I Kronika 23 - Labrador Inuttitut Heritage Bible

Levitit kittitauningit sullijaksaᴋartitauningillo.

¹ Davidelo inutoᴋaulermat, inôsermiglo nâmaksigame, ernine Salomo atanningortipa.

² Davidiblo angajoᴋajet Israeleme ilûnaita, ajuᴋertuijullo, Levitillo kattiᴋovait,

³ Levitit kittitauᴋovlugit jâreᴋartut 30inik unurnersaniglo; unurningillo niaᴋomit niaᴋomut 38,000 diolaukput, anguteôjut sôngojut.

⁴ Tapkonangat 24,000dit perᴋojauvut, pinniaraksat Nalekab iglungane pinniarlugit; 6,000 dillo angajoᴋangorput, idluarsaijungorlutiglo;

⁵ 4,000 dillo udsertortungorput upkoanik; 4,000 dillo imgerlutik, nertordlertungorput Nalekamik, noᴋakseralingnik, sanalauktamnik (Davide oᴋarpok) attorlutik, nertordlerutiksanik imgerlutik piᴋovlugit.

⁶ Davidiblo avikpait ingmigolingajunut Levib erningit, tagva Gerson, Kahat, Merarilo, malliklugit.

⁷ Gersonekunit tapkoangolaukput: Laedan, Simeilo.

⁸ Laedamib erningit: Sivorlek Jehiel, Sethamelo, Joello, tapkoa pingasut.

⁹ Simeiblo erningit tapkoangolaukput: Salomith, Hasielelo, Haronelo, tapkoa pingasut. Tapkoa angajoᴋaunerôlaukput atâtat Laedanekut akkorngane.

¹⁰ Simeiblo erningit: Jahath, Sinalo, Jeuselo, Brialo. Tapkoa sitamat Simeib ernerilaurivait.

¹¹ Jahatelo sivorliôlaukpok, Sinalo tugliôlaukpok. Jeuselo, Brialo erneᴋalaungilak unuktunik, tamânna pivlugo atâtab atautsib kinguvângititut kittiᴋassiutitauvut.

¹² Kahatib erningit tapkoangolaukput: Amrame, Jazeharlo, Hebronelo, Usielelo, tapkoa sitamat.

¹³ Amramib ernigik tapkoangovûk: Aron, Moselo. Aronele ingmigolingatitaumalaukpok, ivsornaititauᴋovlugo ivsornainerpangojomut, tamma erningillo soraijuitomik, iserluanititsilerlutik Nalekab sângane, kivgartorlutiglo saimartitsilutiglo Nalekab atingane soraijuitomik piᴋovlugit.

¹⁴ Mosesiblo Gûdib angutingata erningit taiᴋasiutitauvut kinguvarêt Levikut akkorngane.

¹⁵ Mosesible ernigik tapkoangolaukpûk: Gersom, Elieserelo.

¹⁶ Gersomib erningit: Sivurlek Sebuel.

¹⁷ Elieserib erningit: Rehabja, sivurlek. Elieserelo assianik erneᴋalaungilak. Rehabjable erningit unuktovaksolaukput.

¹⁸ Jezeharib erningit tapkoangolaukput: Salomith, sivurlek.

¹⁹ Hebronib erningit tapkoangolaukput: Jeraja sivurlek, Amarjablo tuglek, Jehasielo pingajoat, Jakmeamelo sitamangat.

²⁰ Usielib erningit tapkoangolaukput: Micha sivurlek, Jesialo tuglek.

²¹ Merarib erningit tapkoangolaukput: Maheli, Musilo. Mahelib erningit tapkoangolaukput: Eleaser, Kiselo.

²² Eleaserelo toᴋovok erneᴋarane paneᴋalaukporle, ᴋatangutingitalo Kisib erningita tiguvait.

²³ Musib erningit tapkoangolaukput: Maheli, Ederelo, Jeremothelo, tapkoa pingasut.

²⁴ Tagva Levib erningit atâtagijamik iglomioᴋatingita atâtallo angajoᴋaunerôjut akkorngane, sorlo kittitaulaungmatta atingita unurningit malliklugit, niaᴋomit niaᴋomut, pinniarlauktut pinniaraksanik Nalekab iglungane, jâreᴋartunit 20ginik unurnersaniglo.

²⁵ Davide oᴋarmat: Nalekab Israelib Gûdingata inuᴋotine merngoêrsernermik tunnitsivigilaukpait, inneᴋarniarporlo Jerusaleme soraijuitomik.

²⁶ Taimaglo Levitit akjarsijariaᴋarungnaiput iglomik, illulerᴋutiniglo kivgartornermut pijariaᴋartunik.

²⁷ Davidible oᴋausingita kingorlingit malliklugit Levitit kittitaulaukput, jâreᴋartunik 20 ginik unurnersaniglo.

²⁸ Pititaulaukpullo Aronib erningita agganginut, kivgartornermut Nalekab iglungane, avalut iluane, innenelo aiparutsine sujungaititsiᴋovlugillo ivsornaitunik sunatuinarnik, ikajorᴋovlugillo sullijaksane Gûdib iglungane.

²⁹ ᴋakᴋojanullo takkojaksanut sanaukamullo ᴋakᴋortamut, tunnergutiksanut nerᴋiksalingnut, ᴋakᴋojanullo sernaᴋangitunut, tapkonungalo jarrajaupaktunut ᴋallutaujame illingajunut; oᴋumailutanullo ilûnainut, oktutenullo;

³⁰ Nangerᴋovlugillo uvlane tamaine Nalegak ᴋujagilugo, nertorlugolo, taimaglotauk unnune;

³¹ Tunnergutiksallo ôtaksat ilûnaita tunnilugit Nalekamut Sabbatine, takᴋêlânelo uvloksiorvingnelo, unurningit sorlo pijariaᴋarmatta malliklugit, taimailiutsainarᴋovlugit Nalekab sângane;

³² Pinniarᴋovlugillo pinniaraksanik tupperme kattimaviôjome, ivsornaitovingmelo, ikajorᴋovlugillo Aronib erninginik ᴋatangutinginik kivgartornerme Nalekab iglungane.