I Kronika 19 - Labrador Inuttitut Heritage Bible

Amoniterit idluitulliningit Davidib tillijanginut, Davidiblo pitlarningninga tapkoninga.

¹ Mattomalo kingorngane Nahase Ammonib ᴋitorngangita atannerijangat toᴋovok, erningalo atanningorpok innangêrdlugo.

² Tagva Davide issumalerpok: Napkiningnermik pinniaromavunga Hananemut, Nahasib erninganut, atâtangata napkiningnermik pinniarvigilaungmanga, tillijaniglo tilliklerpok taipsomunga, manigorlugo piᴋovlugit atâtanga pivlugo. Davidiblo kivgangit Ammonib ᴋitorngangita nunanganut tikkimatta manigoromavlugo;

³ Tagva Ammonib ᴋitorngangita angajoᴋaunerôjungit oᴋarput Hananemut: Isumavît Davidib atâtait opigingmago ijikpît sângangne, manigoijunik tilliklervigilaungmattit? Ilâ kivgangit tikkisimavut illingnut nausaᴋarlutik, asseroijomavlutiglo, nunalo nautsertoriarlugo.

⁴ Tagva Hananib Davidib kivgangit tiguvait, kipsarvigivait, anorângillo kipjaumiktorpait ᴋetterarlugit, makkitingit tikkidlugit, aularᴋolaitalo.

⁵ Aularpullo, Davidelo oᴋautsauᴋovât tamattominga angutinut. Tamnale tilliklerpok pachrearlugit, (angutit taipkoa angijomik kangusuktitaulaungmatta.) Atannerlo oᴋarpok: Jerichometuaritse, umise, perorsearilugit; tagvalo uttileritse.

⁶ Ammonible ᴋitorngangit takkogamik tippiludlaramik Davidib sângane, Hanan Ammoniblo ᴋitorngangit tillikliutjivut Talentinik 1,000 dinik Silberemik, tikkiᴋojijomavlutik tapkonunga ᴋamutinik, ablangajuniglo horsit ᴋângine, Mesopotamiamit, Maechamillo, Zobamillo;

⁷ Tikkiᴋojilutiglo ᴋamutinik 32,000 dinik, atannermiglo Maechamik inûᴋotine ilagilugit; tapkoa tikkilerput tangmarterlutiglo Medbob sivurânut. Ammoniblo ᴋitorngangit kattilerputtauk iglugasaksoaᴋotimingnit, tikkilerlutiglo sorsugomamut.

⁸ Davidib tamânna tussaramiuk Joabe tilliva sorsuktuksaksoaᴋattigêt sôngojut ilûnamasiatik ilagilugit.

⁹ Ammonible ᴋitorngangit aularsimalaukput, oppalungaijarlutiglo sorsungnermut iglugasaksuit upkoaksoangata sivurâne. Atannille tikkisimajut ingmiᴋorlutik naternamelaukput.

¹⁰ Joabele mânna takkogame sorsungnek torartitaungmat tapsomunga sânganit kingornganillo; annerosulerpok Israelib angutinginit inosuktunit ilûnainit, parngnailerlunelo Siriamiut akkerartoromavlugit.

¹¹ Inugasaksuille asingit pitipait angajume Abisaib agganginut, parngnailerᴋovlugit Ammonib ᴋitorngangit akkerartorlugit.

¹² Oᴋarlunelo: Siriamiut sôngoluarniarpatta uvamnut, tagva ikajoriartorlaunga; Ammonible ᴋitorngangit sôngoluarniarpatta illingnut, uvanga ikkajoromavagit.

¹³ Maksoalerit, maksoavlutalo inuᴋattivut Gûdiptalo iglugasaksoaᴋotingit pinniarutigilavut. Nalegak pinniarle nâmagijaminik.

¹⁴ Joabelo inugasaksuit ilagijane ilagilugit ᴋaglilerpok Siriamiut sorsugvigivlugit; ᴋemâvâllo.

¹⁵ Ammonible ᴋitorngangit takkogamik Siriamiut ᴋemângmatta, Abisai angajua ᴋemâgivât, itterlutiglo iglogasaksoarnut. Joabelo tikkipok Jerusalemut.

¹⁶ Siriamiulle takkogamik sâlagijaunermingnik Israelitinut; tillijanik tilliklerput, tikkiᴋolaitalo Siriamiut kôksub akkianêtut. Sofachiblo Hadadeserib sorsuktuksoaᴋotingita angajoᴋangata sivorlervigivait.

¹⁷ Davide tamattominga oᴋautsaulerame, Israelitit ilûnamasiatik katitipait atautsemut, ingergalunelo Jordane iᴋârlugo; tikkinamigillo parngnailerpok. Davidelo opalungaijarpok Siriamiut sorsugvigijomavlugit, tapkoalo sorsuᴋattigivât.

¹⁸ Siriamiulle Israelitit ᴋemâvait. Davidiblo Siriamiunit ᴋamutit 7,000 dit inungit, 40,000 dillo angutit pisuktut toᴋopait; ilaliudlugillo Sofache sorsuktuksaksoaᴋattigêt angajoᴋangat toᴋopa.

¹⁹ Hadadeseriblo kivgangit takkogamik sâlagijaunermingnik Israelitinut, ullapirsautiksaliorput Davidemut kivganginullo. Siriamiullo Ammonib ᴋitorngangit ikajoromairpait.