I Kronika 18 - Labrador Inuttitut Heritage Bible

Davidib sâlaᴋarningit sunatuinait; pimaklertoᴋotingillo.

¹ Tamakkoa kingorngane Davidib Filisterit ullimârpait mannigotitipaillo, aksarnigarivaillo Gathe, aiparusingillo Filisterit agganginit.

² Moabiterittauk ullimarlaurivait; taimâk Moabiterit kivgaulerput Davidemut, âtsilutiglo pilliutinik tapsomunga.

³ Hadad Eseretauk, Zobab Hematemêtub attannertanga sâlagigiva ingerarame atanniovine tunganilititsomavlugo kôngme Fratemik atelingme.

⁴ Davidiblo tiguvait tapsomangat ᴋamutit 1,000 dit, horsillo ᴋângine ablangajut 7,000 dit, angutillo pisuktut 20,000 dit. Davidiblo ᴋamutit ilûnaita ilaᴋungortipait, ᴋamutillo 100 dit amiakoᴋovait.

⁵ Siriamiullo Damaskusemiut tikkilerput Hadadeser Zobab atannertanga ikajoromavlugo. Davidible Siriamiut tapkoa angutit 22,000 dit ullimârpait.

⁶ Sorsuktuksaᴋartitsivorlo Damaskuseme, taimaglo Siriamiut kivgaulerput Davidemut, âtsilutiglo pilliutinik, Nalekab ikajormago aivigijangine tamaine.

⁷ Davidib sappulutat Goldeôjut Hadadeserib kivgangita pigijangit tiguvait, âlugillo Jerusalemut.

⁸ Taimâktauk Davide Hadadeserib iglugasaksoaᴋotinginit Tibeatemit, Kunemille tigusivok ᴋannujavaksoarnik. Tamattomangat Salomob immarbingoak ᴋannujaujok, nappajuglo, illulerkutillo ᴋannujaujut sanavait.

⁹ Togullo Hematib atannertanga tussarame, Davidib Hadadeserib Zobab attannertangata sorsuktuksaᴋotingit ilûnaita ullimarlaungmagit:

¹⁰ Ernine Hadoram tilliva attannermut Davidemut, salutitauᴋovâlo, saimartitauᴋolugolo, Hadadeser sorsugvigilaungmago ullimârlaungmagolo. (Togu unatarneᴋarmat Hadadeseremut) Tamnalo ilagellugo illulerᴋutinik sunatuinarnik Goldeôjunik Silbereôjuniglo, ᴋannujaujuniglo,

¹¹ Tamakkoalotauk atanniub Davidib Silberit Goldillo inuᴋattigêksoarnit, tagva Edomiterinit, Moabiterinillo, Amoniterinillo, Filisterinillo, Amalekiterinillo, tigulauktangit ilaliudlugit perᴋotautipait Nalekamut.

¹² Abisaiblo Zerujab erningata Edomiterit ullimârpait, sioraujab nâksangane, 18,000 dit;

¹³ Sorsuktuksaᴋartitsivorlo Edomeme; Edomiterillo ilûnatik kivgangorput Davidemut. Nalekab Davide ikkajormago aivigijangine tamaine.

¹⁴ Taimâk Davide atanniotilaukpok Israelitinut ilûnamasianginut, attorlunelo idluarsainermik idluarnermiglo inugasaksoarnut ilûnamasianginut.

¹⁵ Joab Zerujab erninga angajoᴋaulaukpok sorsuktuksaksoarnut. Josafate Ahiludib erninga angajoᴋaulaukpok aglakpaktunut.

¹⁶ Zadok, Ahitub erninga, Abimelechelo Abjatarib erninga ajuᴋertuijolaukpûk, Sausa aglakpakteolaukpok.

¹⁷ Benaja, Jojadab erninga angajoᴋaulaukpok Kretinut Pletinullo. Davidiblo erningit atanniub najorivait ikkajortigilugit.