I Kronika 28 - Labrador Inuttitut Heritage Bible

Angajoᴋait katimaningat, Davidiblo âkᴋiksoiningata kingorlerpângat.

¹ Davidiblo Israelitit angajoᴋangit ilûnaita kattiᴋovait Jerusalemut, tagva kinguvaret angajoᴋangit, ingmigolingajullo atannermik naipertortut angajoᴋangit, angajoᴋaillo 1,000 dinut 100 dinullo, pimaklertit atanniub perᴋutinginik, nergjuteᴋotinginiglo, erninginiglo, aulatsijullo atanniub iglunganik, sôngojullo angutillo angutaudlartut ilûnatik ilagilugit.

² Davidelo, atannek nikkovipok nangerlunelo oᴋarlunelo: Nalaksinga ᴋatangutikka inuᴋotikkalo. Issumalaukpunga iglomik iglolioromavlunga Nalekab angerningata iklervingata merngoêrserviksanganik, ikkovraksamiglo Gûdipta itiganginut, oppalungaijarlaukpungalo iglolioromavlunga.

³ Gûdible oᴋautsauᴋolaukpânga: Igvit, atera iglolioraksaringilat; sorsuktuksaugavit, aungmiglo kovisilaukpotit.

⁴ Taimaigalloarmat, Nalekab Israelib Gûdingata annerilaukpânga atâtama iglomioᴋatinginit tamainit atannioᴋovlunga Israelitinut soraijuitomik. Judakut annerilaungmagit atannioᴋovlugit, Judakunillo atâtakukka atâtamalo erningita akkorngane uvanga ᴋuviagilaukpânga atanningortilunga Israelitit ilûnamasianginut.

⁵ Ernimalo ilûnatik akkornganit (Nalekab ernernik unuktunik tunnitsivigilaungmanga) ernera Salomo annerilaukpa, iksivajuksaungmat Nalekab atanniovingata iksivautaksoangane Israelitinut atanniovlune.

⁶ Oᴋautilaukpângalo: Ernerpît Salomob igluga, inneᴋotikkalo avaluliorsimajut iglolioraksarivait; annerilaurapko ernerijomavlugo, uvangalo atâtaujomavunga tapsomunga;

⁷ Atannioningalo nakᴋititsomavara soraijuitomik, katsungaidlune pinniarniarpat perᴋojakka idluarijakkalo malliklugit, sorlo uvlome ilingangmat.

⁸ Mânna Israelitit ilûnamasiangita Nalekab ilagêktoᴋotingita Nalekablo siutekita sângangne, (kaiblarpapse): Mallileritse pinniarluselo Nalekab Gûdipse perᴋojanginik tamainik, nuna ajungitok pigênarlugo piᴋovluse, kingormgutijaksautilugolo ᴋitorngapsingnut piᴋovluse kingunapse soraijuitomik.

⁹ Igvillo ernik Salomo, atâtavit Gûdinga illitarileruk, kivgartorlugolo omamut tamânut, tarnimullo ᴋunujuitomut. Nalekab omattit ilûnaita nautsertormagit, issumaillo tamaita issumaksarsiorningit tukkisivait. Kennerniarungne nachvârniarpat; ᴋemaniarungnele, ajaktorniarpâtit soraijuitomik.

¹⁰ Takkolerit mânna, Nalekab annerilaungmattit, iglomik igluliorlutit piᴋovlutit ivsornaitomut, maksoalerit sanalugolo.

¹¹ Davidiblo ernine Salomo ôktutiksamik tunnitsivigiva torksomut, iglunganullo, inullo pivianartotalingnut, inninullo ᴋollânêtunut, aiparutsinullo, kamanêtunut, iksivautablo saimânnartoliub inniksanganut;

¹² Oktotiksaniglo tamainut omamigijaminut, tagva innemut avaluliorsimajomut Nalekab iglungane, innenullo ilûnainut avatanê, Gûdib iglungata perᴋotitalinganut, innemullo ivsornaititaumajunut illingajomut;

¹³ Ajuᴋertuijut, Levitillo ingmigolingatitaumaninginut kivgartornerublo pinniaraksanginullo tamainut Nalekab iglungane; illulerᴋutinullo tamainut kivgartornermut Nalekab iglungane illingajunut;

¹⁴ Goldiojunut, Goldib oᴋumaininga malliklugo, illulerᴋutinut ilûnainut kivgartornerit nallianut illingajunut, illulerᴋutinullo Silbereôjunut, ilûnainut, oᴋumainingit malliklugit, illulerᴋutinut tamainut kivgartornerit nalianut illingajunut.

¹⁵ Nanergoabvillo Goldeôjut ᴋollingitalo Goldeôjut oᴋumaininginik, nanergoabvit ᴋollingitalo attunît oᴋumainingit malliklugit, nanergoabvillo Silbereôjut, ᴋollingitalo attunît oᴋumainingit malliklugit, nanergoabvit attunît attoraksangit malliklugit.

¹⁶ Tunnitsivigivâlo Goldemik ᴋakᴋojat takkojaksat sânginut, sât nallianut oᴋumaijuksauninganik, taimâktauk Silberemik sânut, Silbereôjuksanut.

¹⁷ (Oktutiksaniglo) kappûᴋautinut, pôgutanullo illulerᴋutinullo Goldemit ilaᴋangitomit, ermgusiarsungnullo Goldeôjunut, ermgusiarsuit nalliata oᴋumaininga malliklugo, ermgusiarsungnullo Silbereôjunut, ermgusiarsuit nalliata oᴋumaininga malliklugo.

¹⁸ Iserluanijutiksallo Altaringanut, Goldeôjomit ilaᴋangitomit, oᴋumaininga malliklugo; Kerubiglo Goldeôjuk ᴋamutikita oktutiksanganik, issângajuk ulliktuglo ᴋollâne Nalekab angerningata iklervinganik.

¹⁹ Tamakkoa tamaita aglagutigijaumavut Nalekab agganginut ajuᴋertortigilauktama oktutiksab piniarninginik tamainik.

²⁰ Davidelo oᴋarpok ernerminut Salomomut: Maksoalerit mungotaililutillo, sanalugolo, sivuraniarnak ᴋoaksanganiarnaglo. Gûdib Nalekab Gûdima aipariniarpâtit, agganelo erᴋitiniangilait ᴋemangniangilâtillonêt, pijarêrtitsiᴋârtinak piniaraksanik tamainik Nalekab iglungata kivgartortauninganut illingajunik.

²¹ Ahâglo, manêput ajuᴋertuijut, Levitillo ingmigolingajingit, piniartauᴋojaujunut ilûnainut Nalekab iglungane illingajut, ilagivâtit sullijaksane ilûnaine, ᴋunujuilutiglo silatuneᴋalarmiglo sullijaksanut tamainut; taimaglo angajoᴋaunerôjut inugasaksuillo ilûnaita, piniartauᴋojarnut illinganiarput.