I Pêtrusib 1 - Labrador Inuttitut Heritage Bible

Unuktoᴋsoarnik Gudib saimarsautinginik anernilingnik. Ivjornailerᴋojaunermik.

¹ Pêtruse Jêsusib Kristusib Apostelinga, takorngartanut siamangajunut Pontuseme, Galâtsiame, Kappadôtsiame, Asiame, Bitîniamelo;

² Anerimajut, Gûdib Atâtab sivorngagut issumasimaninganut, Anernerub ivjornaititsininganut, nâleᴋovlugit, serparsartauᴋovlugillo Jêsusib Kristusib aunganut: Gûdib saimarlise ullapᴋoserliselo aglivalliajomik.

³ Nertortaule Gûde Nâlegaptalo Jêsusib Kristusib Atâtanga nâpkiningnersoarminut ernertâripsâlaungmatigut, ômanartomik nerriugijaksaᴋarᴋovluta, Jêsusib Kristusib makininganut toᴋungajunit;

⁴ Asserojuitomik, ivsornangitomiglo, ᴋunulijuitomiglo kingormgutijaksaᴋarᴋovluta, ᴋilangme ᴋumergutaumajomik.

⁵ Ilipsingnut, Gûdib pitsartuninganut saputigauniartose okpernermut piulijaulerdluse, tamanna pijarêrtisimajoᴋ, saᴋᴋerᴋovlugo uvlut kingorliksangine.

⁶ Tamanna angijomik ᴋuviasûtigijase, unêt tamattomane anikitomik kiksarniartose (taimaitsariaᴋarpat) sunatuinarnik kappianartunik.

⁷ Okpernise idluartôvlune, angijomiglo pivianarnersauvlune goldemit nungujomârtomit, ikomamut ôktortauvaktomit, naipitauᴋovlugo nertornarlune nelâgôrlunelo, nâlengnarlunelo, Jêsusib Kristusib saᴋᴋerviksangane;

⁸ Tâmna takolaungigalloartase nagligivase, mânalo takungigalloardlugo okpervigigapsiuk, tagva erᴋiêrtorpose ᴋuviasungnermut oᴋautaujungnangitomut alianartoᴋsoarmullo.

⁹ Okpernipse sorairviksanga, tamadja tarnib piulijauninga, tiguniarapsiuk.

¹⁰ Piloringnartoᴋ tamanna nelautaijut, saimaniksapsingnik nelautailauᴋtut, sivunivaksoangagut ᴋenilauᴋpât issumaksarsiorutigilugolo.

¹¹ Issumaksarsiorutigilauramigit neliunerit ilusingillônêt nelît Kristusib Anerningata tâpkoa iluanêtub oᴋautigingmangâgit, sivorngagut kigligiutsilaurame âniatitaunernik Kristusemêtunik ânanaudlartoᴋaromârtomiglo kingorngane.

¹² Taipkoa nelojungnaititaulauᴋput, ingmingnut ilingangitut uvaptingnulle ilingajuksat oᴋautigigamigit; tamakkoa mâna oᴋautigijaumavut ilipsingnut, oᴋautsinik tussarnertunik ilipsingnut oᴋâlajunut, Anernikut ajunginikut ᴋilangmit tilijaumajokut; tamanna Engelittauᴋ tukkisijomavlugo kajungilârivut.

¹³ Tamanna pivlugo issumapsigut ᴋeterusersimatitse, udjertoritse, saimarsaullo tunergusiariniartase Jêsusib Kristusib tikiviksangane tattigivingniarsiuk,

¹⁴ Kitorngatitut nâlektutitut, iliorniaraselo taipsomanetut, nelojoᴋsôtiluse ikligunerit maliklugit inôlaurapse;

¹⁵ Tâmnale ivjornaitoᴋsôjoᴋ ilipsingnik ᴋairᴋojijoᴋ maliklugo ilipsetauᴋ ivjornaititse arvertarnipsingne ilûnâne.

¹⁶ Taimak aglaksimangmat: Ivjornaititse, uvanga ivjornainama.

¹⁷ Atâtalo nipliavigigapsiuk, inungnik adsigêngititsinane erᴋartuijoᴋ, ilûnainigle piniarningit maliklugit, tagva arvertaritse kuksasukluse nunamênipsingne.

¹⁸ Kaujimavluse nunguniartomit silberemullônêt goldemullônêt piulijaunginapse piusekullupsingnit atâtanut adsiunipsingnit;

¹⁹ Kristusible aunganut erdlingnartomut, saugârsutut sinaungajuitotut ivjornaitotullo ilauᴋtub.

²⁰ Tâmna sivorngagut issumaksarsiorutaumalauralloarpoᴋ silaᴋsoaᴋ tunganilijauᴋârtinago, saᴋᴋersimajorle neliunerit kingorlingine pivluse, tâpsomûna okpertose Gûdemut;

²¹ Gûdible toᴋungajunit tupaktipâ, ânanaujoᴋsoangartilugolo, Gûdemut okperᴋovluse, tatteᴋarᴋovluselo.

²² Tarniselo sujungaitisigik mikseᴋârneᴋ nâleklugo Anernermut, ᴋatangutinik nagligosoᴋovluse takkormôjuidluse; ômamullo ivjornaitomut nagliktigêvigitse!

²³ Ilipse erniangupsârsimajose kinguvâksamit asserorniartomiungitoᴋ asserojuitomille, Gûdib ômajub oᴋausingagut, issoᴋangitomut-itsomârtokut.

²⁴ Uvinilit ilûnatik iviksukatitun-ingmatta, inûblo pinnarnarninga ilûnane iviksukat nuvugolângititun-ingmat. Iviksukat panilerput nuvugolângillo ᴋunorlerput;

²⁵ Nâlekable oᴋausinga issoᴋangitomut-itsomârpoᴋ. Tamadjale oᴋauseᴋ oᴋautigijaujoᴋ ilipsingnut.