I Kronika 20 - Labrador Inuttitut Heritage Bible

Amoniterit iglugasaksoaᴋotingita Rabbamik atigit sâlagijauningat; Filisterillo sâlagijauningat.

¹ Jârelo ᴋângermat, nalliutome atannit aularvigivaktangane, Joabib sorsuktuksaksoaᴋattigêt aularutivait, asserorlâlo Amonib ᴋitorngangita nunangat, tikkilunelo Rabba illumavait; Davidele Jerusalemetuarpok. Joabible Rabba sâlagivait, serᴋomilaitalo.

² Davidiblo atanningata niaᴋotinga tiguva niaᴋunganit, tukkisilâlo Talentetut oᴋumaitigijomik Goldeᴋarmat, ujaraᴋarmallo pivianartunik; illijaulaukporlo Davidib niaᴋoanut. Aksarnigaujoksuillo aularutivaittauk iglugasaksoarnit.

³ Inugasaksuille takkamanetut annitipait avgorlugillo kiblutinut, niksinullo, kuksautinullo kikkiangojunut, Davidib Amonib ᴋitorngangita iglugasaksoaᴋotingit ilûnaita taimailiorvigivait. Davidelo inugasaksuit ilagilugit utterpok Jerusalemut.

⁴ Tamattoma kingorngane sorsungneᴋalerpok Gasereme Filisterinut. Taipsomane Sibechaib Husatemiub Sibai inukpait ᴋitorngangita ilangat ullimârpa; manigotititauvullo.

⁵ Amalo sorsungneᴋalerlaukpok Filisterinut. Tagva Elhananib Jairib erningata Lahemi Goliathib Gathemiub nukanga ullimârpa, ᴋallugiaᴋalauktok ippulingmik umiab naparutangatutitomik.

⁶ Amalo sorsungneᴋalaukpok Gatheme. Tagvane anguteᴋarpok inugangoalingmik 6 inik aggangmine itigaminelo, tagva 24 ôjut, erniangolaurivoktauk inukpanit.

⁷ Mittauteᴋarporlo Israelitinik. Jonathanible, Simeab, Davidib angajuata, erningata ullimârpa.

⁸ Tapkoa erniangolaukput inukpanit Gatheme, ochotitaulutiglo Davidib tapsomalo kivgangita agganginut.