I Kronika 10 - Labrador Inuttitut Heritage Bible

Saulib toᴋotauninga unatadlarnerme Filisterinut.

¹ Filisterit Israelitit sorsugvigivait. Israelitillo Filisterit ᴋemâvait, ullimarsimajullo ochovut ᴋakᴋame Gilboamik atelingme.

² Filisterille Saul erningillo tunârivlugit unangmivait, ullimarpaillo Jonathan, Abinadabelo, Malchisualo, Saulib erningit.

³ Sorsungnerlo songudlalaukpok Saulemut, pittiksertullo tikkipât, pittiksertunullo ikkilertaulaukpok.

⁴ Tagva Saul sakkunginik akjarsijomut oᴋarpok: Saviksuit amuleruk kappilungalo toᴋolaunga tapsomunga, kippisimangitut tapkoa ᴋaiᴋonnagit, idluitomiglo pinniarvigilunga. Akjarsijoᴋotingale sakkunik pijomalaungilak, angijomik sivuragame. Tagva Saulib saviksoaᴋotine tiguva ochovigilâlo.

⁵ Akjarsijoᴋotingale sakkunik takkogame Saul toᴋongmat, ochotipoktauk saviksoarmut, toᴋolunelo.

⁶ Taimâk Saul, erningillo pingasut, iglomioᴋatingillo toᴋovut atautsekut.

⁷ Israelitillo angutingit, naksamelauktut, takkogamik ᴋemângmatta, Saulelo erningillo toᴋongmatta, iglugasaksoaᴋotitik ᴋemakpait, ᴋemâlutiglo, Filisterillo tikkilutik innigivait.

⁸ Kaulermallo Filisterit tikkilerput ullimarsimajut annoraijarlugit; naipipaillo Saule erningillo, nallatillugit ᴋakᴋame Gilboamik atelingme,

⁹ Annoraijarpâllo, niaᴋungalo sakkungillo tiguvait, tillikliutilaitalo Filisterit nunanganut sunatuinarnut, oᴋautigijauᴋojilutiglo tamattominga, Gûdingoaᴋotimik inugasaksuillo ilûnamasiatik sângine;

¹⁰ Sakkungillo illivait Gûdimik iglunganut, niaᴋungalo atsungerpât Dagonib iglunganut.

¹¹ Jabesemiullo Gileademe, tussaramik tamainik, Filisterit pinniarlauktanginik Saulemut:

¹² Tagva angutit sorsugungnartut ilûnatik parngnailerput, tigulugillo Saulib erningitalo timingit toᴋongajut, âpaillo Jabesemut, illijartorpaillo sauningit napârtub Terebintemik atigub Jabesemetub atâne, nerritaililutiglo uvlut 7 it nâlugit.

¹³ Taimâk Saule toᴋovok, idluitullinine pivlugit, Nalekamut idluitullijutigilauktane, Nalekab oᴋausinginut, nâlaktaulaungitunut tapsomunga; taimaglotauk angakut apperingmagit.

¹⁴ Nalegarle apperilaungila: tamânna pivlugo toᴋoᴋovâ, atannionerlo sâtipa Davidemut Isaib erninganut.