I Kronika 26 - Labrador Inuttitut Heritage Bible

Udsertortut upkoanik; pimaklertit pivianartunik, idluarsaijullo.

¹ Upkoat udsertortingita ingmigolingatitauningit. Korekunit Meselemjaôlaukpok Korib erninga, Assafib erninginit pijok.

² Meselemjable erningit tapkoangolaukput: Sacharja erniangoᴋârtok, Jediael tuglek, Sebadja pingajuat, Jatniel sitamangat,

³ Eliam tallimangat, Johanan pingasojoat, Elioenai 7 ingat,

⁴ Obed Edomib erningit tapkoangolaukput: Semaja erniangoᴋârtok, Josabad tuglek, Joa pingajoat, Sachar sitamangat, Nethaneel tallimangat,

⁵ Amiel pingasojoat, Isaschar 7 ingat, Pegulthai 8 ingat; Gûdib pitsartutilaungmago.

⁶ Erningalo Semaja erniangoviolaurivok ernernik atâtagijamik iglungane atanniotijunik angutaudlarlauramik sôngolauramiglo.

⁷ Semajab erningit tapkoangolaukput: Athni, Refaello, Obedelo, Elsabadelo (ᴋatangutelik erkinaitunik) Elihu, Samachjalo.

⁸ Tapkoa ilûnaita Obed-Edomib erninginit pilaukput, tapkoa erningillo ᴋatangutingillo ilaliudlugit angutit erkinaitut, pikᴋariktut sullijaksanut, 62 ôlaukput Obed-Edomemit.

⁹ Meselemja erneᴋalaukpok ᴋatanguteᴋalarmelo, angutinik erkinaitunik 18nik.

¹⁰ Hossalo Merarib ᴋitornganginit pijok, erneᴋalaukpok, Simri erᴋanarnerpâk (erniangoᴋârtôlaungilak, atâtangatale erᴋanarnerpângortipâ),

¹¹ Hilkia tuglek, Tebalja pingajoat, Sacharja sitamangat. Hossab erningit ᴋatangutingillo kattilugit 13 ôlaukput.

¹² Tapkonunga upkoanik udsertortut ingmigolingajut pilaukput, angutit niakungit malliklugit, pigârtut ᴋatangutimik saniane, tapkoa kivgartortilugit Nalekab iglungane.

¹³ Imerautillo attortaulaukput pijariakitut, pijariaᴋortojullo pivlugit, upkoat ilûnatik attunît pivlugit.

¹⁴ Imeraut kitâne nallautsivok Meselemjamut; erningale Sacharja attannertuijolauktok silatôjok, imerautigijaulaurivok, imerautalo nallautsivok tachânut;

¹⁵ Obed-Edomemulle erninginullo seᴋernganut Esupimib iglungata saniane.

¹⁶ Suppimemullo Hossamullo kangianut upkuame Salachetemik atelingme, apkosiniub takpaungarviane, udsertortut asingita saniane.

¹⁷ Kitâne Leviteᴋalaukpok pingasojortunik, tachane uvlut tamaita sitamanik, seᴋerngane uvlut tamaita sitamanik, Esupimemelo maggûngnik, maggûngniglo;

¹⁸ Parbaremêlo kangiane sitamanik, apᴋosiniub kiglingane, maggûngniglo Parbareme.

¹⁹ Tagva upkoat udsertortingita ingmigolinganingit Korib erninginit Merariblo erninginit pijut.

²⁰ Levitinillo Ahia pimaklerteôlaukpok Gûdib iglungata pivianartoᴋotinginik, pivianartuniglo ivsornaititaumalauktunik Nalekamut.

²¹ Laedanib erninginit Gersonib erninginit pijomit. Laedanemit angajoᴋakalaukpok atâtanut Jehielemik.

²² Jehielib ernigik Setham nukangalo Joel, pimaklerteôlaukpûk Nalekab iglungata pivianartoᴋotinginik.

²³ Amramekunit, Jezeharekunit, Hebronekunillo, Usielekunillo.

²⁴ Sebuele, Gersomib erninga, Mosesib erningata angajoᴋaulaukpok pivianartunut.

²⁵ Nukangale Elieser atautsemik erneᴋalaukpok, Rehabjamik, tapsoma erninga Jesajaôlaukpok, tapsoma erninga Jorameôlaukpok, tapsoma erninga Sichriôlaukpok, tapsoma erninga Salomitheôlaukpok.

²⁶ Salomith tamna ᴋatangutingillo angajoᴋaulaukput perᴋutenut pivianartunut tamainut, ivsornaititaumalauktunut atanniub Davidib, atâtallo angajoᴋaunerôjut, angajoᴋait 1,000 dinut, 100 dinullo, akkorngane, sorsuktuksallo angajoᴋangita ivsornaitilauktanginut.

²⁷ Unatadlarnermit aksarnigaujunillo ivsornaitilaukpait, Gûdib iglungata âkᴋiksortaujutiksanganut illingaᴋovlugit.

²⁸ Samueliblo takkojub ivsornaitilauktangit, Sauliblo, Kisib erningata, Abneriblo, Nerib erningata, Joablo, Zerujab erningata ivsornaitilauktangit, (perᴋutit) ivsornaititaumajut ilûnaita Selomithib ᴋatangutingitalo agganginut aulataulaukput.

²⁹ Jezeharikunit Kenanja, erningillo ilagellugit sullijaksanut sakᴋijartunut Israeleme, aulatsijôlaukput, idluarsaijolutiglo.

³⁰ Hebronekunit Hasabja ᴋatangutingillo, inuit erᴋinaitut 1,700 dit, angajoᴋangortitaulaukput Israelitinut Jordanib miksâne, kangiane, Nalekab illusionᴋojangit tamaita pitjutigellugit, kivgartornerlo atannermik pivlugo.

³¹ Hebronekunit Jera niaᴋôlaukpok Hebronekut atâtagijangita kinguvângita akkorngane. Davidib atannioningata jâringita 40 gingane nautsertortaulaukput, nachvârtoᴋalaukporlo akkorngane Jaesereme Gileademêtome angutinik erᴋinaitunik.

³² ᴋatangutingillo angutit erᴋinaitut 2,700, ilûnatik niaᴋôjut. Davidiblo angajoᴋângortipait Rubenekunut, Gadekunullo, kinguvarêllo Mânnassekut ketterᴋanginut, Gûdib atanniublo illusionᴋojangit tamaita pitjutigellugit.