I Kronika 17 - Labrador Inuttitut Heritage Bible

Davidib ᴋajusimaninga Tempelemik sanajomavlune; Mesiasiblo angerutigijauninga.

¹ Pijoᴋalaukporlo Davidib iglune innigilauramiuk, oᴋarpok nallautaijomut Nathanemut: Ahâk, uvanga iglo Cederenit sanamajok innigivara, Nalekablo angerningata iklervinga itsat attanêpok.

² Nathanib Davide oᴋautiva: Tamaita omamigijattit pinniarkit, Gûdib aiparingmattit,

³ Unnuarmele taipsomane Gûdib oᴋausinga tikkipok Nathanemut, oᴋarlunelo:

⁴ Ailerit Davidelo kivgara oᴋautiuk: Imâk Nalegak oᴋarpok: Igvit iglolioraksaringilarma inniksamnut illingajomik.

⁵ Iglome ineᴋalaunginama uvlormit taipsomanemit Israelib ᴋitorngangit aularutilaurapkit, uvlok tamânna tikkilugo; ailaukpungale tuppermit tuppermut, innemillo innemut.

⁶ Agvertarvigilauktamne Israelitit ilûnamasiatik akkorngane, idluarsaijut nalliat perᴋolauktara inûᴋotikka pairilugit, oᴋautilauralloarpigo, oᴋarlungalo: Sôg igloliorlungipisinga Cederelingmik?

⁷ Tagva mânna oᴋalerit kivgamnut Davidemut: Imâk Nalegak Zebaote oᴋarpok: Tigulaukpagit iviksukatalingmit saugat kingornganit, atanniojuksauᴋovlutit inûᴋotimnut Israelitinut,

⁸ Aiparilaukpagillo nâmut aivigijarnut, omigijitillo pêjarlaukpakka sivunerne, ateᴋartilaukpagillo sorlo angijoksuit nuname ateᴋarmatta.

⁹ Inûᴋotikkale Israelitit inneᴋartitsomavakka illijomavakkalo, tagvane inneᴋarᴋovlugit, aulajungnaititauᴋovlugillo, inuillo kassêtut nukingêrotititaksarijungnaipait sivornganetut,

¹⁰ Nalliutunelo taipsomanetut idluarsaijut perᴋolaurapkit angajoᴋauᴋovlugit inûᴋotimnut Israelitinut; omigijitillo ilûnaita manigotititsomavakka; nallojungnaitipagillo Nalekab igvit iglomik iglolioromangmattit.

¹¹ Uvloᴋotitille annigoromârpatta, aivlutit atâtagijarnut, tagva kinguvâksattit kingunerne ernivît ilangat makkititsomavara, tamna atanniovinganik nakᴋiterivigijomavara.

¹² Tapsoma iglomik iglolioraksarivânga, iksivautangalo nakᴋiteromavara issoᴋangitomut.

¹³ Uvanga atâtaujomavunga taipsomunga, taimnalo erniojuksauvok uvamnut. Napkiningningneralo pêjaromangilara taipsomangat, sorlo pêjarlaurapko taipsomangat sivunernelauktomit.

¹⁴ Pititsomavarale iglumnut atannioviᴋotimnullo soraijuitomik, iksivautanga soᴋosijuiᴋovlugo isoᴋangitomut.

¹⁵ Nathaniblo oᴋautsit tamakkoa tamaita malliklugit, takkotitsuglo tamânna tamât malliklugo Davide oᴋarvigilaukpa.

¹⁶ Tagva atannek Davide ᴋaivok nokᴋangalunelo Nalekab sângane oᴋarlunelo: Kinauvîk Nalegak Gud, iglomioᴋatikkalo sunauvât, mânna tikkidlugo âlauramga?

¹⁷ Tamânnalo suglugilaukpat sulle Gûde, kivgaville iglunga pivlugo, ᴋaningitut pijomârtullo oᴋautigilaukpattit sulle; takkonalaukparmalo inûb illusinga malliklugo Gûdeogalloarlutit, Nalegaujok ᴋotsiktome.

¹⁸ Sunamiglo anginersamik Davide oᴋartuksauva illingnut, kivgait ânanausigangne? Kivgait illitarivat.

¹⁹ Nalegak kivgait pivlugo, ommatit malliklugo tamattominga tamât pijarialiksoarmik pinniarlaukpotit, nallonêrsilutillo pijariaᴋortôjomik tamattominga tamât.

²⁰ Nalegak adseᴋangilatit, Gûdeᴋangilarlo asingnik, taimaimariklutit sorlo siutiptingnut tussarlaurapta.

²¹ Nanelo inuᴋattigêksoaᴋarᴋa nuname inuᴋotititut Israelititut, Gûdib aijutigijangititut, ingminut inugasaksoarnik piulikleromavlune, ateᴋartitsomavlunelo ingminut, pinniarnernut pijariaᴋortôjunut, kappianadlartunullo, inuᴋattigêksuit pingudlalaurangne inuᴋotivit sivorngane piulilauktavit Egiptenemit?

²² Inuᴋotitillo Israelitit inuᴋotingortilaukpattit illingnut isoᴋangitomut; igvillo Nalegak Gûdingorlaukpotit tapkonunga.

²³ Mânna Nalegak oᴋautsit oᴋauserilauktattit kivgait pivlugo, iglungalo pivlugo, nallautsilerlit soraijuitomik, pinniarlutillo sorlo oᴋalauravit.

²⁴ Ilâ mikesᴋârlit, attit angijororᴋovlugo isoᴋangitomut, oᴋartoᴋarᴋovlugo: Nalegak Zebaoth, Israelib Gûdinga Gûdeôvok Israelitinut, kivgavillo Davidib iglunga soᴋosijuile sângne.

²⁵ Ivgit Nalegak kivgait nallojungnaitilaukpat iglomik iglolioromagangne, tamânna pivlugo kivgait nachvârpok tuksiararijaminik sângne.

²⁶ Mânna Nalegak, igvit Gûdeôvotit, ajungitorlo taimaitok oᴋautigilaukpat kivgarnut.

²⁷ Mânna pigiarit kivgavit iglunga pitsartutilugo sângnetsainarᴋovlugo soraijuitomik; saimartitattit saimartisimangmatta soraijuitomik.