I Korintemiunut 5 - Labrador Inuttitut Heritage Bible

Inub ajortulidlalauktub pidlartauninganik. Ajorᴋertutsinik, taimaitut avitaksat ᴋanok illagênut piniarviojuksaungmangâta.

¹ Ilûnâne tussaumajaudlarpose, ajortulijoᴋarpogôk akunapsingne, ajortulinermiglo taimaitomik aglât nalojullônêt ᴋaujimangitanganik, ilangata atâtame nulianga nuliaringmago.

² Ilipselo piojoridlarpose, kiksautiginersarilaungnagolo, taimailiortok avitisârlugo ilipsingnit.

³ Uvangale apsimagalloarlunga timipkut, anernipkulle najorluse, taimailiortok erᴋartorêrpara, sorlo najorluse, imâk:

⁴ Nâlegapta Jêsusib Kristûsib atingane, katimavipsingnêdlunga anernipkut, Nâlegavut Jêsuse Kristûse pitsartutigilugo,

⁵ Tunilugo taimna Sâtanasemut, uvinik asserortaukovlugo, tarne piulijauᴋovlugo Nâlekab Jêsusib uvluksangane.

⁶ Nertornautiksase ânanaungilak. ᴋaujimangilasê, pudjusautiarsûb sanaugak ilûnât pudjutingmagô?

⁷ Taimaimat pudjusautetoᴋak pêjarsiuk, sanaugaktut nutaujotut pudjusauteᴋangitotut ilerᴋovluse, sôrlo nelâgut inapse. Saugârsuk ᴋângerviksiutiksavut tunergutaumajarêrmat, tagva Kristûse.

⁸ Taimaimat uvloᴋsiorta pudjusautetoᴋamu-ungitok, pudjusauteᴋaratalo ajornermik takkormôrnermiglo, sanaugaᴋarlutale pudjusauteᴋangitomik ivjornaivluta mikseᴋârlutalo.

⁹ Aglagvigilaukpapse aglangne, ikligunermik atortut illagijaksaringinapsigik.

¹⁰ Ikligunermik atortut, pijomatudlartullônêt, arᴋtaijullônêt, Gûdeungituniglônêt kivgartortut silame mattomane oᴋautigitsangilakka; silamit mattomangat ᴋemâjuksaunajarpose, tamakkoa pigupkit.

¹¹ Mânale aglagvigilaukpapse, taipkoa illagijaksaringinapsigik, imâgle: ᴋatangumik taijaujomajok assiniarteokpat, pijomatudlartiokpallônêt, Gûdiungituniglônêt kivgartortiokpat, mittautiksarsiorteokpallônêt; tallateokpallônêt arᴋtaijeokpallônêt taimailiortok nerreᴋatigijaksaringilase aglât.

¹² Assiptingnêtut (okpingitut) susiorvigijaksarivakkâ, erᴋartortaukovlugit uvamnût? Erᴋartuivangilasê uvaptingnêtunîk (okpertunîk)?

¹³ Assiptingnêtulle Gûdib erᴋartoromârpait. Ajortulijok ilagêngnipsingnit aviksiuk.