I Kronika 22 - Labrador Inuttitut Heritage Bible

Davidib attuinaruterininga sunatuinarnik Tempelemut; kaiblainingalo ernerminik Salomomik.

¹ Davidelo oᴋarpok: Gûdib Nalekab iglunga mânetuksauvok, mânelo Altare tunnergutinut ôtaksanut.

² Davidiblo tujormitjet Israelib nunanganêlauktut katterᴋovait; ujaralerijoᴋarᴋojivorlo ujarᴋat ullimârlugit, Gûdib iglunganut illingajuksat.

³ Davidelo âkᴋiksoivok kikkiangnik unuktunik, kikkitsanut upkoanut itterviksoanganêtuksanut, asinginullo kikkiektortaujariaᴋartunut illingajuksanik, ᴋannujarmiglo taimâk angitigijomik kiktitartaujungnangimatta.

⁴ ᴋejungniglotauk kittiksaungitunik Zidonemiut Tirusemiullo âtsingmatta ᴋejungnik Zedereôjunik unuktunik Davidemut.

⁵ Davide isumagame: Ernera Salomo nukapiangovok, nikkanarlunelo, iglole igloliortaujuksak Nalekamut angijojuksauvok, atinga nertornautalo angijororᴋovlugik nunane ilûnaine, tamânna pivlugo attuinaruterivigijomavara sunatuinarnik. Taimâk Davide attuinaruterivok unuktunik toᴋoᴋârane.

⁶ Erninelo Salomo ᴋaikᴋova, perᴋolugolo Nalekab Israelib Gûdingata igluksanga igluliorlugo,

⁷ Oᴋautivâlo: Ernîk, uvanga kajusimalaukpunga Nalekab Gûdima atinga iglomik igloliorlugo.

⁸ Nalekable oᴋausingata tikkipânga, oᴋarlunelo: Aut unuktut kovilaukpattit, unatadlarneᴋalauklutillo angijomik, tamânna pivlugo igvit attera iglulioraksaringilat, auksoarmik taimâk angijoksoarmik kovisilauravit sâmne nunamut.

⁹ Ahâk, ernît, erniangojuksak illingnut, tamna angutaujomârpok uimajangitok; uvanga merngoêrserᴋojomagapko omigijinginit avatinganêtunit tamainit; Salomomik ateᴋartuksaungmat, uvangalo ullapirsaumik, merngoêrsernermiglo tunijijomavunga Israelitinut inôsingane tamât.

¹⁰ Tapsoma attera iglomik iglolioraksariva. Ernerijomavara, tapsomalo atâtagijaksarivânga. Uvangalo tapsoma atannioningata iksivautanga Israelitinut nakᴋiteromavara soraijuitomik.

¹¹ Mânna Nalekab aiparilitit ernîk, sullitsiarᴋovlutit Nalekab Gûdivit igluksanga igluliorlugo piᴋovlutit, sorlo oᴋautigilaungmattit.

¹² Nalekab tunnitsiviginiarpâtittauk silatunermik ilisimanermiglo, Israelitillo perᴋoniarpait illingnut, malliᴋovlutit Nalekab Gûdivit perᴋojanginik.

¹³ Tagva pilloridlarniarpotit, kamatsiaruvit Gûdib perᴋojangit, idluarijangillo, Nalekab perᴋolauktangit Mosesekut Israelitinut malliklugit pinniarᴋovlutit. Maksoalerit mungotaililutillo, sivoraniarnak, ᴋoaksanganaglo!

¹⁴ Ahâk siorniornimne piksarsiorlaukpunga Nalekab iglunganut illingajuksanik Talentinik 100,000 dinik Goldemik, 1,000 dillo 1,000 deêrtorlutik Talentinik Silberemik, tamakkonungalo ᴋannujarnik kittiktartaujungnangitunik, unnudlarmatta; ᴋejungniglotauk ujarᴋaniglo piksarsiorlaukpunga, tapkoa ilaksaᴋartitsungnarpattit.

¹⁵ Sanajullo unuktut illingnêput, ujaralerijut, igluliortullo, sungiusimajullo sullijaksanik sunatuinarnik.

¹⁶ Golde, Silberelo, ᴋannujarlo, kikkierlo, kittiksaungilet. Parngnailerit tagva sanalugolo; Nalekab aipariniarpâtit.

¹⁷ Davidiblo Israelitit angajoᴋangit ilûnaita perᴋovait ernine Salomo ikajorlugo piᴋovlugit.

¹⁸ Nalekab Gûdipse ilagingilâse merngoêrsernermiglo tunnitsivigiluse avatipsingne ilûnane? Tapsoma nunab inungit tunnilaungmagit aggamnut, nunalo nalaktitaumavok Nalekamut, inuᴋotinginullo.

¹⁹ Taimâk mânna omattise tarniselo torartisigik Nalegak ᴋennerlugo. Parngnaileritselo igloliorluselo Gûdemut Nalekamut ivsornaitovingmik, Nalekab angerningata iklervinga, illulerkutillo ivsornaitut pititauᴋovlugit iglomut Nalekab atinganut igluliortaujuksaujomut.