I Korintemiunut 4 - Labrador Inuttitut Heritage Bible

Gudib kivgangit ajoᴋertuijut, ᴋanok nautsertoraksaungmangâta.

¹ Inuit ilûnatik imâk issumaᴋarvigilitigut, Kristûsib kivgaringmatigut, pimaklertôgaptalo Gûdib pinginik nalonartunik.

² Tagvale pimaklertit assianik nautsertortaungilat, nalâgôrlutik naipitaujuksauvlutik kissiane.

³ Ilipsingnulle assipsingnullônêt, tagva inuit erᴋartuininginut, erᴋartortauguma, tamanna erᴋasûtigingilara; nangminimnik erᴋartunginivunga.

⁴ Uvamnik aulajingikalloarama sumik; tamannale pivlugo idluartitaungikalloarpunga; Nâlegarle, tâmna erᴋartuijôvok uvamnik.

⁵ Taimaimat erᴋartuiniarase naliuterᴋârtinago, Nâlegak tikitsiarilugo; tâpsoma tâktome ijertorsimajuttauk sakᴋertitsomârmagit ᴋaumajomut, ômatille erᴋarsautingit nalonairomârpait; taimailerpat, ilûnatik atunit nertortaujariaᴋarnitik pigijomârpait Gûdemit.

⁶ Tamakkoale, ᴋatangutikka, oᴋautigivakka, uvangalo Apolluselo pitjutigilunuk, pivluse; ilinniarᴋovluse uvaptingnit, naliallônêt ajunginersaunasugerᴋonago, mâna aglaksimajomit; illapse ilanganik piojorijoᴋarᴋonago (ajoᴋertuijut) ilangat pivlugo, assia akkerartorlugo.

⁷ Kia ajunginersautipâtît? Sumigle peᴋarᴋêt tunergusiaringitarnîk? Mattomingale tunitsiviogavit, sôk nertôtivêt ilingnik, tunitsiviongitotut-idlutît?

⁸ Kâgungnairêrpose, akluilerêrpose, uvagut atorata ataniotivose; atanioterᴋojominadlasposelo ilipse, uvaguttauk atanioterᴋovluta illagivluse.

⁹ Issumavungale, Gûdib Aposteliojogut inukullônerpângotilaungmatigut, sorlo toᴋotaksatuinait. Mitautigijaksangolerapta silaksoarmiunut, Engelinullo, inungnullo.

¹⁰ Kristûse pivlugo silaitotun-ipogut, ilipsele silatovose Kristûseme; uvagut sangêpogut, ilipsele pitsartuvose; ilipse ânanaudlarpose, uvagulle nachogijauvogut.

¹¹ Mâna tikidlugo kâlaptalo imerukpogut annorâᴋaratalo, annaulertaulaptalo, saksârtutullo-ipogut.

¹² Katsungailuta sanavogut aggaptingnut (piksaptingnik). Suadlartaujarangapta, saimaivogut; unangmijaujarangapta, ᴋenuersârpogut; mitautigijaujarangapta, manigôtijunik oᴋauseᴋarpogut.

¹³ Sanniktut-ipogut nuname uvlomemut tikiluta, piunginerpâᴋutauvluta inungnut tamainut.

¹⁴ Tamakkoninga aglangitunga kangusuktitsomavluse; erᴋaitinasuarpapsele ᴋitorngaptut nagligijaptut.

¹⁵ Ten tausendinik ajoᴋertuijoᴋarajaralloarupse Kristûseme, unuktunik atâtaᴋangilase; oᴋautsinut tussarnertunut ᴋitorngiarilaurapse Kristûse Jêsuseme.

¹⁶ Taimaimat kaiblarpapse: uvamnik malikteoniaritse!

¹⁷ Tamannalo pivlugo Timôteuse tililaukpara ilipsingnut tagva ernera naglingnartok nertornartorlo Nâlekame; tâpsoma erᴋaitiniarpâse ajoᴋertûtimnik Kristûse pivlugo, sorlo ilûnâne, illagêktune ilûnaine ajoᴋertuivakama.

¹⁸ Ilangille piojoridlarput, tikiniarasuginanga ilipsingnut.

¹⁹ Nâlekable perᴋopanga, tikitsomavapse mânakut, piojorijullo oᴋausingit kiglisiniaromanagit, pitsartuningille.

²⁰ Gûdib nâlegauvinga oᴋautsituinarnut pingimat, pitsartunernulle.

²¹ Sumik pijomavisê? Issaᴋautelijarlungalônêt, naglingneᴋarlungalônêt anernekarlungalo ᴋenuêtomik tikituksauvîk ilipsingnût?