuᴋotingit; ilipsingnik ᴋairᴋojijub piniarningit ajungitut oᴋautigilugit pijuksauvose, tâᴋtomit ᴋairᴋongmase ᴋaumanerminut tatamnartomut.

¹⁰ Ilipse sivorngane inuᴋatigêlaungitose; mânale Gûdib inuᴋotigivâse; itsarlo saimarsauteᴋangitose, mânale saimautjauvose.

¹¹ Nagligijaujose ᴋatangutit, takorngartaujose nunagingitapsingnêtoselo inerterpapse: Uviniub ikliguninginik atortailititse, taipkoa tarne akkerartormatsuk;

¹² Nelojullo akorngane, ajungitomik arvertaritse: ilipsingnik terliaᴋataijut idluitulinerarluse, ajungitulinipsingnik takoᴋovlugit, Gûdemiglo nertordlerᴋovlugit kiglisiniarviub uvlungane.

¹³ Inungnut maligaksauᴋojaujut tamaita nâleksigik Nâlegaᴋ pivlugo: ataniviglônêt nâlegaunerôjoᴋ;

¹⁴ Angajoᴋâllônêt, tâpsoma tilijangit, akkiniarᴋovlugit idluitulijunik, ajungitulijuniglo nertordlerᴋovlugit.

¹⁵ Tamadja Gûdib pijomajanga, ilipse ajungitulinermut oᴋausiksairotitserᴋovluse inuit silaitut nelojoᴋsôninginik.

¹⁶ Kivgaungitutitut, kivgaunginisele atortaililugo idluitulinerub mattutiksanganut; Gûdible kivgangititut.

¹⁷ Inuit ilûnaita opigisigik. Katangutigêt nagligisigik. Gûde nâleksiuk. Atanivik opigisiuk.

¹⁸ Ilipse kivgaujose nâlekat nâlengniarsigik kuksasutsiarluse; ajungitut issumagiktullo kissêtaungitoᴋ, issumagingitulletauᴋ.

¹⁹ Tamanna saimarsauteliongmat, inuk kappianarnernik atorungnarpat idluartomik issumagijaᴋaromavlune Gûdib sângane, passijaksauluganelo kappiasuktitaukpat.

²⁰ Kanoᴋ nertornarajarmât, idluitulinise pivlugit issaᴋajautiluse ᴋenuersârupsê? Ajungitulinisele pivlugit kappiasuᴋtitaugupse ᴋenuersârluselo, tamanna saimanadlarpoᴋ Gûdeme.

²¹ Tamattomunga ᴋairᴋojaugapse. Kristusetauᴋ âniadlalaungmat pivluta, igjaraksamik ᴋemaivlune uvaptingnut, tâpsoma tuminginik malerᴋovluta.

²² Tâmna idluitulilautsangilaᴋ, uivêriklernermiglo ᴋaningane naipitaujoᴋalaungilaᴋ.

²³ Tâmna suaktaujarangame, suangilaᴋ; âniatitaugame, silungilaᴋ; idluartomigle erᴋartuijomut tamanna perᴋovâ.

²⁴ Tâpsoma nangmineᴋ ajornivut timimine pitipait ᴋejungmut, idluitulinermit toᴋungalerᴋovluta, idluarneᴋ inôniarvigilugo. Tâpsoma ikkinginut inûlijauvose.

²⁵ Saukatitut tamarsimajutitut-ilaurapse; mânale sâgiarsimavose tarnipse pairijunganut ajoᴋertuijoᴋsoanganullo.