I Korintemiunut 9 - Labrador Inuttitut Heritage Bible

Ajoᴋertuijut issumagijaujariaᴋarninginik piksanginik. Taimaigalloartilugole, Paulusib akkilertaujomangininganik sangêtut pivlugit. Niaᴋôtiksab asserojuitub pinasuartauᴋojauninganik.

¹ Aposteleungilangâ? Kivgaujungnaingilangâ? Nâlegavut Jêsuse Kristûse takolaungipigô? Ilipse sanamajigingilapsinga Nâlekamê?

² Assipsingnut Aposteliungikuma, ilipsingnut Aposteliovunga; Apostelionimnut nalunaikutauvose Nâlekame.

³ Tamadja akkiornera erᴋartortimnut:

⁴ Nerrijuksaungilagût imertuksaunatalô?

⁵ Nulialijartuksaungilagût arnamik ᴋatangumik, Apostelititut assiptitut, Nâlekablo ᴋatangutingititut, Kêfasetullô?

⁶ Uvangalo Barnabaselo kissimnuk taimâk pijungnangilagûk?

⁷ Kina sorsugiartorlune kivgartorᴋâ, atorniartane nangminek pisiarilugît? Kina vainiliksamik perorsêviliorᴋâ, perorsiangita ilanginik nerrinanê? Kinalônêt nergjutinik pairsivâ, êsinanelo nergjutit tâpkoa immunginîk?

⁸ Inûb ilusinga atordlugo taimâk oᴋâlavîk? Perᴋojat taimaitunik oᴋauseᴋanginivât?

⁹ Môsesib perᴋojangine aglaksimangmat, “Ivjarusêjuksaungilatit tuktuvangmik (sullugainernik) tullertomik.” Tuktuvait (kissêta) Gûdib issumagivagît?

¹⁰ Ubvalo mattominga piluartomik uvagut pivluta oᴋâlalaungilâk? Aukak, uvagut pivluta aglaksimangmat. Poagrejartok (ivjomik) poagrejartuksauvok nerriuklune, sulugainerniglo kadjuktok nerriuklune kadjuktuksauvok.

¹¹ Anernerub pinginik karngasuigapta ilipsingnut, timipse atoraksanginik ilangaigupta, angiluarᴋâ?

¹² Assivut taimaitomik perᴋojijungnarpatta ilipsingnik, uvagut pijuksaunersaungilagût? Uvagulle perᴋojinermik taimaitomik atulaungilagut; sunatuinaille kamagingilavut, agviarutiksalioromanata Kristûsib oᴋausinginut tussarnertunut.

¹³ ᴋaujimangilasê kivgartortut ivjornaitovingme nerrivangmatta ivjornaitoviub pinginît? Tunerguservingmelo kivgartortut tunerguserviub ᴋânganut illijaujut ilangerpangmagît?

¹⁴ Taimâktauk Nâlegak perᴋojilaukpok, oᴋautsinik tussarnertunik oᴋâlajut oᴋautsinut tussarnertunut inôgutiksarsijuksaungmatta.

¹⁵ Tamakkoningale atulaungimarikpunga. Taimailiorviojomavlungalo tamattominga aglanginivunga. Toᴋojomangârpunga nertornautiksamnik aᴋsârtaunermit.

¹⁶ Oᴋautsit tussarnertut oᴋâlatigigapkit, nertortuksaungilanga uvamnik; taimailiortuksaugama. Kappianarmêk uvanga, oᴋautsit tussarnertut oᴋâlatigingikupkit.

¹⁷ ᴋununanga oᴋâlaguma, akkilertaujomârpunga; ᴋunugalloarumale, piniarnermik tamattominga perᴋojauvunga.

¹⁸ Sumik tagva akkilertauniarpîk? Imâk: Oᴋautsit tussarnertut Kristûsemik oᴋâlatigigapkit, taimailiorpunga akkilertaukojinanga; atornerlugomanago kivgaunginera oᴋautsit tussarnertut pitjutigilugit.

¹⁹ Inungmik nâlegaksaᴋangigalloardlunga, uvamnik kivgautitunga tamainut, unuksititsomavlugit (okpertuksat).

²⁰ Jûdine Jûditun-ipunga, Jûdit idluarserᴋojomavlugit. Perᴋojalingne perᴋojaliktun-ipunga, idluarseᴋojomavlugit perᴋojalit.

²¹ Perᴋojaᴋangitune perᴋojaᴋangitotun-ipunga, idluarserᴋojomavlugit perᴋojaᴋangitut; Gûdib sângane perᴋojaliungitsangigalloardlunga, Kristûsible perᴋojangit nâlekpakka.

²² Sangêtune sangêtotun-ipunga, sangêtut idluarserᴋojomavlugit. Ilûnnainut adsionasuarpunga ilûnâne, ilangillônêt ilûnnainit piuliniaromavlugit.

²³ Oᴋautsille tussarnertut pivlugit taimailiorpunga, nangminek ilangiubvigijomavlugit.

²⁴ ᴋaujimangilasê, aᴋpaliutivingme aᴋpangerᴋatautijut, ilûnatik aᴋpangeralloarmatta, atausenauble pivianartok (ajugaujub pijaksanga) pivâ? Akpangerniaritse tagva, tigulugo tâmna.

²⁵ Inugaᴋatautijulle ilûnatik assianik pinasuangilat; ipkoale niaᴋôtiksak asserorniartok pijomavlugo, uvagulle asserojuitomik piniarpogut.

²⁶ Taimaimat aᴋpangerpunga maungatuinaungitok; sorsukpungalo sorlo silatuinarmut issaᴋailunga pinanga.

²⁷ Timigale aᴋtorsartidlarlugo kivgautipara, assimnut oᴋâlajunga nangminek egitaksaujomananga.