I Kronika 21 - Labrador Inuttitut Heritage Bible

Inugasaksuit kittitauningat, pitlartaunerlo nusilingnartomik.

¹ Satanasib Israelitit akkerartorpait. Davidelo kajungersarpa Israelitit kittitauᴋolugit piᴋovlugo,

² Davidelo Joabemut inugasaksuillo angajoᴋanginut oᴋarpok: Israelitit kittijartorsigik Bersebamit Dane tikkilugo; ᴋailugillo uvamnut, ᴋaujiᴋovlunga unurninginik.

³ Joabe oᴋarpok: Nalegak ilautitsilerle inuᴋotiminut sorlo mânna illingangmatta 100 deêrtortunik unurnersanik sulle; kisianele nalegâk atannek, ilûnaita, nalekama kivgaringilait? Sôgle nalekama tamânna apperᴋutigivauk? Sôg patsitiᴋartuksaulerᴋa Israelitinut?

⁴ Atanniuble oᴋausingit ajugaulaukput Joabemut, Joabelo aularpok agvertarlunelo Israelitit nunangitigut ilûnaitigut, tikkiporlo Jerusalemut.

⁵ Inugasaksuillo kittisimajut unurningit tunnivait Davidemut. Inugasaksuillo ilûnatik unurningit 1,100,000 deolaukput saviksoarmik amusijut, Judakullo 470,000 diolaukput saviksoarmik amusijut.

⁶ Levikullo, Benjaminekullo kittiᴋassiutilaungilait tapkoa akkorngane; Joabib atanniub oᴋausingit makkojugingmagit.

⁷ Gûdible tamânna idluigiva; annauvaillo Israelitit.

⁸ Davidelo oᴋarpok Gûdemut: Angijomik idluitullilaukpunga taimailiorlaurama; mânnale pêjarlauruk kivgavit idluitullininga, silainartomik pilaurama.

⁹ Nalekablo Gade Davidib takkojoᴋotinga oᴋarvigiva, oᴋarlunelo:

¹⁰ Ailerit Davidelo oᴋarᴋattigiuk: Imâk Nalegak oᴋarpok: Pingasunik adsigêngitunik manijervigivagit annerosulerit tapkoa ilanganik, taimailiorᴋovlunga illingnut.

¹¹ Gadiblo Davide tikkigamiuk oᴋautiva: Imâk Nalegak oᴋarpok: Annerosulerit:

¹² Jârinik pingasunik ᴋângnartuniglonêt; ᴋemânermiglonêt takᴋit pingasut nâlugit akkerartortitit pivlugit, omigijivillo saviksoangit pivlugit, anguᴋovlugit illingnik; Nalekab saviksoanganiglonêt, nusilingnartomiglo nuname uvlut pingasut nâvlugit, Nalekab Engelinga asseroiᴋovlugo Israelitit kiglilervingine ilûnaine; tagva issumaksarsiolerit nautsertorlutillo mânna sunamik kiojuksaunimnik tapsomunga tillijimnut.

¹³ Davide oᴋarpok Gademut: Kappiasudlarpunga angijomik; kisianele Nalekab agganginut ᴋatagomavunga, tapsoma napkoarusungninga angijovaksongmat, ᴋatagomangilangalo inuit agganginut.

¹⁴ Tagva Nalekab nusilingnartok tikkerᴋova Israelitinut, ochojoᴋarmat Israeleme angutinik 70,000 dinik.

¹⁵ Gûdiblo Engele tilliva Jerusalemut, asserorlugit piᴋovlugo. Asserorsaitillugolo Nalekab takkova tamânna, ᴋakᴋialerutigivâlo, Engelelo asserorsaijok oᴋautiva: Namaksivok aggaktit erkitikit. Nalekable Engelinga nangerpok Arafnab Jebusitereôjub ᴋakᴋojaksalliorvingata kiglingane.

¹⁶ Davidelo takkosarpok, takkovâlo Nalekab Engelinga nangertillugo ᴋilaub nunablo akkorngangne, saviksoarmiglo kenailitaᴋangitomik tigumiartillugo aggangmine, issautjitillugolo tapsominga Jerusalemut. Tagva Davide angajoᴋaunerôjullo pôngnut ulliksimavlutik pamakterput kênatik pûvlugit.

¹⁷ Davidiblo Gûde oᴋautiva: Uvangaungilanga inugasaksoarnik kittitauᴋojijok? Uvangauvunga idluitullilauktok, namalungitomiglo pinniarlauktok; saugalle ukkoa, sunamik pinniarlauᴋât? Nalegak Gûdik aggaktit torarlit uvamnut atâtamalo iglomioᴋotinginut akkerartorluta inuᴋotingnulloungitok, tapkoa kappiasuktillugit.

¹⁸ Nalekablo Engelingata Gade oᴋautiva: Davide oᴋautilugo piᴋovlugo, Davide majorartuksaungmat Altarelo sanajaksaringmago Nalekamut, Arafnab Jebusitereôjub ᴋakᴋojaksalliorvingane.

¹⁹ Taimâk Davide Gadib oᴋausingit oᴋauserilauktangit Nalekab atingane malliklugit majorarpok.

²⁰ Arnanelo ᴋeviarame erningillo sitamat ilagilugit Engelemiglo takkogame, ijerput; Arnanible Waizen tullertautipait.

²¹ Davide mânna Arnanemut aingmat, Arnan takkosarpok, Davidelo takkova, annilunelo ᴋakᴋojaksalliorvingmit, kênanelo pûvlugo nunamut Davide opigiva.

²² Davidiblo Arnan oᴋautiva: Inniksamik tunnitsivigilaunga ᴋakᴋojaksalliorvingme, Altaremik Nalekamut sanajungnarᴋovlunga tagvunga; namaktomik akkeᴋartillugo tunnijaksarivat uvamnut, pagvisartoâluk soraiᴋovlugo.

²³ Arnanele Davidemut oᴋarpok: Tigusilerit Nalegâk atannek, pinniarlutillo sorlo nâmagijaungmat illingnut, âhâk tuktuvak una tunnivara tunergutiksamut ôtaksamut, tuktuvaublo annungita ᴋejuktangit ikkomaksamut, Weizenelo tunergutiksamut nerᴋiksamut, tamaita tunnivakka.

²⁴ Atannerle Davide Arnanemut oᴋarpok: Taimangungitok, kênaujanulle akkiᴋonartanga malliklugo pisiarijomavara; pigijattit tigujomanginapkit âlugillo Nalekamut, akkeᴋangitomiglo tunnijijomangilanga tunnergutiksamik ikkoalajaksamik.

²⁵ Taimâk Davidib Arnan tunnitsivigiva innemut mattomunga Goldemik, Sekeletut 600 ditut oᴋumaitigijomik.

²⁶ Davidiblo tagvane Altare sanava Nalekamut, tunijilunelo tunergutinik ôtaksanik, ᴋujalijutiksaniglo. Nalegarlo nipliarvigingmago tussarpa ikkomakut ᴋilangmit tunergutiksaliub ôtaksanik Altaringata ᴋângane.

²⁷ Nalekablo Engele oᴋautiva, saviksoane pôlugo kênailitanganut piᴋovlugo.

²⁸ Nalliutome taipsomane Davide takkogame, Nalekab tussarmago Arnanib Jebusitereôjub ᴋakᴋojaksaliorvigijangane, tunnergutinik tunnijijongovok tagvane.

²⁹ Nalekable iglunga Mosesib sanalauktanga sunaᴋajuitome, tunnergutiksaliublo ôtaksanik Altaringat nalliutome taipsomane pôktojomêlaukpûk Gibeoneme.

³⁰ Davidele aijungnarlaungilak tapsoma sânganut Gûde ᴋennerlugo, ᴋoaksarnermut, Nalekab Engelingata saviksoanganik.