I Korintemiunut 8 - Labrador Inuttitut Heritage Bible

Gudeungitunut tunergutinik.

¹ “Gûdeungitunulle tunergutit pivlugit ᴋaujimavogut, ilûnnata illisimagapta.” Illisimanek pijorititsivok, naglingnerle âᴋiksiovok.

² Ilisimanasugijoᴋarpalle sumik tâmna ᴋaujimangilak sulle ᴋaujijariaᴋarnerminik ᴋanok.

³ Gûdemigle nagligosuktoᴋarpat, tâmna illitarijauvok tâpsomunga.

⁴ Gûdeungitunut tunergutinik nerrinek pivlugo ᴋaujimavogut tagva, Gûdeungitok nuname sunautsangimat, Gûdeᴋangimallo atausetôjub assianik.

⁵ Gûdinik taijaujoᴋaralloarpok ᴋilangmelônêt nunamelônêt; Gûdit (taimaitut) unungmatta, nâlekallo unungmatta.

⁶ Taimaigalloartilugo, atausênarmik Gûdeᴋarpogut, Atâtamik; tâpsomangat ilûnnamatsiatik pivut, uvagullo tâpsomanêpogut; atausênarmiglo Nâlegaᴋarpogut Jêsuse Kristûsemik, tâpsomûna ilûnnamatsiatik pivut uvagullo tâpsomûna.

⁷ Iûnnatigle atunit tamattominga illisimangilat. Ilangit sulle issumajâdlarlutik Gûdeungitut pitjutigilugit, Gûdeungitunut tunergutaunasugijamingnik nerrivut; tamattomungalo issumangit sujuktauvut, sangêngmatta.

⁸ Nerᴋele idluarutigingilavut Gûdib sângane. Nerrinivut pivlugo idluarnersauniangilagut, nerringinivullo pivlugo idluinersauniangigilagut.

⁹ Udjertuleritsele, kivgaunginise tamanna apôtiksaulerᴋonago sangêtunut.

¹⁰ Igvit ilitarsineᴋartotit, naliata takogunitit nerrimârvingme iksivatilutit Gûdeungitub iglungane, tâmna sangêname, issumamigut kajungersartaulingilâk, nerrilune Gûdeungitunut tunergutinîk?

¹¹ ᴋatangutib tagva sangêtub, Kristûsib toᴋotigijangata, ilitarsinît asserorutiginiarpâ.

¹² Taimâgle idluituligupse ᴋatangutigênut, killerdlugillo sorlo issumangit sangêtut, tagva Kristûsemut idluitulivose.

¹³ Taimaimat nerᴋe ᴋatangutima sinaungajutigikpago, nerᴋemik nerrijomanajatsangilanga, ᴋatangutimnut sinaungajutaujomananga.