I Korintemiunut 7 - Labrador Inuttitut Heritage Bible

Nuliarêngnek pivlugo Paulusib kioninganik.

¹ Aglalauktasele uvamnut pivlugit kiovunga: Idluarpok inungmut, arnamik aktuingikune.

² Assiniarnerle pitjutigilugo angut nangminerijaminik nuliaᴋarle, arnarlo nangminerijaminik ueᴋarle.

³ Angutib nuliane ilanersârvigiliuk, arnatauk uine taimailiorvigiliuk.

⁴ Uilik timiminut ataniungilak, uingale; taimâktauk nulialik timiminut ataniunginivok, nuliangale.

⁵ Avisârtoᴋarniarane aiparminit; kissiane tamaptik sivikitomik pijomavlutik issumaᴋaᴋatigêkuptik, nerritailinermut tuksiarnermullo piviksaᴋarᴋovlutik; ama katingmigitik, Sâtanasemut ôktorluktaukonatik, ikliguktailinek ajorapsiuk.

⁶ Tamannale naglingnermut oᴋautigijara, perᴋojautilugo pinanga.

⁷ Inuille tamaita uvaptun-erᴋojomagalloartakka; ilûnatigle ingmigôlingajomik tunitjiviovut Gûdemut, ilangat imâk, ilangat taimâk.

⁸ Aipaᴋangitulle uigarnerillo imâk oᴋaupakka: Uvaptunikunik, nâmagajarpok tâpkonunga.

⁹ Aipaᴋanginerle ajorunitsuk, aipatârlît; aipaᴋarnek idluarnersaungmat, ikligudlarnermit.

¹⁰ Nuliarêlle uvangaungitub, Nâlekable peᴋovait, uilik uiminik ᴋemaiᴋonago.

¹¹ ᴋemakuniugle uitârtuksaungilak, uinelônêt saimarsarlugo piliuk. Angutiblo nuliane avitaksaringilâ.

¹² Assingille uvanga oᴋaupakka Nâlegaungitub: Okpertok okpingitomik nuliaᴋarune, taipsomalo najuênaromakpago, avitaksaringilâ.

¹³ Arnaktauk okpingitomik ueᴋarune, taipsomalo najuênaromakpago, avitaksaringilâ.

¹⁴ Okpingitok angut nuliaminut ivjornailingmat, arnaktauk okpingitok uiminut ivjornailivok. Taimaingipat, ᴋitorngase ivjornarajarput; mânale ivjornaiput.

¹⁵ Okpingitorle avitsomagune, avile! Okpertok angullônêt, arnarlônêt, taimaitoᴋarpat, ᴋelaksorsimangilak. Ulapirsauteᴋarᴋovlutale Gûdib ᴋaiᴋolaukpâtigut.

¹⁶ Igville arnak, ômât, uit piuliniarmangângne, ᴋanoᴋ ᴋaujimavît? Igvillônêt angut, nuliat piuliniarmangângne, ᴋanok ᴋaujimavît?

¹⁷ Ilûnatigle atunit inôniarlît, sorlo Gûdib ilingatilaungmagit, sorlolo Nâlekab atunit ᴋaiᴋolaungmagit. Tamattominga ilagêne ilûnaine perᴋojivunga.

¹⁸ Kipimavlune ᴋaiᴋojaumajub kipimanek maligaksarivâ. Kipimaluganelo ᴋaiᴋojaumajok kipijauniarane.

¹⁹ Kipimanek atungilak, kipimanginerlo atunginivok; Gûdible perᴋojangit nâlektaukariaᴋarput.

²⁰ Inugle ᴋanok ilingalaungmangât ᴋaiᴋojautilugo, taimaitsainarle!

²¹ Kivgautilutit ᴋaiᴋojaumaguvit, tamanna issumajârutiginago pît; kivgaujungnairungnaruville, taimaingârit.

²² Kivgautilugo ᴋaiᴋojaumajok Nâlekame, tâmna Nâlekab kivgaujungnaitipâ; taimâktauk kivgautinago ᴋaiᴋojaumajok Kristûsib kivgarivâ.

²³ Akkitudlartomik pisiangovose; kivgauniarase inungnut.

²⁴ Ilûnase ᴋatangutikka, atunit, ᴋanok ilingalaungmangâpselônêt ᴋaiᴋojautiluse, taimaidluse Gûdemêtuaritse.

²⁵ Uigasuille pivlugit perᴋojaᴋsilaungilanga Nâlekamit; issumagale anipara, Nâlekamut nâpkigijaulaurama, nelâgôrᴋovlunga.

²⁶ Mâna tagva idluarasugivara, neliutub tamattoma kappianarninga pivlugo, inungmut idluarmat, taimailingatuinarpat (aipaᴋarane).

²⁷ Nuliamut ᴋelaksorsimaguvit, ᴋelarutjârasuarniarnak! Nuliaᴋangikuville, nuliaksarsiorniarnak!

²⁸ Nulianikkuville, idluitulingilatit; uigasuglo uinikkune, idluitulinginivok. Taimaitulle timikut kappianarneᴋarniarput. Taimaitaukojomangigalloarpapse.

²⁹ Mattomingale oᴋautjivunga, ᴋatangutikka, neliutok sivikipok. Ama imâk issumaga: Nulialit nuliaᴋangitutitunilerlît; ᴋeajullo ᴋeangitutitut;

³⁰ ᴋuviasuktullo ᴋuviasungitutitut; pisiniartullo perᴋuteᴋangitutitut;

³¹ Silaksûblo mattoma pinginik atortut, atornerlungniarnagit; silaksûb tamattoma ilinganinga nungujomârmat.

³² Issumagivapsele issumajârᴋojomanase. Aipaᴋangitub Nâlekab pingit issumagivait, Nâlekab idluarijanganut ilingajomavlune.

³³ Aipaliuble nunab pingit issumagivait, nuliaminut idluarijaujomavlune.

³⁴ Uilillo uigasuillo adsigêngilat. Ueᴋangitub Nâlekab pingit issumagivait, ivjornaitsomavlune timimigullo anernermigullo. Uiliuble nunab pingit issumagivait, idluarijaujomavlune uiminut.

³⁵ Tamattomingale oᴋarpunga, ilipsingnut idluarmat; napperomavluse pinanga, kissianele idluarᴋutaungmat, Nâlegarlo kivgartutsainarlugo ulapitaukonase.

³⁶ Ilapsele ilangata idluarasugingikuniuk paningme ueᴋangininga, inumariotsiartilugo, taimâglo pijariaᴋarᴋôrpat, issumaminik pile; idluitulingilak; taimaitut uiniglît.

³⁷ Kinale ômamigut kajusimagune, (agviaruteᴋarane issumaminik piniarungnarame); ômamine issumasimagune (panine) uigasuk aipaitôᴋovlugo, idluartomik pivok.

³⁸ Taimâk uiniktitsijok idluartomik pivok; uiniktitsingitorle idluarnersamik pivok.

³⁹ Arnab perᴋojat nâlengniariaᴋarpait, uine inôtilugo; uingale toᴋokpat, issumaminik pituinariaᴋarpok uiniklune pijomajaminik kissianele Nâlekame piniartuksauvok.

⁴⁰ Piloringnersaujorle, taimailingatuinarpat (aipaᴋarane,) issumaga maliklugo. Uvangaletauk Gûdib Anerninganik peᴋarasugivunga.