I Kronika 13 - Labrador Inuttitut Heritage Bible

Angersimanerub iklervingata aijauninga Kiriat-Jearimemit; âtauningalo Obed Edomib iglunganut.

¹ Davidiblo angajoᴋait 1,000 dinut 100 dinullo, angajoᴋaillo ilûnaita ᴋachimioᴋattigivait,

² Oᴋarlunelo Israelitit ilagêngninginut ilûnainut: Namagijaukpat illipsingnut, Gûdemillo Nalegaptingnit pikpat: tagva tilliklerta ilûnânut, ᴋatangutiptingnut assiptingnut Israelib nunangine ilûnainetunut, ilagilugillo ajuᴋertuijunut Levitinullo iglugasaksoarmingnetunut, katimalerᴋovlugit uvaptingnut.

³ Gûdiptalo iklervinga ailermilavut uvaptingnut, Saulib nalliuningane kamagilaunginaptigo.

⁴ Tagva ilagêt illuêngarlutik oᴋarput, taimailiortoᴋartuksaungmat; tamânna inugasaksuit ilûnatik namagingmatsuk.

⁵ Taimâk Davidib Israelitit ilûnamasiangit katiᴋovait, Sihoremit Egiptenib (kônganit) Hemat tikkidlugo, Gûdib iklervinga ailugo Kiriat Jearimemit.

⁶ Davidelo majorarpok Israelitit ilûnamasiangit ilagilugit Kiriat-Jearimemut Judametomut, tagvangat takpaungartitsomavlugo Gûdib iklervinga, Nalekab iksivajub Kerubit ᴋângine, atiub tuksiarvioviane.

⁷ Gûdiblo iklervinga ᴋemuksiutitauᴋovât ᴋamutingnut nutângnut, Abinadab iglunganit; Usablo Ahiablo ᴋamutik aulatipâkik.

⁸ Davidele Israelitillo illuêngarlutik Gûdib sivorngane pitsartunermingnut tamainut attorput imgerutinik, Harfiniglo, Psalteriniglo, kilautiniglo, Cimbeleniglo, tiptulautiniglo,

⁹ Tikkimattale Kidonib ᴋakᴋojaksaliorvinganut, Usab aggane issakpait iklervik najumijomavlugo; tuktuvâk sangulermannik.

¹⁰ Tagva Nalekab nigarninga ilûngertulerlaukpok Usa pivlugo, annauvâlo tamânna pivlugo aggane issalaungmagit iklervingmut, toᴋovorlo tagvane, Gûdib sângane.

¹¹ Tagva Davide kiksalerpok Nalegak taimaitomik ᴋoppaᴋartitsilaungmat Usame, innelo tamna taiva Perez-Usamik uvlok tamânna tikkilugo.

¹² Davidiblo Gûde illimagiva uvlorme taipsomane, oᴋarlunelo: ᴋanok Gûdib iklervinga ᴋaititaksarivigo uvamnut?

¹³ Taimâk Davidib Gûdib iklervinga ingminut âtauᴋolaungila Davidib iglugasaksoanginut, pititauᴋovâle Obed Edomib Gathemiub iglunganut.

¹⁴ Taimâk Gûdib iklervinga takᴋit pingasut nâlugit Obed Edomib iglunganêtuarpok. Nalekablo Obed Edomib iglomioᴋatingit, tamaitalo pigijangit pitsartutipait.