I Kronika 14 - Labrador Inuttitut Heritage Bible

Davidib nuliagit ᴋitorngangillo. Filisterit sâlagijauningit

¹ Hiramiblo Tirusib atannertangata Davide tilliklervigiva tillijanik, ᴋejungniglo Cederinik, ᴋarmaliorteniglo iglulliortiniglo, iglomik iglolliorᴋovlugit tapsomunga.

² Davidelo tukkisilerpok Nalekab atannioninga Israelitinut nakᴋiterlaungmago; atanniovinga angijorortitaungmat inuᴋotingit Israelitit pivlugit.

³ Davidelo arnanik unurnersanik nuliaikpok sulle Jerusaleme, ernetarnersaulunelo panitarnersaularmelo sulle unurnersanik.

⁴ Tamadsalo Jerusaleme erniangolauktut tapsomunga atingit: Samua, Sobabe, Nathan, Salomo,

⁵ Jebehar, Elisua, Elpalet,

⁶ Noga, Nefeg, Jafia,

⁷ Elisamma, Baeljada, Elifalet.

⁸ Filisterillo tussaramik Davide mingoartauvlune atanningortitaumangmat Israelitit ilûnamasianginut, tagva ilûnatik aularlutik majorarput takpaunga Davide ᴋenneromavlugo. Davide tamattominga tussarame aularpok pâromavlugit.

⁹ Filisterillo tikkilutik tangmarterput Refaimib naksangane.

¹⁰ Davidiblo Gûde apperiva, oᴋarlunelo: Paunga majorartuksauvik Filisterit akkerartorlugit, tunnijomavigillo aggamnut? Nalekab oᴋautiva: Majorarit takpaunga, tunnijomavakka aggangnut.

¹¹ Tagva aularput Baalprazimemut, Davidiblo ullimârpait tagvane. Davidelo oᴋarpok: Gûdib omigijikka aggaptigut alliktorpait, sorlo immiksuit suppingmatta. Tamânna pivlugo inne tamna atserarpât Baalprazimemik.

¹² Gûdingoaᴋotitiglo ᴋemmakpait, Davidiblo ikkitauᴋovait ikkomamut.

¹³ Filisterille ama tikkilaurivut tangmarterlutiglo naksarme.

¹⁴ Davidiblo Gûde ama apperiva. Gûdiblo oᴋautiva; Majorartuksaungilatit takpaunga kingorngattigut, sangulerille tapkonangat, tikkiᴋovlutit tapkonunga nappartut Maulbeeregit sâdlugit.

¹⁵ Tussarniaruvillo nappartut Maulbeeregit pappingita ᴋeasungninginik tagva opaksârit sorsungnermut; Gûdib aularᴋârmat illingnit Filisterit katimgajoksoangit annaulugit.

¹⁶ Davidelo taimailiorpok sorlo Gûdib perᴋolaungmago, ullimârpaillo Filisterit katimgajoksoangit Gibeonemit Gaser tikkidlugo.

¹⁷ Davidiblo atinga oᴋausiolaukpok nunane tamaine, Nalekablo inûᴋattigêksuit ilûnaita tupviotipait sivuranermik tapsominga.