I Kronika 29 - Labrador Inuttitut Heritage Bible

Angajoᴋait tunnergutingit Tempelib igluliortauninginut illingajuksat. Davidib tuksiarninga ᴋujalidlarlune. Salomob mingoartauninga. Davidib toᴋonga.

¹ Atannerlo Davide ilagênut ilûnamasianginut oᴋarpok: Gûdib Salomo, ernerma ilangat, inosuktok nikᴋanartorlo sulle annerilaukpa, pinniaraksarle angijôvok, inungmut igluksaujuksaungimat, Nalekamulle Gûdemut.

² Uvangale ajugaringitamnit piksanik kattersoilaukpunga Nalekab iglunganut, Goldemik perᴋutinut Goldeôjuksanut, Silbere Silbereôjuksanut, ᴋanujarmik ᴋanujangojuksanut, kikkiangmik kikkiangojuksanut, ᴋejungmik ᴋejungojuksanut, ujarᴋanik Onichemik atelingnik, ujarᴋaniglo aglalingnik taksepatânik ivertisimajunik, ânanausijutiksanik, ujarᴋaniglo piviarnartunik sunatuinarnik, ujarᴋaniglo Marmoremik atelingnik unuktunik.

³ Tapkoalo tappilugit alliasungnermut Gûdib iglunganik, perᴋutimnik nangminerjamnik, Goldemik Silberemiglo,

⁴ Talentinik Goldemik 3,000 dinik Ofiremit pijunik, Talentiniglo 7,000 dink Silberemik ilaᴋangitomik, tunnijijomavunga Gûdima iglunganut, iglut sanerangita illupiarutaksanginut.

⁵ Goldeôlerᴋovlugit Goldeôjuksat, Silbereôᴋovlugillo Silbereôjuksat. Pikᴋariktut sanajanginut tamainut. Kinalo mânna ᴋunnujuiᴋâ uvlome tigumiaralijarlune tikkilune Nalegak pivlugo?

⁶ Tagva ᴋunnutuilaukput atâtat angajoᴋangit, kinguvarêllo angajoᴋangit, angajoᴋait 1,000 dinut, angajoᴋaillo 100 dinut, angajoᴋaillo atanniub sanajauᴋojanginut.

⁷ Tunnijilutiglo attoraksanik Gûdib iglunganut, Talentinik 5,000 dinik, 10,000 diniglo kênaujanik Goldeôjunik, Talentiniglo 10,000 dinik Silberemik, Talentiniglo 18,000 dinik ᴋannujanik, Talentiniglo 10,000 dinik kikkiengmik.

⁸ Kinalo nachvârviôjok ujarᴋanik, tamna tunnijivok tapkoninga Nalekab iglungata perᴋutitalinganut Jehielib Gersoniteôjub agganginut.

⁹ Inugasaksuillo tunnergutitik ᴋunnutuilutik tunnijatik ᴋuviasutigivait, tunnigamigit Nalekamut omamut tamânut, ᴋunnutuilutik. Attannerlo Davidetauk ᴋuviasuvaksoangolaukpok.

¹⁰ Davidiblo Gûde nertorpa, oᴋarlunelo ilagêt ilûnamasiatik sângine: Igvit Nalegak Israelib atâtapta Gûdinga nertortaulerit soraijuitomik.

¹¹ Igvit, anginek, pitsartunerlo ânanaunerlo, sâlaᴋarnerlo, ussornarnarnerlo pigivattit. Ilûnaita ᴋilangmêtut nunamêtullo nangminerigangne. Igvit Nalegak nalegaunek pigivat, pôktojovaksôvotit angajoᴋaksoangolutillo ilûnainut.

¹² Akluinerlo opigijaunerlo kênarnit pivok, igvillo atanniotivotit tamainut; aggangnelo pitsartuneᴋarpok, sôngoneᴋalarmelo; aggangnêporlo angijorortitsinek, soᴋosijuititsinerlo.

¹³ Mânnalo Gûdivut ᴋujagivaptigit, attillo ânanaudlartok nertorpavut.

¹⁴ Uvangale sunauvîk? Inuᴋotikkalo sunauvât, sappingituksaugapta tunnergutit taimaitut ᴋunnutuidluta tunnilugit? Illingnille pivut tamaita, aggangnillo tunnilaukpavut illingnut.

¹⁵ Pigigaptigut, tujormiangolutalo sângne iglomeᴋarvigivaptigillo, atâtaptitut ilûnaititut. Uvlovut mâne nuname tachaktut îput, noᴋangatsengilallo.

¹⁶ Nalegak Gûdivut, kattititaumajut tamaita tunnimajavut igvit iglomik iglulioromavlutit atit heiligeôjok pivlugo, aggangnit pimavut, tamaitalo pigivattit.

¹⁷ Nallungilanga Gûdiga omat ôktorangne, nallagôrnerlo ᴋuviagigangne. Tamânna pivlugo tamakkoa tamaita (ᴋunnutuidlunga) omamut nallagôrtomut tunnilaukpakka, ᴋuviasuklungalo mânna takkolaukpunga inuᴋotitit manêtut, ᴋunnutuidlutik tunnitsivigilaungmattit.

¹⁸ Nalegak, atâtagijapta Abrahab, Isaakiblo, Israeliblo Gûdingat, inuᴋotivit omatingine taimaitunik issumaᴋartitsitsainalaurit, erᴋarsauteᴋartitsitsainarlutillo isoᴋangitomut, omatingillo torartilaukit illingnut!

¹⁹ Erneralo Salomo omamik nallagôrtomik tunnitsivigilauruk, perᴋojatit kigligiudsinitillo idluarijattillo nalaklugit piᴋovlugo, tamainik piᴋovlugo, igluliorᴋovlugolo igloksoarmik ominga, attuinarutilauktamnik.

²⁰ Davidelo ilagêt ilûnamasianginut oᴋarpok: Nalegak Gûdise nertorsiuk! Ilagêllo ilûnamasiatik Nalegak atâtagijamik Gûdingat nertorpât, okᴋolutiglo opigilakillo Nalegak attannerlo;

²¹ Tunnijilutiglo Nalekamut tunergutinik; uvlublo aipangata uvlângoningane, tunnijivut tunnergutinik ôtaksanik tuktuvângnik 1,000 dinik, sauganik angusâllungnik 1,000 dinik, saugârsungniglo 1,000 dinik, tunnergutiksat immiksat ilautilugit, tunnergutiksallo asingit sulle unuktovaksuit Israelitit ilûnamasiatik pivlugit.

²² Nerrivullo immerlutiglo uvlorme taipsomane Nalekab sângane ᴋuviasuvaksoadlarlutik. Salomolo Davidib erninga atanningortipsarpât, mingoarlugolo atanningortipât Nalekamut, Zadokelo ajuᴋertuijersoangortipât.

²³ Taimâk Salomo ingipok Nalekab iksivautaksoanganut, atanniovlune atâtane Davide innangêrdlugo, pilloridlalaukporlo; Israelitillo ilûnamasiatik nalakpât.

²⁴ Angajoᴋâksuillo songojullo ilûnatik atanniublo Davidib erningita ilûnatik atannek Salomo attannerilerpât.

²⁵ Nalekablo Salomo angijoksotipa Israelitit ilûnamasiatik sângine, tunnitsivigivâlo atannionerub ânanaudlarninganik, tapsoma sivorngane Israelitit atanningita nalliata pigilaungitanganik.

²⁶ Davidele Isaib erninga atanniôlaukpok Israelitinut ilûnamasianginut.

²⁷ Atanniôtiningatalo nalliuninga Israelitinut, Jahreôvut 40 git. Hebroneme atanniotilaukpok jârinik 7 nik, Jerusalemêlo jârinik 33 inik.

²⁸ Toᴋolunelo inutoᴋaunerme idluartome, kiglimorlune, akluidlarlune, opigijaulunelo. Erningalo Salomo atanningorpok innangêrdlugo.

²⁹ Atanniuble Davidib illuserivalauktangit, sivorlit kingorlîllo, ahâk, makkoa aglagutigijaumavut Samuelib takkojub unipkausingine, nallautaijublo Nathanib unipkausingine, Gadiblo takkojub unipkausingine,

³⁰ Atanniotininga pitsartuneᴋarningalo, nalliunerillo ᴋângertingit, Israelitillo atanniovillo nunane ilûnatik ᴋângertingit, ilaliudlugit.