I Kronika 5 - Labrador Inuttitut Heritage Bible

Rubenib, Gadiblo, Mânnassiblo kinguvângit.

¹ Rubenib Israelib erneriᴋârtangata erningit (erniangoᴋârtolaungmat, tamattomungale atâtame innangavia ivsornartilaungmago, erniangoᴋârtoninga tunnijaulaukpok Josefib, Israelib erningata erninginut; tamnalo erniangoᴋârtonasugijaulaungilak;

² Judale sôngojolauktok ᴋatangutime akkorngane atannionermik tunnitsiviolaukpok, Josefele erniangoᴋârnermik.)

³ Taimâk Rubenib Israelib erneriᴋârtangata erningit tapkoangovut: Hanoch, Pallulo, Hezronelo, Karmilo.

⁴ Joeliblo erninga Semajaulaukpok, tapsoma erninga Gogeôlaukpok, tapsoma erninga Simeiôlaukpok.

⁵ Tapsoma erninga Michaôlaukpok, tapsoma erninga Reajaulaukpok, tapsoma erninga Baalôlaukpok,

⁶ Tapsoma erninga Beeraôlaukpok, Tiglat Pilnesseremut, Assiriamiut atanninganut aularutitaulauktok; angajoᴋaulaukporle Rubenekut akkorngane.

⁷ Tapsomalo ᴋatangutingit kittitauvlutik kinguvâtik malliklugit, angajoᴋaᴋalaukput, Jejelemik, Sacharjamiglo.

⁸ Belalo Asanib erninga, Semab erningata, Joelib erningata nunaᴋalaukpok Aroereme, Nebo, Baal-Meonelo tikkilugik.

⁹ Nunaᴋalaukporlo unane sunaᴋajuitok tikkidlugo, kôb Fratib miksane, nergjuteᴋotingit unuktolaungmatta Gileadib nunangane.

¹⁰ Sauliblo nalliuningane unatarput Hagariterinut, ochotitauvullo tapkoa agganginut, tuppingillo innigivait Gileadib kitâne ilûnnane.

¹¹ Gadible erningit nunaᴋalaukput taipkoa saniane nuname Basaneme, Salcha tikkidlugo.

¹² Joel angajoᴋaunerôjok, Safanelo tuglia, Jaenai, Safatelo Basaneme.

¹³ ᴋatangutingitalo atâtangit tapkoangovut: Michael, Mesulamelo, Sebalo, Jorailo, Jaekanelo, Sialo, Eberelo, tapkoa 7 it.

¹⁴ Tamadsa Abihailib erningit, Hurib erningata, Jaroab erningata, Gileadib erningata, Michaelib erningata, Jesisaib erningata, Jadob erningata, Busib erningata.

¹⁵ Ahi Abdielib Gunib erningata erninga angajoᴋaulaukpok tapkoa atâtangita iglunginut,

¹⁶ Nunaᴋalaukpullo Gileademe Basanemêtome, iglogasanginelo, Saroniblo aiparusingine ilûnnaine kiglilervingit tikkidlugit.

¹⁷ Tapkoa ilûnnatik kinguvarêᴋotitik malliklugit kittitaumavut Jothamib Judakut atanningata nalliuningane, Jerobeamiblo Israelitit atanningata nalliuningane.

¹⁸ Rubenib erningit, Gadiblo erningit kinguvarêllo Mânnassekut ketterᴋangit, angutaujut tapkonangat sorsugungnartut, sappulutalijartut, saviksoalijartullo, pittiksaniglo ᴋellusijungnartut, unatarnermiglo illisimajut, tapkoa 44,760 ôlaukput, tapkoa aularput unatadlarnermut.

¹⁹ Unatadlarpaillo Hagariterit, Jeturelo, Nafeselo, Nodabelo.

²⁰ Ikajortaulaukpullo tapkoa akkerartorungnarlugit, Hagariterillo ilagijangillo ilûnnaita tunnijauvut agganginut. Gûdemut nipliarmatta sorsungnerme; tapsomalo tussarpait, tattigingmatsuk.

²¹ Aularutivaillo taipkoa nergjuteᴋotingit, Kamelit 5,000 dit, saugello 250,000 dit, siuteᴋoktojut 2,000 dit, inuillo 100,000 dit.

²² Ullimarsimajut unuktut ochungmatta, unatadlarnek Gûdemit pingmat. Nunaᴋarpullo tagvane taipkoa innangêrdlugit, nalliutok parngnanairsortauviat tikkidlugo.

²³ Kinguvarêllo Mânnassekut ketterᴋangita ᴋitorngangit nunaᴋalaukput nuname, Basanemit, Baal Hermon tikkilugo. Seniremelo ᴋakᴋamelo Hermoneme, unuktolaukpullo.

²⁴ Tamadsalo tapkoa atâtangita iglungita angajoᴋangit: Efer, Jesei, Eliel, Asriel, Jeremia, Hodawja, Jadiel, angutaudlartut, angutillo nertornartut, angajoᴋaulutiglo opinartut atâtamik iglungine.

²⁵ Idluitullilaukpulle atâtagijamik Gûdinganut, ajortullilutiglo inugasaksuit Gûdib tapkoa sivorngane pêjarlauktangita Gûdingoaᴋotingit malliklugit:

²⁶ Tagva Israelib Gûdingata Fulib Assiriamiut atanningata annerninga, Tiglat Pilnesseriblo Assiriab attannertangata annerninga kajungersarpâk, aularutivaillo Rubenekut, Gadekullo, kinguvarêllo Mânnassekut ketterᴋangit, âpaillo Halamut, Haboremullo, Haramullo, Gosaniblo kônganut, uvlok tamânna tikkilugo.